رقص مستی دیکھتے جوش تمنا دیکھتے

رقص مستی دیکھتے جوش تمنا دیکھتے

سامنے لا کر تجھے اپنا تماشا دیکھتے

کم سے کم حسن تخیل کا تماشا دیکھتے

جلوۂ یوسف تو کیا خواب زلیخا دیکھتے

کچھ سمجھ کر ہم نے رکھا ہے حجاب دہر کو

توڑ کر شیشے کو پھر کیا رنگ صہبا دیکھتے

روز روشن یا شب مہتاب یا صبح چمن

ہم جہاں سے چاہتے وہ روئے زیبا دیکھتے

قلب پر گرتی تڑپ کر پھر وہی برق جمال

ہر بن مو میں وہی آشوب و غوغا دیکھتے

صد زماں و صد مکاں و ایں جہاں و آں جہاں

تم نہ آ جاتے تو ہم وحشت میں کیا کیا دیکھتے

اس طرح کچھ رنگ بھر جاتا نگاہ شوق میں

جلوہ خود بیتاب ہو جاتا وہ پردا دیکھتے

جن کو اپنی شوخیوں پر آج اتنا ناز ہے

وہ کسی دن میری جان ناشکیبا دیکھتے

مے کدے میں زندگی ہے شور نوشا نوش ہے

مٹ گئے ہوتے اگر ہم جام و مینا دیکھتے

raqs-e-masti dekhte josh-e-tamanna dekhte

samne la kar tujhe apna tamasha dekhte

kam se kam husn-e-takhayyul ka tamasha dekhte

jalwa-e-yusuf to kya khwab-e-zulekha dekhte

kuchh samajh kar ham ne rakha hai hijab-e-dahr ko

tor kar shishe ko phir kya rang-e-sahba dekhte

roz-e-raushan ya shab-e-mahtab ya subh-e-chaman

ham jahan se chahte wo ru-e-zeba dekhte

qalb par girti tarap kar phir wahi barq-e-jamal

har ban-e-mu mein wahi ashob-o-ghaugha dekhte

sad zaman-o-sad makan-o-ain jahan-o-an jahan

tum na a jate to ham wahshat mein kya kya dekhte

is tarah kuchh rang bhar jata nigah-e-shauq mein

jalwa khud betab ho jata wo parda dekhte

jin ko apni shokhiyon par aj itna naz hai

wo kisi din meri jan-e-nashikeba dekhte

mai kade mein zindagi hai shor nosha nosh hai

mit gae hote agar ham jam-o-mina dekhte