رات اور ریل

پھر چلی ہے ریل اسٹیشن سے لہراتی ہوئی

نیم شب کی خامشی میں زیر لب گاتی ہوئی

ڈگمگاتی جھومتی سیٹی بجاتی کھیلتی

وادی و کہسار کی ٹھنڈی ہوا کھاتی ہوئی

تیز جھونکوں میں وہ چھم چھم کا سرود دل نشیں

آندھیوں میں مینہ برسنے کی صدا آتی ہوئی

جیسے موجوں کا ترنم جیسے جل پریوں کے گیت

ایک اک لے میں ہزاروں زمزمے گاتی ہوئی

نونہالوں کو سناتی میٹھی میٹھی لوریاں

نازنینوں کو سنہرے خواب دکھلاتی ہوئی

ٹھوکریں کھا کر لچکتی گنگناتی جھومتی

سر خوشی میں گھنگروؤں کی تال پر گاتی ہوئی

ناز سے ہر موڑ پر کھاتی ہوئی سو پیچ و خم

اک دلہن اپنی ادا سے آپ شرماتی ہوئی

رات کی تاریکیوں میں جھلملاتی کانپتی

پٹریوں پر دور تک سیماب جھلکاتی ہوئی

جیسے آدھی رات کو نکلی ہو اک شاہی برات

شادیانوں کی صدا سے وجد میں آتی ہوئی

منتشر کر کے فضا میں جا بجا چنگاریاں

دامن موج ہوا میں پھول برساتی ہوئی

تیز تر ہوتی ہوئی منزل بمنزل دم بہ دم

رفتہ رفتہ اپنا اصلی روپ دکھلاتی ہوئی

سینۂ کہسار پر چڑھتی ہوئی بے اختیار

ایک ناگن جس طرح مستی میں لہراتی ہوئی

اک ستارہ ٹوٹ کر جیسے رواں ہو عرش سے

رفعت کہسار سے میدان میں آتی ہوئی

اک بگولے کی طرح بڑھتی ہوئی میدان میں

جنگلوں میں آندھیوں کا زور دکھلاتی ہوئی

رعشہ بر اندام کرتی انجم شب تاب کو

آشیاں میں طائر وحشی کو چونکاتی ہوئی

یاد آ جائے پرانے دیوتاؤں کا جلال

ان قیامت خیزیوں کے ساتھ بل کھاتی ہوئی

ایک رخش بے عناں کی برق رفتاری کے ساتھ

خندقوں کو پھاندتی ٹیلوں سے کتراتی ہوئی

مرغ زاروں میں دکھاتی جوئے شیریں کا خرام

وادیوں میں ابر کے مانند منڈلاتی ہوئی

اک پہاڑی پر دکھاتی آبشاروں کی جھلک

اک بیاباں میں چراغ طور دکھلاتی ہوئی

جستجو میں منزل مقصود کی دیوانہ وار

اپنا سر دھنتی فضا میں بال بکھراتی ہوئی

چھیڑتی اک وجد کے عالم میں ساز سرمدی

غیظ کے عالم میں منہ سے آگ برساتی ہوئی

رینگتی مڑتی مچلتی تلملاتی ہانپتی

اپنے دل کی آتش پنہاں کو بھڑکاتی ہوئی

خودبخود روٹھی ہوئی بپھری ہوئی بکھری ہوئی

شور پیہم سے دل گیتی کو دھڑکاتی ہوئی

پل پہ دریا کے دما دم کوندتی للکارتی

اپنی اس طوفان انگیزی پہ اتراتی ہوئی

پیش کرتی بیچ ندی میں چراغاں کا سماں

ساحلوں پر ریت کے ذروں کو چمکاتی ہوئی

منہ میں گھستی ہے سرنگوں کے یکایک دوڑ کر

دندناتی چیختی چنگھاڑتی گاتی ہوئی

آگے آگے جستجو آمیز نظریں ڈالتی

شب کے ہیبت ناک نظاروں سے گھبراتی ہوئی

ایک مجرم کی طرح سہمی ہوئی سمٹی ہوئی

ایک مفلس کی طرح سردی میں تھراتی ہوئی

تیزئی رفتار کے سکے جماتی جا بجا

دشت و در میں زندگی کی لہر دوڑاتی ہوئی

ڈال کر گزرے مناظر پر اندھیرے کا نقاب

اک نیا منظر نظر کے سامنے لاتی ہوئی

صفحۂ دل سے مٹاتی عہد ماضی کے نقوش

حال و مستقبل کے دل کش خواب دکھلاتی ہوئی

ڈالتی بے حس چٹانوں پر حقارت کی نظر

کوہ پر ہنستی فلک کو آنکھ دکھلاتی ہوئی

دامن تاریکئ شب کی اڑاتی دھجیاں

قصر ظلمت پر مسلسل تیر برساتی ہوئی

زد میں کوئی چیز آ جائے تو اس کو پیس کر

ارتقائے زندگی کے راز بتلاتی ہوئی

زعم میں پیشانی صحرا پہ ٹھوکر مارتی

پھر سبک رفتاریوں کے ناز دکھلاتی ہوئی

ایک سرکش فوج کی صورت علم کھولے ہوئے

ایک طوفانی گرج کے ساتھ ڈراتی ہوئی

ایک اک حرکت سے انداز بغاوت آشکار

عظمت انسانیت کے زمزمے گاتی ہوئی

ہر قدم پر توپ کی سی گھن گرج کے ساتھ ساتھ

گولیوں کی سنسناہٹ کی صدا آتی ہوئی

وہ ہوا میں سیکڑوں جنگی دہل بجتے ہوئے

وہ بگل کی جاں فزا آواز لہراتی ہوئی

الغرض اڑتی چلی جاتی ہے بے خوف و خطر

شاعر آتش نفس کا خون کھولاتی ہوئی

phir chali hai rel isteshan se lahrati hui

nim shab ki khamushi mein zer-e-lab gati hui

dagmagati jhumti siti bajati khelti

wadi-o-kohsar ki thandi hua khati hui

tez jhonkon mein wo chham chham ka surud-e-dil nashin

