رخ پر رہی وہ زلف معنبر تمام رات — زین العابدین خاں عارف

رخ پر رہی وہ زلف معنبر تمام رات

روشن نہ وصل میں ہوا یہ گھر تمام رات

دیکھا تو غور سے ترے بیمار کو نہیں

اس پر پڑی رہی ہے یہ چادر تمام رات

دل کو بھی بھول بھول گیا بے خودی میں کچھ

ڈھونڈا کیا میں کل جو ترا گھر تمام رات

ہووے گا قتل صبح کو کوئی جو سخت جاں

کرتے رہے ہیں تیز وہ خنجر تمام رات

عارفؔ نہیں ہے ہم کو صبوحی کی احتیاط

لیتے ہیں نام ساقیٔ کوثر تمام رات