دیدار کی ہوس ہے نہ شوق وصال ہے

دیدار کی ہوس ہے نہ شوق وصال ہے

آزاد ہر خیال سے مست خیال ہے

کہہ دو یہ کوہ کن سے کہ مرنا نہیں کمال

مر مر کے ہجر یار میں جینا کمال ہے

فتویٰ دیا ہے مفتیٔ ابر بہار نے

توبہ کا خون بادہ کشوں کو حلال ہے

آنکھیں بتا رہی ہیں کہ جاگے ہو رات کو

ان ساغروں میں بوئے شراب وصال ہے

برساؤ تیر مجھ پہ مگر اتنا جان لو

پہلو میں دل ہے دل میں تمہارا خیال ہے

آنکھیں لڑا کے ان سے ہم آفت میں پڑ گئے

پلکوں کی ہر زبان پہ دل کا سوال ہے

بت کہہ دیا جو میں نے تو اب بولتے نہیں

اتنی سی بات کا تمہیں اتنا خیال ہے

میں دامن نیاز میں اشک چکیدہ ہوں

کوئی اٹھا کے دیکھ لے اٹھنا محال ہے

پوچھا جو ان سے جانتے ہو تم جلیلؔ کو

بولے کہ ہاں وہ شاعر نازک خیال ہے

didar ki hawas hai na shauq-e-wisal hai

azad har khayal se mast-e-khayal hai

kah do ye koh kin se ke marna nahin kamal

mar mar ke hijr-e-yar mein jina kamal hai

fatwa diya hai mufti-e-abr-e-bahar ne

tauba ka khun-e-bada kashon ko halal hai

ankhen bata rahi hain ke jage ho rat ko

in sagharon mein bu-e-sharab-e-wisal hai

barsau tir mujh pe magar itna jan lo

pahlu mein dil hai dil mein tumhara khayal hai

ankhen lara ke un se ham afat mein par gae

palkon ki har zaban pe dil ka sawal hai

but kah diya jo main ne to ab bolte nahin

itni si bat ka tumhen itna khayal hai

main daman-e-niyaz mein ashk-e-chukida hun

koi utha ke dekh le uthna muhal hai

puchha jo un se jante ho tum jalil ko

bole ke han wo shayar-e-nazuk khayal hai