راہنما بن جاؤں

درد جس دل میں ہو اس دل کی دوا بن جاؤں

کوئی بیمار اگر ہو تو شفا بن جاؤں

دکھ میں ہلتے ہوئے لب کی میں دعا بن جاؤں

اف وہ آنکھیں کہ ہیں بینائی سے محروم کہیں

روشنی جن میں نہیں نور جن آنکھوں میں نہیں

میں ان آنکھوں کے لیے نور ضیا بن جاؤں

ہائے وہ دل جو تڑپتا ہوا گھر سے نکلے

اف وہ آنسو جو کسی دیدۂ تر سے نکلے

میں اس آنسو کے سکھانے کو ہوا بن جاؤں

دور منزل سے اگر راہ میں تھک جائے کوئی

جب مسافر کہیں رستے سے بھٹک جائے کوئی

خضر کا کام کروں راہنما بن جاؤں

عمر کے بوجھ سے جو لوگ دبے جاتے ہیں

ناتوانی سے جو ہر روز جھکے جاتے ہیں

ان ضعیفوں کے سہارے کو عصا بن جاؤں

خدمت خلق کا ہر سمت میں چرچا کر دوں

مادر ہند کو جنت کا نمونہ کر دوں

گھر کرے دل میں جو افسرؔ وہ صدا بن جاؤں

dard jis dil mein ho is dil ki dawa ban jaun

koi bimar agar ho to shifa ban jaun

dukh mein hilte hue lab ki main dua ban jaun

uf wo ankhen ke hain binai se mahrum kahin

raushni jin mein nahin nur jin ankhon mein nahin

main in ankhon ke liye nur ziya ban jaun

hae wo dil jo tarapta hua ghar se nikle

uf wo ansu jo kisi dida-e-tar se nikle

main is ansu ke sikhane ko hua ban jaun

dur manzil se agar rah mein thak jae koi

jab musafir kahin raste se bhatak jae koi

khizr ka kam karun rahnuma ban jaun

umr ke bojh se jo log dabe jate hain

natawani se jo har roz jhuke jate hain

in zaifon ke sahare ko asa ban jaun

khidmat-e-khalq ka har samt mein charcha kar dun

madar-e-hind ko jannat ka namuna kar dun

ghar kare dil mein jo afsar wo sada ban jaun