ذرا دیکھنا خاکساری ہماری

ذرا دیکھنا خاکساری ہماری

ملی خاک میں خاک ساری ہماری

اسے حشر میں اے خضر دیکھ لیں گے

اگر زندگی ہے تمہاری ہماری

یہ کہتے ہیں مژگان تر کو دکھا کر

بجھی زہر میں ہے کٹاری ہماری

وبال جہاں ہیں یہ عالم کے اوپر

مرے پر بھی ہے لاش بھاری ہماری

ہمیں تم ہو روح رواں سے زیادہ

تمہیں کچھ نہیں جان پیاری ہماری

بہم رہ سکیں کس طرح آگ پانی

نبھے دوستی کیا تمہاری ہماری

مرے پر بھی اے شادؔ تقدیر بگڑی

کسی نے نہ عقبیٰ سنواری ہماری

zara dekhna khaksari hamari

mili khak mein khak sari hamari

use hashr mein ai khizar dekh lenge

agar zindagi hai tumhari hamari

ye kahte hain mizhgan-e-tar ko dikha kar

bujhi zahr mein hai katari hamari

wabal jahan hain ye alam ke upar

mire par bhi hai lash bhari hamari

hamen tum ho ruh-e-rawan se ziyada

tumhen kuchh nahin jan pyari hamari

baham rah saken kis tarah ag pani

nibhe dosti kya tumhari hamari

mire par bhi ai shad taqdir bigri

kisi ne na uqba sanwari hamari