رفتگاں کا بھی خیال اے اہل عالم کیجئے

رفتگاں کا بھی خیال اے اہل عالم کیجئے

عالم ارواح سے صحبت کوئی دم کیجئے

حالت غم کو نہ بھولا چاہئے شادی میں بھی

خندۂ گل دیکھ کر یاد اشک شبنم کیجئے

عیب الفت روز اول سے مری طینت میں ہے

داغ لالہ کے لیے کیا فکر مرہم کیجئے

اپنی راحت کے لیے کس کو گوارا ہے یہ رنج

گھر بنا کر گردن محراب کو خم کیجئے

عشق کہتا ہے مجھے رام اس بت وحشی کو کر

حسن کی غیرت اسے سمجھاتی ہے رم کیجئے

رات صحبت گل سے دن کو ہم بغل خورشید سے

رشک اگر کیجے تو رشک بخت شبنم کیجئے

دیدہ و دل کو دکھایا چاہئے دیدار یار

حسن کے عالم سے آئینوں کو محرم کیجئے

شکل گل ہنس ہنس کے روز وصل کاٹے ہیں بہت

ہجر کی شب صبح رو کر مثل شبنم کیجئے

تھی سزا اپنی جو شادی مرگ قسمت نے کیا

ہجر میں کس نے کہا تھا وصل کا غم کیجئے

آپ کی نازک کمر پر بوجھ پڑتا ہے بہت

بڑھ چلے ہیں حد سے گیسو کچھ انہیں کم کیجئے

اٹھ گئی ہیں سامنے سے کیسی کیسی صورتیں

روئیے کس کے لیے کس کس کا ماتم کیجئے

روز مردم شب کیے دیتا ہے سرمہ پوچھیے

خون ہوتے ہیں بہت شوق حنا کم کیجئے

آئینہ کو روبرو آنے نہ دیجے یار کے

شانہ سے آتشؔ مزاج زلف برہم کیجئے

raftagan ka bhi khayal ai ahl-e-alam kijiye

alam-e-arwah se sohbat koi dam kijiye

halat-e-gham ko na bhula chahiye shadi mein bhi

khanda-e-gul dekh kar yad ashk shabnam kijiye

aib ulfat roz-e-awwal se miri tinat mein hai

dagh-e-lala ke liye kya fikr-e-marham kijiye

apni rahat ke liye kis ko gawara hai ye ranj

ghar bana kar gardan-e-mehrab ko kham kijiye

ishq kahta hai mujhe ram us but-e-wahshi ko kar

husn ki ghairat use samjhati hai ram kijiye

rat sohbat gul se din ko ham baghal khurshid se

rashk agar kije to rashk-e-bakht-e-shabnam kijiye

dida-o-dil ko dikhaya chahiye didar-e-yar

husn ke alam se ainon ko mahram kijiye

shakl-e-gul hans hans ke roz-e-wasl kate hain bahut

hijr ki shab subh ro kar misl-e-shabnam kijiye

thi saza apni jo shadi marg qismat ne kiya

hijr mein kis ne kaha tha wasl ka gham kijiye

ap ki nazuk kamar par bojh parta hai bahut

barh chale hain had se gesu kuchh unhen kam kijiye

uth gai hain samne se kaisi kaisi suraten

roiye kis ke liye kis kis ka matam kijiye

roz mardum shab kiye deta hai surma puchhiye

khun hote hain bahut shauq-e-hina kam kijiye

aina ko rubaru ane na dije yar ke

shana se atish mizaj-e-zulf-e-barham kijiye