رات یاد نگہ یار نے سونے نہ دیا

رات یاد نگہ یار نے سونے نہ دیا

شادئ وعدۂ دل دار نے سونے نہ دیا

ہو گئی صبح در خانہ پہ بیٹھے بیٹھے

فتنۂ چشم فسوں کار نے سونے نہ دیا

شب وہ بے کل رہے کاکل میں پھنسا کر اس کو

شور و فریاد دل زار نے سونے نہ دیا

تھا شب ہجر میں اک خون کا دریا جاری

ایک پل دیدۂ خوں بار نے سونے نہ دیا

رات بھر خون جگر ہم نے کیا ہے عارفؔ

فکر رنگینیٔ اشعار نے سونے نہ دیا

اس تن زار پہ ایک بار گراں ہے یہ بھی

یار کے سایۂ دیوار نے سونے نہ دیا

اب تو کر دیویں رہا وہ مجھے شاید کہ انہیں

میری زنجیر کی جھنکار نے سونے نہ دیا

rat yad-e-nigah-e-yar ne sone na diya

shadi-e-waada-e-dil dar ne sone na diya

ho gai subh dar khana pe baithe baithe

fitna-e-chashm-e-fusun kar ne sone na diya

shab wo be kal rahe kakul mein phansa kar us ko

shor-o-fariyad-e-dil-e-zar ne sone na diya

tha shab-e-hijr mein ik khun ka dariya jari

ek pal dida-e-khun bar ne sone na diya

rat bhar khun-e-jigar ham ne kiya hai arif

fikr-e-rangini-e-ashar ne sone na diya

is tan zar pe ek bar-e-giran hai ye bhi

yar ke saya-e-diwar ne sone na diya

ab to kar dewen raha wo mujhe shayad ke unhen

meri zanjir ki jhankar ne sone na diya