دکھاتی ہے دل پھر محبت کسی کی

دکھاتی ہے دل پھر محبت کسی کی

کہ آنکھوں میں پھرتی ہے صورت کسی کی

نہ پوچھو یہ ہیں سکۂ داغ کس کے

یہ دولت ملی ہے بدولت کسی کی

پر ارمان احباب دنیا سے اٹھے

فلک نے نکالی نہ حسرت کسی کی

یہ عالم ہے اپنا کہ کہتا ہے عالم

الٰہی نہ ہو ایسی حالت کسی کی

عجب بے مروت سے پالا پڑا ہے

کہاں تک کرے کوئی منت کسی کی

اڑا لے گئی سرو سے قمریوں کو

قیامت ہے بوٹا سی قامت کس کی

میں اس دل کا ساتھی نہیں عاشقی میں

بلا میری لے سر پر آفت کسی کی

نظر میں ہیں یاران رفتہ کے جلسے

خوش آتی نہیں مجھ کو صحبت کسی کی

وہ کیا دن تھے اے دل تجھے یاد ہے کچھ

وہ میری خوشامد وہ نخوت کسی کی

بہت بد ہے اے عشق سرکار تیرے

نہ عزت کسی کی نہ حرمت کسی کی

شکنجے میں رہتا ہے دل آدمی کا

خدا بند رکھے نہ حاجت کسی کی

کہے مجھ کو جو جس کا جی چاہے لیکن

کبھی مجھ سے ہوگی نہ غیبت کسی کی

عبث بحرؔ مرتے ہو تم ہر کسی پر

مبارک نہیں تم کو چاہت کسی کی

dikhati hai dil phir mohabbat kisi ki

ke ankhon mein phirti hai surat kisi ki

na puchho ye hain sikka-e-dagh kis ke

ye daulat mili hai badaulat kisi ki

par arman ahbab duniya se uthe

falak ne nikali na hasrat kisi ki

ye alam hai apna ke kahta hai alam

ilahi na ho aisi halat kisi ki

ajab be murawwat se pala para hai

kahan tak kare koi minnat kisi ki

ura le gai sarw se qamariyon ko

qayamat hai buta si qamat kis ki

main is dil ka sathi nahin ashiqi mein

bala meri le sar par afat kisi ki

nazar mein hain yaran-e-rafta ke jalse

khush ati nahin mujh ko sohbat kisi ki

wo kya din the ai dil tujhe yad hai kuchh

wo meri khushamad wo nakhwat kisi ki

bahut bad hai ai ishq sarkar tere

na izzat kisi ki na hurmat kisi ki

shikanje mein rahta hai dil admi ka

khuda band rakhe na hajat kisi ki

kahe mujh ko jo jis ka ji chahe lekin

kabhi mujh se hogi na ghibat kisi ki

abas bahr marte ho tum har kisi par

mubarak nahin tum ko chahat kisi ki