andhiyon mein menh barasne ki sada ati hui

jaise maujon ka tarannum jaise jal pariyon ke git

ek ik le mein hazaron zamzame gati hui

naunihalon ko sunati mithi mithi loriyan

nazninon ko sunahre khwab dikhlati hui

thokaren kha kar lachakti gungunati jhumti

sar khushi mein ghungruon ki tal par gati hui

naz se har mor par khati hui so pech-o-kham

ik dulhan apni ada se ap sharmati hui

rat ki tarikiyon mein jhilmilati kanpti

patriyon par dur tak simab jhalkati hui

jaise adhi rat ko nikli ho ik shahi barat

shadiyanon ki sada se wajd mein ati hui

muntashir kar ke faza mein ja baja chingariyan

daman-e-mauj hawa mein phul barsati hui

tez tar hoti hui manzil bamanzil dam ba dam

rafta rafta apna asli rup dikhlati hui

sina-e-kohsar par charhti hui be ikhtiyar

ek nagin jis tarah masti mein lahrati hui

ik sitara tut kar jaise rawan ho arsh se

rifat-e-kohsar se maidan mein ati hui

ik bagule ki tarah barhti hui maidan mein

jangalon mein andhiyon ka zor dikhlati hui

raasha bar andam karti anjum-e-shab tab ko

ashiyan mein tair-e-wahshi ko chaunkati hui

yad a jae purane dewtaon ka jalal

un qayamat kheziyon ke sath bal khati hui

ek rakhsh-e-be inan ki barq raftari ke sath

khandaqon ko phandti tilon se katrati hui

murgh-e-zaron mein dikhati ju-e-shirin ka khiram

wadiyon mein abr ke manind mandlati hui

ik pahari par dikhati absharon ki jhalak

ik bayaban mein charagh-e-tur dikhlati hui

justuju mein manzil-e-maqsud ki diwana war

apna sar dhunti faza mein bal bikhariti hui

chherti ik wajd ke alam mein saz-e-sarmadi

ghaiz ke alam mein munh se ag barsati hui

rengti murti machalti tilmilati hanpti

apne dil ki atish-e-pinhan ko bharakiti hui

khudbakhud ruthi hui biphri hui bikhri hui

shor-e-paiham se dil-e-giti ko dharakiti hui

pal pe dariya ke dama dam kaundti lalkarti

apni is tufan angezi pe itrati hui

pesh karti bich naddi mein charaghan ka saman

sahilon par ret ke zarron ko chamkati hui

munh mein ghisti hai sarnigun ke yakayak daur kar

dandnati chikhti chingharti gati hui

age age justuju amez nazren dalti

shab ke haibat nak nazaron se ghabrati hui

ek mujrim ki tarah sahmi hui simti hui

ek muflis ki tarah sardi mein tharrati hui

tezi raftar ke sake jamati ja baja

dasht-o-dar mein zindagi ki lahr dauriti hui

dal kar guzre manazir par andhere ka naqab

ik naya manzar nazar ke samne lati hui

safha-e-dil se mitati ahd-e-mazi ke nuqush

hal-o-mustaqbil ke dil kash khwab dikhlati hui

dalti be his chatanon par hiqarat ki nazar

koh par hansti falak ko ankh dikhlati hui

daman-e-tariki-e-shab ki urati dhajjiyan

qasr-e-zulmat par musalsal tir barsati hui

zad mein koi chiz a jae to us ko pais kar

irtiqa-e-zindagi ke raz batlati hui

zaam mein peshani sahra pe thokar marti

phir subuk raftariyon ke naz dikhlati hui

ek sarkash fauj ki surat alam khole hue

ek tufani garaj ke sath darati hui

ek ik harkat se andaz-e-baghawat ashkar

azmat insaniyat ke zamzame gati hui

har qadam par top ki si ghin garaj ke sath sath

goliyon ki sansanahat ki sada ati hui

wo hawa mein saikron jangi duhul bajte hue

wo bigul ki jan faza awaz lahrati hui

algharaz urti chali jati hai be khauf-o-khatar

shayar-e-atish nafas ka khun kholiti hui