دیتا ہوں دل جسے وہ کہیں بے وفا نہ ہو — جمیلہ خدا بخش

Arooz is now on the App Store, for iPhone and iPad. Download →

جمیلہ خدا بخش

دیتا ہوں دل جسے وہ کہیں بے وفا نہ ہو

یہ عشق میرے واسطے شاید قضا نہ ہو

دور اپنے در سے تم نہ کرو اے صنم اسے

جس کو ذرا جہاں میں کہیں آسرا نہ ہو

راحت سے مجھ کو نیند تو آئی مزار میں

پہلو کو میرے چیر کے دل چل بسا نہ ہو

مرنے کے بعد بھی یہی دھڑکا رہا کیا

مل کر صبا سے خاک ہماری ہوا نہ ہو

شکوہ کروں تو یار کا پر خوف ہے یہی

نازک مزاج ہے وہ یہ سن کر خفا نہ ہو

پردے سے دل کے بات جو کرتا ہے مجھے سے اب

آتا ہے یہ خیال کہیں خود خدا نہ ہو

رنگت ہے زرد رخ کی تو خشکی لبوں پر ہے

آثار عشق کے ہیں کہیں دل لگا نہ ہو

مر جاؤں اے جمیلہؔ اگر عشق غوث میں

ممکن نہیں کہ خاک لحد کیمیا نہ ہو