رات واں گل کی طرح سے جسے خنداں دیکھا

رات واں گل کی طرح سے جسے خنداں دیکھا

صبح بلبل کی روش ہمدمِ افغاں دیکھا

کوئی بے جان جہاں میں نہیں جیتا لیکن

تیرے مہجور کو جیتے ہوئے بے جاں دیکھا

میں نے کیا جانئے کس ذوق سے دی جاں دمِ قتل

کہ بہت اس سے ستم گر کو پشیماں دیکھا

نہ ہوا یہ کہ کبھی اپنے گلے پر دیکھیں

یوں تو سو بار ترا خنجرِ براں دیکھا

اس طرف کو بھی نگہ تا سرِ مژگاں آئی

بارے کچھ کچھ اثرِ گریۂ پنہاں دیکھا

پانی پانی ہوئے مرقد پہ مرے آ کے وہ جب

شمع کو نعش پہ پروانے کی، گریاں دیکھا

rat wan gul ki tarah se jise khandan dekha

subh bulbul ki rawish hamdam-e-afghan dekha

koi be jan-e-jahan mein nahin jita lekin

tere mahjur ko jite hue be jan dekha

main ne kya janiye kis zauq se di jan dam-e-qatl

ke bahut us se sitam gar ko pasheman dekha

na hua ye ke kabhi apne gale par dekhen

yun to sau bar tira khanjar-e-burran dekha

is taraf ko bhi nigah ta sar-e-mizhgan ai

bare kuchh kuchh asar-e-girya-e-pinhan dekha

pani pani hue marqad pe mire a ke wo jab

shama ko naash pe parwane ki, giryan dekha