دوپٹا وہ گلنار دکھلا گئے

دوپٹا وہ گلنار دکھلا گئے

نئے سر سے پھر آگ بھڑکا گئے

تمہاری ضدوں سے ہم اکتا گئے

کسی روز سن لینا کچھ کھا گئے

ہماری فغاں سے نہ مانو برا

کہاں تک کریں ضبط گھبرا گئے

قفس سے چھٹے کن دنوں یا نصیب

کہ پتے بھی پھولوں کے مرجھا گئے

گئے میرے دشمن کے پھولوں میں وہ

مجھے غم کے کانٹوں میں الجھا گئے

ہمارے گل اندام کا ہے یہ رنگ

ذرا دھوپ میں نکلے سنولا گئے

یہ سر چوٹ فرقت کے صدمے رہی

بہت کاسۂ سر میں بال آ گئے

لحد میں گرے جب ہوا سر سفید

پڑی دھوپ ایسی کہ تیورا گئے

نہ پہنچی چمن تک خزاں آ گئی

دلوں کے کنول کھل کے کمھلا گئے

کسی کی وہ زلفیں جو یاد آ گئیں

مرے سینے پر سانپ لہرا گئے

فلک ابر کی طرح پھٹ جائے گا

مرے نالے جس روز ٹکرا گئے

ہر اک بات کی تہ سمجھنے لگے

بہت دور ہو ہم تمہیں پا گئے

ہوا دھوپ میں بھی نہ کم حسن یار

کنھیا بنے وہ جو سنولا گئے

نہ جوبن ابھرنے دیا ناز نے

دوپٹا جو سرکا تو شرما گئے

میاں بحرؔ کیوں چپکے چپکے ہو آج

جو میہمان آئے تھے وہ کیا گئے

dopatta wo gulnar dikhla gae

nae sar se phir ag bharka gae

tumhari zidon se ham ukta gae

kisi roz sun lena kuchh kha gae

hamari fughan se na mano bura

kahan tak karen zabt ghabra gae

qafas se chhute kin dinon ya nasib

ke patte bhi phulon ke murjha gae

gae mere dushman ke phulon mein wo

mujhe gham ke kanton mein uljha gae

hamare gul andam ka hai ye rang

zara dhup mein nikle sunola gae

ye sar chot furqat ke sadme rahi

bahut kasa-e-sar mein bal a gae

lahad mein gire jab hua sar safed

pari dhup aisi ke tewra gae

na pahunchi chaman tak khizan a gai

dilon ke kanwal khul ke kamhla gae

kisi ki wo zulfen jo yad a gain

mire sine par sanp lahra gae

falak abr ki tarah phat jaega

mire nale jis roz takra gae

har ik bat ki tah samajhne lage

bahut dur ho ham tumhen pa gae

hawa dhup mein bhi na kam husn yar

kunhayya bane wo jo sunola gae

na joban ubharne diya naz ne

dopatta jo sarka to sharma gae

miyan bahr kyun chupke chupke ho aj

jo mehman ae the wo kya gae