ذوق سرمستی کو محو روئے جاناں کر دیا

ذوق سرمستی کو محو روئے جاناں کر دیا

کفر کو اس طرح چمکایا کہ ایماں کر دیا

تو نے یہ اعجاز کیا اے سوز پنہاں کر دیا

اس طرح پھونکا کہ آخر جسم کو جاں کر دیا

جس پہ میری جستجو نے ڈال رکھے تھے حجاب

بے خودی نے اب اسے محسوس و عریاں کر دیا

کچھ نہ ہم سے ہو سکا اس اضطراب شوق میں

ان کے دامن کو مگر اپنا گریباں کر دیا

گو نہیں رہتا کبھی پردے میں راز عاشقی

تم نے چھپ کر اور بھی اس کو نمایاں کر دیا

رکھ دیے دیر و حرم سر مارنے کے واسطے

بندگی کو بے نیاز کفر و ایماں کر دیا

عارض نازک پہ ان کے رنگ سا کچھ آ گیا

ان گلوں کو چھیڑ کر ہم نے گلستاں کر دیا

ان بتوں کی صورت زیبا کو اصغرؔ کیا کہوں

پر خدا نے وائے ناکامی مسلماں کر دیا

zauq-e-sarmasti ko mahw-e-roe janan kar diya

kufr ko is tarah chamkaya ke iman kar diya

tu ne ye ejaz kya ai soz-e-pinhan kar diya

is tarah phunka ke akhir jism ko jan kar diya

jis pe meri justuju ne dal rakhe the hijab

be khudi ne ab use mahsus-o-uryan kar diya

kuchh na ham se ho saka is iztirab-e-shauq mein

un ke daman ko magar apna gareban kar diya

go nahin rahta kabhi parde mein raz-e-ashiqi

tum ne chhup kar aur bhi us ko numayan kar diya

rakh diye dair-o-haram sar marne ke waste

bandagi ko be niyaz-e-kufr-o-iman kar diya

ariz-e-nazuk pe un ke rang sa kuchh a gaya

in gulon ko chher kar ham ne gulistan kar diya

un buton ki surat-e-zeba ko asghar kya kahun

par khuda ne wae nakami musalman kar diya