رخ ہر اک تیر نظر کا ہے مرے دل کی طرف

رخ ہر اک تیر نظر کا ہے مرے دل کی طرف

آنے والے آ رہے ہیں اپنی منزل کی طرف

ڈوبنے والے کی مایوسی پہ دل تھرا گیا

کس نگاہ یاس سے دیکھا تھا ساحل کی طرف

سچ ہے اک اجڑی ہوئی دنیا کے کیا لیل و نہار

تم سے بھی اب تو نہ دیکھا جائے گا دل کی طرف

کس فسردہ خاطری سے رات بھر جلتی رہی

دیر تک دیکھا کیے ہم شمع محفل کی طرف

اپنی مرضی سے نہیں اپنے ارادے سے نہیں

ہر مسافر کے قدم اٹھتے ہیں منزل کی طرف

تم کو کیا معلوم کیا بنتی ہے دل پر عشق میں

آئنہ لے کر ذرا دیکھو مقابل کی طرف

ہو گیا مخمورؔ راز زندگی کا انکشاف

موج آتی ہے فنا ہونے کو ساحل کی طرف

rukh har ik tir-e-nazar ka hai mire dil ki taraf

ane wale a rahe hain apni manzil ki taraf

dubne wale ki mayusi pe dil tharra gaya

kis nigah-e-yas se dekha tha sahil ki taraf

sach hai ik ujri hui duniya ke kya lail-o-nahar

tum se bhi ab to na dekha jaega dil ki taraf

kis fasurda khatiri se rat bhar jalti rahi

der tak dekha kiye ham sham-e-mahfil ki taraf

apni marzi se nahin apne irade se nahin

har musafir ke qadam uthte hain manzil ki taraf

tum ko kya maalum kya banti hai dil par ishq mein

aina le kar zara dekho muqabil ki taraf

ho gaya makhmur raz-e-zindagi ka inkishaf

mauj ati hai fana hone ko sahil ki taraf