راز نہاں زبان اغیار تک نہ پہنچا

راز نہاں زبان اغیار تک نہ پہنچا

کیا ایک بھی ہمارا خط یار تک نہ پہنچا

اللہ رے نا توانی جب شدت قلق میں

بالیں سے سر اٹھایا دیوار تک نہ پہنچا

روتے تو رحم آتا سو اس کے روبرو تو

اک قطرہ خوں بھی چشم خوں بار تک نہ پہنچا

عاشق سے مت بیاں کر قتل عدو کا مژدہ

پیغام مرگ ہے یہ بیمار تک نہ پہنچا

بے بخت رنگ خوبی کس کام کا کہ میں تو

تھا گل ولے کسی کی دستار تک نہ پہنچا

مفت اول سخن میں عاشق نے جان دے دی

قاصد بیان تیرا اقرار تک نہ پہنچا

تھی خار راہ تیری مژگاں کی یاد پھر شب

تا صبح خواب چشم بیدار تک نہ پہنچا

بخت رسا عدو کے جو چاہے سو کہے اب

یک بار یار مجھ تک میں یار تک نہ پہنچا

غیروں سے اس نے ہرگز چھوڑی نہ ہاتھاپائی

جب تک اجل کا صدمہ دو چار تک نہ پہنچا

مومنؔ اسی نے مجھ سے دی برتری کسی کو

جو پست فہم میرے اشعار تک نہ پہنچا

raz-e-nihan zaban-e-aghyar tak na pahuncha

kya ek bhi hamara khat-e-yar tak na pahuncha

allah re na tawani jab shiddat-e-qalaq mein

balin se sar uthaya diwar tak na pahuncha

rote to rahm ata so us ke rubaru to

ik qatra khun bhi chashm-e-khun bar tak na pahuncha

ashiq se mat bayan kar qatl-e-adu ka muzhda

paigham-e-marg hai ye bimar tak na pahuncha

be bakht rang-e-khubi kis kam ka ke main to

tha gul wale kisi ki dastar tak na pahuncha

muft awwal-e-sukhan mein ashiq ne jan de di

qasid bayan tera iqrar tak na pahuncha

thi khar-e-rah teri mizhgan ki yad phir shab

ta subh khwab chashm-e-bedar tak na pahuncha

bakht-e-rasa adu ke jo chahe so kahe ab

yak bar-e-yar mujh tak main yar tak na pahuncha

ghairon se us ne hargiz chhori na hathupai

jab tak ajal ka sadma do char tak na pahuncha

momin usi ne mujh se di bartari kisi ko

jo past fahm mere ashar tak na pahuncha