دکھلا دو نقش پائے رسول امین کو

دکھلا دو نقش پائے رسول امین کو

تا مشق سجدہ ہو مرے لوح جبین کو

اے آہ دل جو جاوے تو عرش برین کو

کہیو سلام عیسیٰ گردوں نشین کو

بل بے شرار اشک کی گرمی کہ اب تلک

اک آگ لگ رہی ہے مری آستین کو

تھا میں کمین بوسہ میں بولے اسی لیے

اشراف منہ لگاتے نہیں ہیں کمین کو

جب میں ہنسوں گا آپ سے رو دیجئے گا نہ

پھر تم بہت ہو چھیڑتے اس کمترین کو

کہتی ہو کیا رقیب کو بھیجوں بتا صلاح

لعنت ہی بھیجئے گا یزید لعین کو

دیکھوں ہوں گر الف کو تو اے دل ہزار بار

کرتا ہوں یاد تیرے قد دل نشین کو

آوے نظر جو لام تو آوے خیال زلف

جب سین پڑھ کے دیکھوں ہوں دنداں مسین کو

کرتا ہوں تیری الفت دنداں میں سین سین

یاں تک کہ پہنچا ہوں میں دم واپسین کو

تبدیل بحر سے وہ غزل پڑھ بآب و تاب

احساںؔ خوشی ہو جس سے دل سامعین کو

dikhla do naqsh-e-pae rasul-e-amin ko

ta mashq-e-sajda ho mire lauh-e-jabin ko

ai ah dil jo jawe to arsh-e-barin ko

kahiyo salam isa gardun nashin ko

bal be sharar ashk ki garmi ke ab talak

ik ag lag rahi hai miri astin ko

tha main kamin-e-bosa mein bole isi liye

ashraf munh lagate nahin hain kamin ko

jab main hansunga ap se ro dijiye ga na

phir tum bahut ho chherte is kamtarin ko

kahti ho kya raqib ko bhejun bata salah

laanat hi bhejiyega yazid-e-lain ko

dekhun hun gar alif ko to ai dil hazar bar

karta hun yad tere qad-e-dil nashin ko

awe nazar jo lam to awe khayal-e-zulf

jab sain parh ke dekhun hun dandan misyun ko

karta hun teri ulfat-e-dandan mein sain sain

yan tak ke pahuncha hun main dam wapasyun ko

tabdil bahr se wo ghazal parh bab-o-tab

ehsan khushi ho jis se dil-e-samiin ko