رخ زلف میں بے نقاب دیکھا

رخ زلف میں بے نقاب دیکھا

میں تیرہ شب آفتاب دیکھا

محروم ہے نامہ دار دنیا

پانی سے تہی حباب دیکھا

سرخی سے ترے لبوں کی ہم نے

آتش کو میان آب دیکھا

قاصد کا سر آیا اس گلی سے

نامے کا مرے جواب دیکھا

جانا یہ ہم نے وفات کے بعد

دیکھا جو جہاں میں خواب دیکھا

آفت کا نشانہ ہو چکا تھا

میں دل کی طرف شتاب دیکھا

اک وضع نہیں مزاج معشوق

گہہ لطف و گہے عتاب دیکھا

آنکھوں سے بہاریں گزریں کیا کیا

کس کس کا نہ میں شباب دیکھا

کل مے کدے میں بغیر ساقی

اوندھا قدح شراب دیکھا

کیں اس نے جفائیں بے حسابی

اک دن نہ کبھو حساب دیکھا

سینے سے نکل پڑا نہ آخر

دل کا مرے اضطراب دیکھا

کیا ہوگی فلاح بعد مردن

جیتے تو سدا عذاب دیکھا

آبادی ہے اس کی مصحفیؔ کم

عالم کے تئیں خراب دیکھا

rukh zulf mein be naqab dekha

main tira shab aftab dekha

mahrum hai nama dar-e-duniya

pani se tahi habab dekha

surkhi se tire labon ki ham ne

atish ko miyan-e-ab dekha

qasid ka sar aya us gali se

name ka mire jawab dekha

jana ye ham ne wafat ke baad

dekha jo jahan mein khwab dekha

afat ka nishana ho chuka tha

main dil ki taraf shitab dekha

ik waza nahin mizaj-e-maashuq

gah lutf-o-gahe itab dekha

ankhon se baharen guzren kya kya

kis kis ka na main shabab dekha

kal mai kade mein baghair saqi

aundha qadah-e-sharab dekha

kin us ne jafaen be hisabi

ik din na kabhu hisab dekha

sine se nikal para na akhir

dil ka mire iztirab dekha

kya hogi falah baad murdan

jite to sada azab dekha

abadi hai us ki mushafi kam

alam ke tain kharab dekha