دیکھیں تجھے نہ آویں گے ہم

دیکھیں تجھے نہ آویں گے ہم

کہنا نہیں کر دکھاویں گے ہم

یہ جور کوئی اٹھاوے کب تک

اٹھ در ہی سے تیرے جاویں گے ہم

گھر سے مجھے مت نکال سن رکھ

جاویں گے تو پھر نہ آویں گے ہم

تو قطع نظر تو ہم سے کر دیکھ

نظروں سے تجھے گراویں گے ہم

دو دن کبھو ترے گھر نہ آویں

گھر اپنے تجھے بلاویں گے ہم

گھر اس کا تو ڈھونڈ کر کے پایا

یارب اسے گھر بھی پاویں گے ہم

اغماض کرے ہے سب سمجھ کر

کیا حال اسے سناویں گے ہم

بوسے تو دیے ہیں تیں تو ہنس ہنس

گالی تری کیوں نہ کھاویں گے ہم

اتنی بھی پکا نہ میری چھاتی

اے غیر تجھے رجھاویں گے ہم

دل وہ تجھے پوچھے یا نہ پوچھے

پر یاد تری دلاویں گے ہم

تاب اس کی جفاؤں کی کسی طرح

حسرتؔ اب تو نہ لاویں گے ہم

dekhen tujhe na awenge ham

kahna nahin kar dikhawenge ham

ye jaur koi uthawe kab tak

uth dar hi se tere jawenge ham

ghar se mujhe mat nikal sun rakh

jawenge to phir na awenge ham

tu qat-e-nazar to ham se kar dekh

nazron se tujhe girawenge ham

do din kabhu tire ghar na awen

ghar apne tujhe bulawenge ham

ghar us ka to dhund kar ke paya

yarab use ghar bhi pawenge ham

aghmaz kare hai sab samajh kar

kya hal use sunawenge ham

bose to diye hain tin to hans hans

gali tiri kyun na khawenge ham

itni bhi paka na meri chhati

ai ghair tujhe rijhawenge ham

dil wo tujhe puchhe ya na puchhe

par yad tiri dilawenge ham

tab us ki jafaon ki kisi tarah

hasrat ab to na lawenge ham