راز دل لاتے ہیں زباں تک ہم

راز دل لاتے ہیں زباں تک ہم

دکھ بھریں اے خدا کہاں تک ہم

اور وہ ہم سے کھنچتے جاتے ہیں

منتیں کرتے ہیں جہاں تک ہم

نہ اڑا باغباں کہ گلشن دل

اور ہیں آمد خزاں تک ہم

آپ کے لطف نے تو قہر کیا

خوب تھے جور آسماں تک ہم

آسماں تک گیا ہے سیل سرشک

دل کو رویا کریں کہاں تک ہم

ان کا آنا بھی اب نہیں منظور

جان سے تنگ ہیں یہاں تک ہم

تیرا پیغام بھی سنا دیں گے

اے حسنؔ پہنچیں تو وہاں تک ہم

raz-e-dil late hain zaban tak ham

dukh bharen ai khuda kahan tak ham

aur wo ham se khinchte jate hain

minnaten karte hain jahan tak ham

na ura baghban ke gulshan-e-dil

aur hain amad-e-khizan tak ham

ap ke lutf ne to qahr kiya

khub the jaur-e-asman tak ham

asman tak gaya hai sail-e-sarishk

dil ko roya karen kahan tak ham

un ka ana bhi ab nahin manzur

jan se tang hain yahan tak ham

tera paigham bhi suna denge

ai husn pahunchen to wahan tak ham