رات کے رہنے کا نہ ڈر کیجیے

رات کے رہنے کا نہ ڈر کیجیے

ایک تو شب یاں بھی سحر کیجیے

لوگ کہیں گے تمہیں ہرجائی ہے

دل میں اک عالم کے نہ گھر کیجیے

دیکھتے ہو میری طرف کیا میاں

اپنی بھی صورت پہ نظر کیجیے

آ ہی لیا بے خبری نے ہمیں

کون ہے یاں کس کو خبر کیجیے

غیر کو جا دیتے ہو گھر میں اگر

میرے تئیں شہر بدر کیجیے

دیکھ نگاہیں تری کہتی ہے خلق

ایسی نگاہوں سے حذر کیجیے

پھر نہیں ملنا ترا مشکل میاں

جاں کا گر اپنی ضرر کیجیے

منزل ہستی میں بہت ہم رہے

مصحفیؔ اب یاں سے سفر کیجیے

rat ke rahne ka na dar kijiye

ek to shab yan bhi sahar kijiye

log kahenge tumhen harjai hai

dil mein ik alam ke na ghar kijiye

dekhte ho meri taraf kya miyan

apni bhi surat pe nazar kijiye

a hi liya be khabari ne hamen

kaun hai yan kis ko khabar kijiye

ghair ko ja dete ho ghar mein agar

mere tain shahr badar kijiye

dekh nigahen tiri kahti hai khalq

aisi nigahon se hazar kijiye

phir nahin milna tira mushkil miyan

jan ka gar apni zarar-e-kijiye

manzil-e-hasti mein bahut ham rahe

mushafi ab yan se safar kijiye