دہن پر ہیں ان کے گماں کیسے کیسے

دہن پر ہیں ان کے گماں کیسے کیسے

کلام آتے ہیں درمیاں کیسے کیسے

زمین چمن گل کھلاتی ہے کیا کیا

بدلتا ہے رنگ آسماں کیسے کیسے

تمہارے شہیدوں میں داخل ہوئے ہیں

گل و لالہ و ارغواں کیسے کیسے

بہار آئی ہے نشہ میں جھومتے ہیں

مریدان پیر مغاں کیسے کیسے

عجب کیا چھٹا روح سے جامۂ تن

لٹے راہ میں کارواں کیسے کیسے

تپ ہجر کی کاہشوں نے کئے ہیں

جدا پوست سے استخواں کیسے کیسے

نہ مڑ کر بھی بے درد قاتل نے دیکھا

تڑپتے رہے نیم جاں کیسے کیسے

نہ گور سکندر نہ ہے قبر دارا

مٹے نامیوں کے نشاں کیسے کیسے

بہار گلستاں کی ہے آمد آمد

خوشی پھرتے ہیں باغباں کیسے کیسے

توجہ نے تیری ہمارے مسیحا

توانا کئے ناتواں کیسے کیسے

دل و دیدۂ اہل عالم میں گھر ہے

تمہارے لیے ہیں مکاں کیسے کیسے

غم و غصہ و رنج و اندوہ و حرماں

ہمارے بھی ہیں مہرباں کیسے کیسے

ترے کلک قدرت کے قربان آنکھیں

دکھائے ہیں خوش رو جواں کیسے کیسے

کرے جس قدر شکر نعمت وہ کم ہے

مزے لوٹتی ہے زباں کیسے کیسے

dahan par hain un ke guman kaise kaise

kalam ate hain darmiyan kaise kaise

zamin-e-chaman gul khilati hai kya kya

badalta hai rang-e-asman kaise kaise

tumhare shahidon mein dakhil hue hain

gul-o-lala-o-arghawan kaise kaise

bahar ai hai nasha mein jhumte hain

muridan pir-e-mughan kaise kaise

ajab kya chhuta ruh se jama-e-tan

lute rah mein karwan kaise kaise

tap-e-hijr ki kahishon ne kiye hain

juda post se ustukhwan kaise kaise

na mur kar bhi be dard qatil ne dekha

tarapte rahe nim jan kaise kaise

na gor-e-sikandar na hai qabr dara

mite namiyon ke nishan kaise kaise

bahar-e-gulistan ki hai amad amad

khushi phirte hain baghban kaise kaise

tawajjoh ne teri hamare masiha

tawana kiye natawan kaise kaise

dil-o-dida-e-ahl-e-alam mein ghar hai

tumhare liye hain makan kaise kaise

gham-o-ghussa-o-ranj-o-andoh-o-hirman

hamare bhi hain mehrban kaise kaise

tire kilk-e-qudrat ke qurban ankhen

dikhae hain khush ro jawan kaise kaise

kare jis qadar shukr-e-nemat wo kam hai

maze lautti hai zaban kaise kaise