رخ روشن دکھائیے صاحب

رخ روشن دکھائیے صاحب

شمع کو کچھ جلائیے صاحب

روح ہو کر سمائیے صاحب

میرے قالب میں آئیے صاحب

شیخ جی ہو تمہیں سرود حرام

آپ اپنی نہ گائیے صاحب

وصل کی شب قریب آئی ہے

اب نہ مہندی لگائیے صاحب

خون عشاق ہے معانی میں

شوق سے پان کھائیے صاحب

میں تجلی طور دیکھوں گا

آج کوٹھے پہ آئیے صاحب

آپ دل میں بگاڑ رکھتے ہیں

بس نہ باتیں بنائیے صاحب

چشم تر رونے پر ہے آمادہ

اور سوکھی سنائیے صاحب

بوسۂ رخ تو چاہتے ہو سخیؔ

کہیں منہ کی نہ کھائیے صاحب

rukh-e-raushan dikhaiye sahab

shama ko kuchh jalaiye sahab

ruh ho kar samaye sahab

mere qalib mein aiye sahab

shaikh ji ho tumhen surud haram

ap apni na gaiye sahab

wasl ki shab qarib ai hai

ab na mehndi lagaiye sahab

khun-e-ushshaq hai maani mein

shauq se pan khaiye sahab

main tajalli-e-tur dekhunga

aj kothe pe aiye sahab

ap dil mein bigar rakhte hain

bas na baten banaiye sahab

chashm-e-tar rone par hai amada

aur sukhi sunaiye sahab

bosa-e-rukh to chahte ho sakhi

kahin munh ki na khaiye sahab