دیکھیے گل کی محبت ہمیں کیا دیتی ہے

دیکھیے گل کی محبت ہمیں کیا دیتی ہے

بلبل زار یہ حسرت سے صدا دیتی ہے

تم سلامت رہو زندہ ہے تمہیں سے الفت

ہاتھ اٹھا کر تمہیں حسرت یہ دعا دیتی ہے

کیا کہوں آہ میں تم سے کہ محبت کیا ہے

یہ وہ شے ہے کہ جو انساں کو مٹا دیتی ہے

سچی الفت بھی عجب چیز ہے اللہ اللہ

جلوۂ یار کو ہر شے میں دکھا دیتی ہے

سر تسلیم تہ تیغ جھکا دے اپنا

یہ صدا دل سے مرے اس کی رضا دیتی ہے

وائے بربادئ قسمت کہ پس مرگ صبا

خاک عشاق جفا کش کی اڑا دیتی ہے

خانۂ دل میں جمیلہؔ یہی اس کی الفت

یاس و ارمان و تمنا کو بٹھا دیتی ہے

dekhiye gul ki mohabbat hamen kya deti hai

bulbul-e-zar ye hasrat se sada deti hai

tum salamat raho zinda hai tumhen se ulfat

hath utha kar tumhen hasrat ye dua deti hai

kya kahun ah mein tum se ke mohabbat kya hai

ye wo shai hai ke jo insan ko mita deti hai

sachchi ulfat bhi ajab chiz hai allah allah

jalwa-e-yar ko har shai mein dikha deti hai

sar-e-taslim tah-e-tegh jhuka de apna

ye sada dil se mire us ki raza deti hai

wae barbadi-e-qismat ke pas-e-marg-e-saba

khak ushshaq jafa kash ki ura deti hai

khana-e-dil mein jamilahu yahi us ki ulfat

yas-o-arman-o-tamanna ko bitha deti hai