رات پیاسا تھا میرے لوہو کا

رات پیاسا تھا میرے لوہو کا

ہوں دوانہ ترے سگ کو کا

شعلۂ آہ جوں توں اب مجھ کو

فکر ہے اپنے ہر بن مو کا

ہے مرے یار کی مسوں کا رشک

کشتہ ہوں سبزۂ لب جو کا

بوسہ دینا مجھے نہ کر موقوف

ہے وظیفہ یہی دعا گو کا

میں نے تلوار سے ہرن مارے

عشق کر تیری چشم و ابرو کا

شور قلقل کے ہوتی تھی مانع

ریش قاضی پہ رات میں تھوکا

عطر آگیں ہے باد صبح مگر

کھل گیا پیچ زلف خوشبو کا

ایک دو ہوں تو سحر چشم کہوں

کارخانہ ہے واں تو جادو کا

میرؔ ہر چند میں نے چاہا لیک

نہ چھپا عشق طفل بد خو کا

نام اس کا لیا ادھر اودھر

اڑ گیا رنگ ہی مرے رو کا

rat pyasa tha mere lohu ka

hun diwana tire sag ko ka

shola-e-ah jun tun ab mujh ko

fikr hai apne har ban-e-mu ka

hai mire yar ki mison ka rashk

kushta hun sabza-e-lab jo ka

bosa dena mujhe na kar mauquf

hai wazifa yahi dua go ka

main ne talwar se hiran mare

ishq kar teri chashm-o-abru ka

shor qulqul ke hoti thi mane

rish qazi pe rat mein thuka

itr agin hai bad-e-subh magar

khul gaya pech zulf khushbu ka

ek do hun to sehr chashm kahun

karkhana hai wan to jadu ka

mir har chand main ne chaha lek

na chhupa ishq tifl-e-bad khu ka

nam us ka liya idhar udhar

ur gaya rang hi mire ro ka