دکھاتے ہیں جو یہ صنم دیکھتے ہیں

دکھاتے ہیں جو یہ صنم دیکھتے ہیں

خدا کی خدائی کو ہم دیکھتے ہیں

یہ حیوان ہے دست طالع پہ بھاری

نئے جانور کا قدم دیکھتے ہیں

زن و خویش و فرزند و دولت سے چھوٹے

نہ دیکھے کوئی جو کہ ہم دیکھتے ہیں

شہنشاہ ہم ہیں دلوں پر ہیں حاکم

گدا تم کو اے ذی حشم دیکھتے ہیں

فقط ہاتھ کالے نہیں بلکہ منعم

دلوں پر بھی داغ ورم دیکھتے ہیں

کہاں تک اترتی ہے سینے پہ میرے

تری تیغ ابرو کا دم دیکھتے ہیں

بھگاتی ہے مار سیہ گو کہ ہم کو

تری زلف مشکیں کا سم دیکھتے ہیں

زمیں پر بھی دیتا نہیں چین ہم کو

فلک تجھ سے جور و ستم دیکھتے ہیں

در اشک سے میرا بھرتی ہے دامن

سخی تجھ کو اے چشم نم دیکھتے ہیں

نہ رنج اور نہ شادی توسط ہے ہم کو

کہ عیش و الم بھی بہم دیکھتے ہیں

کسی ماہ نے اس کو دھوکا دیا ہے

ہم اخترؔ کو کیوں پر الم دیکھتے ہیں

dikhate hain jo ye sanam dekhte hain

khuda ki khudai ko ham dekhte hain

ye haiwan hai dast-e-tale pe bhari

nae janwar ka qadam dekhte hain

zan-o-khwesh-o-farzand-o-daulat se chhote

na dekhe koi jo ke ham dekhte hain

shahanshah ham hain dilon par hain hakim

gada tum ko ai zi hasham dekhte hain

faqat hath kale nahin balke munam

dilon par bhi dagh-e-waram dekhte hain

kahan tak utarti hai sine pe mere

tiri tegh-e-abru ka dam dekhte hain

bhagati hai mar-e-siyah go ke ham ko

tiri zulf-e-mushkin ka sam dekhte hain

zamin par bhi deta nahin chain ham ko

falak tujh se jaur-o-sitam dekhte hain

dar-e-ashk se mera bharti hai daman

sakhi tujh ko ai chashm-e-nam dekhte hain

na ranj aur na shadi tawassut hai ham ko

ke aish-o-alam bhi baham dekhte hain

kisi mah ne us ko dhoka diya hai

ham akhtar ko kyun par alam dekhte hain