رجوع بندہ کی ہے اس طرح خدا کی طرف

رجوع بندہ کی ہے اس طرح خدا کی طرف

پھرے ضمیر خبر جیسے مبتدا کی طرف

بعید کیا ہے مروت سے تیری اے شہ حسن

نگاہ لطف سے دیکھے جو تو گدا کی طرف

کہاں وہ زلف کہاں خون نافۂ آہو

جو مشک سمجھے ہیں وہ لوگ ہیں خطا کی طرف

الجھ کے شانے سے کھاتا ہے سیکڑوں جھٹکے

قصور سے یہ ترے گیسوئے رسا کی طرف

خدا نے درد محبت عطا کیا ہے جسے

اسے توجہ خاطر نہیں دوا کی طرف

ملا جو تم نے لہو دست و پا میں عاشق کا

نہ ہوگا میل طبیعت کو پھر حنا کی طرف

کرے گا یار مری جنگ غیر میں امداد

جو آشنا ہیں وہ ہوتے ہیں آشنا کی طرف

فراق یار میں رہتا ہے یوں تصور گور

خیال جیسے مسافر کا ہو سرا کی طرف

نہ ہوگا ہم سفر روح پیکر خاکی

یہ سوئے ارض رواں ہوگا وہ سما کی طرف

بہت خراب رہا بت کدے میں اے آتشؔ

خدا پرست ہے چل خانۂ خدا کی طرف

ruju banda ki hai is tarah khuda ki taraf

phire zamir-e-khabar jaise mubtada ki taraf

baid kya hai murawwat se teri ai shah-e-husn

nigah-e-lutf se dekhe jo tu gada ki taraf

kahan wo zulf kahan khun-e-nafa-e-ahu

jo mushk samjhe hain wo log hain khata ki taraf

ulajh ke shane se khata hai saikron jhatke

qusur se ye tire gesu-e-rasa ki taraf

khuda ne dard-e-mohabbat ata kiya hai jise

use tawajjoh khatir nahin dawa ki taraf

mila jo tum ne lahu dast-o-pa mein ashiq ka

na hoga mel-e-tabiat ko phir hina ki taraf

karega yar miri jang ghair mein imdad

jo ashna hain wo hote hain ashna ki taraf

firaq-e-yar mein rahta hai yun tasawwur gor

khayal jaise musafir ka ho sara ki taraf

na hoga ham safar ruh paikar-e-khaki

ye su-e-arz-e-rawan hoga wo sama ki taraf

bahut kharab raha but kade mein ai atish

khuda parast hai chal khana-e-khuda ki taraf