آستیں میں سانپ اک پلتا رہا

آستیں میں سانپ اک پلتا رہا

ہم یہ سمجھے حادثہ ٹلتا رہا

آپ تو اک بات کہہ کر چل دیے

رات بھر بستر مرا جلتا رہا

ایک غم سے کتنے غم پیدا ہوئے

دل ہمارا پھولتا پھلتا رہا

زندگی کی آس بھی کیا آس ہے

موج دریا پر دیا جلتا رہا

اک نظر تنکا بنی کچھ اس طرح

دیر تک آنکھیں کوئی ملتا رہا

یہ نشاں کیسے ہیں باقیؔ دیکھنا

کون دل کی راکھ پر چلتا رہا

astin mein sanp ik palta raha

ham ye samjhe hadisa talta raha

ap to ik bat kah kar chal diye

rat bhar bistar mira jalta raha

ek gham se kitne gham paida hue

dil hamara phulta phalta raha

zindagi ki as bhi kya as hai

mauj-e-dariya par diya jalta raha

ik nazar tinka bani kuchh is tarah

der tak ankhen koi milta raha

ye nishan kaise hain baqi dekhna

kaun dil ki rakh par chalta raha