دکھلائے خدا اس ستم ایجاد کی صورت

دکھلائے خدا اس ستم ایجاد کی صورت

استادہ ہیں ہم باغ میں شمشاد کی صورت

یاد آتی ہے بلبل پہ جو بیداد کی صورت

رو دیتا ہوں میں دیکھ کے صیاد کی صورت

آزاد ترے اے گل تر باغ جہاں میں

بے جاہ و حشم شاد ہیں شمشاد کی صورت

جو گیسوئے جاناں میں پھنسا پھر نہ چھٹا وہ

ہیں قید میں پھر خوب ہے میعاد کی صورت

کھینچیں گے مرے آئینہ رخسار کی تصویر

دیکھے تو کوئی مانی و بہزاد کی صورت

گالی کے سوا ہاتھ بھی چلتا ہے اب ان کا

ہر روز نئی ہوتی ہے بیداد کی صورت

کس طرح امانتؔ نہ رہوں غم سے میں دلگیر

آنکھوں میں پھرا کرتی ہے استاد کی صورت

dikhlae khuda us sitam ijad ki surat

istada hain ham bagh mein shamshad ki surat

yad ati hai bulbul pe jo bedad ki surat

ro deta hun main dekh ke sayyad ki surat

azad tire ai gul-e-tar bagh-e-jahan mein

be jah-o-hasham shad hain shamshad ki surat

jo gesu-e-janan mein phansa phir na chhuta wo

hain qaid mein phir khub hai miad ki surat

khinchenge mire aina rukhsar ki taswir

dekhe to koi mani-o-behzad ki surat

gali ke siwa hath bhi chalta hai ab un ka

har roz nai hoti hai bedad ki surat

kis tarah amanat na rahun gham se main dilgir

ankhon mein phira karti hai ustad ki surat