راز الفت کے عیاں رات کو سارے ہوتے

راز الفت کے عیاں رات کو سارے ہوتے

ہم کئی بار انہیں گھبرا کے پکارے ہوتے

شعلۂ حسن کو روکا ہے نقاب رخ نے

ابھی موتی ترے کانوں کے شرارے ہوتے

جانتے تھے کہ اتارو گے لحد میں ہم کو

میلے کپڑے ابھی تم نے نہ اتارے ہوتے

میرے مرنے کے رہے منتظر احسان کیا

کیوں سہی آپ نے تکلیف سدھارے ہوتے

سامنے میرے رقیبوں کو دکھائے ابرو

آپ نے اس سے تو خنجر مجھے مارے ہوتے

ساتھ آہوں کے شب غم میں جو دل اڑ جاتا

آبلے اوج یہ پاتے کہ ستارے ہوتے

دور سے بھی نہ ہوا یار کا دیدار نصیب

خیر باتیں نہ ہوئی تھیں تو اشارے ہوتے

عشق بازی نہ رہی دل جو گیا واہ رشیدؔ

دم نکل جاتا پہ ہمت تو نہ ہارے ہوتے

raz-e-ulfat ke ayan rat ko sare hote

ham kai bar unhen ghabra ke pukare hote

shola-e-husn ko roka hai naqab-e-rukh ne

abhi moti tire kanon ke sharare hote

jante the ke utaroge lahad mein ham ko

mele kapre abhi tum ne na utare hote

mere marne ke rahe muntazir ehsan kiya

kyun sahi ap ne taklif sidhare hote

samne mere raqibon ko dikhae abru

ap ne us se to khanjar mujhe mare hote

sath ahon ke shab-e-gham mein jo dil ur jata

able auj ye pate ke sitare hote

dur se bhi na hua yar ka didar nasib

khair baten na hui thin to ishare hote

ishq bazi na rahi dil jo gaya wah rashid

dam nikal jata pe himmat to na hare hote