دیر میں یا حرم میں گزرے گی

دیر میں یا حرم میں گزرے گی

عمر تیرے ہی غم میں گزرے گی

کچھ امید کرم میں گزری عمر

کچھ امید کرم میں گزرے گی

زندگی یاد دوست ہے یعنی

زندگی ہے تو غم میں گزرے گی

اب کرم کا یہ ماحصل ہے کہ عمر

یاد عہد ستم میں گزرے گی

دل کو شوق نشاط وصل نہ چھیڑ

غم میں گزری ہے غم میں گزرے گی

حسرت دم بدم میں گزری عمر

عبرت دم بدم میں گزرے گی

حشر کہتے ہیں جس کو اے فانیؔ

وہ گھڑی شرح غم میں گزرے گی

der mein ya haram mein guzregi

umr tere hi gham mein guzregi

kuchh ummid-e-karam mein guzri umar

kuchh ummid-e-karam mein guzregi

zindagi yad-e-dost hai yaani

zindagi hai to gham mein guzregi

ab karam ka ye mahasal hai ke umr

yad-e-ahd-e-sitam mein guzregi

dil ko shauq-e-nishat-e-wasl na chher

gham mein guzri hai gham mein guzregi

hasrat-e-dam badam mein guzri umar

ibrat-e-dam badam mein guzregi

hashr kahte hain jis ko ai fani

wo ghari sharh-e-gham mein guzregi