آپ کو بھول کے میں یاد خدا کرتا ہوں

آپ کو بھول کے میں یاد خدا کرتا ہوں

خود انا کہتا ہوں موجود بقاء کرتا ہوں

کفر و اسلام کا موجد ہوا بندہ ہو کر

پھر وہ میں کون ہوں جو خود ہوں کہا کرتا ہوں

علم اعداد سے ہوتا ہے حجاب اکبر

ایک ہر حال میں ہوں کل میں رہا کرتا ہوں

ہوں بصارت میں نہاں عذر ہے بینائی کا

روز روشن میں ہی خود آپ رہا کرتا ہوں

بے سمجھ نام خدا کا وہ لیا کرتے ہیں

پوچھتا ہوں تو یہ کہتے ہیں سنا کرتا ہوں

جسم خاکی نہ سمجھ یار کا بس جلوہ ہے

یاد اور بھول سے میں دل کو ضیا کرتا ہوں

میں سمجھتا ہوں خدا آپ کو بندہ بن کر

ہاں اسی شان کا مرکزؔ ہوں کہا کرتا ہوں

ap ko bhul ke main yad-e-khuda karta hun

khud ana kahta hun maujud baqa karta hun

kufr-o-islam ka mujid hua banda ho kar

phir wo main kaun hun jo khud hun kaha karta hun

ilm aadad se hota hai hijab-e-akbar

ek har hal mein hun kal main raha karta hun

hun basarat mein nihan uzr hai binai ka

roz-e-raushan mein hi khud ap raha karta hun

be samajh nam-e-khuda ka wo liya karte hain

puchhta hun to ye kahte hain suna karta hun

jism-e-khaki na samajh yar ka bas jalwa hai

yad aur bhul se main dil ko ziya karta hun

main samajhta hun khuda ap ko banda ban kar

han isi shan ka markaz hun kaha karta hun