رس ان آنکھوں کا ہے کہنے کو ذرا سا پانی

رس ان آنکھوں کا ہے کہنے کو ذرا سا پانی

سینکڑوں ڈوب گئے پھر بھی ہے اتنا پانی

آنکھ سے بہہ نہیں سکتا ہے بھرم کا پانی

پھوٹ بھی جائے گا چھالا تو نہ دے گا پانی

چاہ میں پاؤں کہاں آس کا میٹھا پانی

پیاس بھڑکی ہوئی ہے اور نہیں ملتا پانی

دل سے لوکا جو اٹھا آنکھ سے ٹپکا پانی

آگ سے آج نکلتے ہوئے دیکھا پانی

کس نے بھیگے ہوئے بالوں سے یہ جھٹکا پانی

جھوم کر آئی گھٹا ٹوٹ کے برسا پانی

پھیلتی دھوپ کا ہے روپ لڑکپن کا اٹھان

دوپہر ڈھلتے ہی اترے گا یہ چڑھتا پانی

ٹکٹکی باندھے وہ تکتے ہیں میں اس گھات میں ہوں

کہیں کھانے لگے چکر نہ یہ ٹھہرا پانی

کوئی متوالی گھٹا تھی کہ جوانی کی امنگ

جی بہا لے گیا برسات کا پہلا پانی

ہاتھ جل جائے گا چھالا نہ کلیجے کا چھوؤ

آگ مٹھی میں دبی ہے نہ سمجھنا پانی

رس ہی رس جن میں ہے پھر سیل ذرا سی بھی نہیں

مانگتا ہے کہیں ان آنکھوں کا مارا پانی

نہ ستا اس کو جو چپ رہ کے بھرے ٹھنڈی سانس

یہ ہوا کرتی ہے پتھر کا کلیجہ پانی

یہ پسینہ وہی آنسو ہیں جو پی جاتے تھے ہم

آرزوؔ لو وہ کھلا بھید وہ ٹوٹا پانی

ras in ankhon ka hai kahne ko zara sa pani

sainkron dub gae phir bhi hai itna pani

ankh se bah nahin sakta hai bharam ka pani

phut bhi jaega chhala to na dega pani

chah mein paon kahan as ka mitha pani

pyas bharki hui hai aur nahin milta pani

dil se lauka jo utha ankh se tapka pani

ag se aj nikalte hue dekha pani

kis ne bhige hue balon se ye jhatka pani

jhum kar ai ghata tut ke barsa pani

phailti dhup ka hai rup larakpan ka uthan

dopahar dhalte hi utrega ye charhta pani

tiktiki bandhe wo takte hain main is ghat mein hun

kahin khane lage chakkar na ye thahra pani

koi mutawali ghata thi ke jawani ki umang

ji baha le gaya barsat ka pahla pani

hath jal jaega chhala na kaleje ka chhuo

ag mutthi mein dabi hai na samajhna pani

ras hi ras jin mein hai phir sail zara si bhi nahin

mangta hai kahin in ankhon ka mara pani

na sata us ko jo chup rah ke bhare thandi sans

ye hua karti hai patthar ka kaleja pani

ye pasina wahi ansu hain jo pi jate the ham

arzu lo wo khula bhed wo tuta pani