رخسار آج دھو کر شبنم نے پنکھڑی کے

رخسار آج دھو کر شبنم نے پنکھڑی کے

کچھ اور بخش ڈالے انداز دل کشی کے

ایثار خود شناسی توحید اور صداقت

اے دل ستون ہیں یہ ایوان بندگی کے

رنج و الم میں کچھ کچھ آمیزش مسرت

ہیں نقش کیسے دل کش تصویر زندگی کے

فرضی خدا بنائے سجدے کئے بتوں کو

اللہ رے کرشمے احساس کم تری کے

قلب و جگر کے ٹکڑے یہ آنسوؤں کے قطرے

اللہ راس لائے حاصل ہیں زندگی کے

صحرائیوں سے سیکھے کوئی رموز ہستی

آبادیوں میں اکثر دشمن ہیں آگہی کے

جان خلوص بن کر ہم اے شکیبؔ اب تک

تعلیم کر رہے ہیں آداب زندگی کے

rukhsar aj dho kar shabnam ne pankhuri ke

kuchh aur bakhsh dale andaz-e-dil kashi ke

isar khud shanasi tauhid aur sadaqat

ai dil sutun hain ye aiwan-e-bandagi ke

ranj-o-alam mein kuchh kuchh amezish-e-masarrat

hain naqsh kaise dil kash taswir zindagi ke

farzi khuda banae sajde kiye buton ko

allah re karishme ehsas kam tiri ke

qalb-o-jigar ke tukre ye ansuon ke qatre

allah ras lae hasil hain zindagi ke

sahraiyon se sikhe koi rumuz-e-hasti

abadiyon mein aksar dushman hain agahi ke

jan-e-khulus ban kar ham ai shakeb ab tak

taalim kar rahe hain adab-e-zindagi ke