دھوم تھی اپنی پارسائی کی

دھوم تھی اپنی پارسائی کی

کی بھی اور کس سے آشنائی کی

کیوں بڑھاتے ہو اختلاط بہت

ہم کو طاقت نہیں جدائی کی

منہ کہاں تک چھپاؤ گے ہم سے

تم کو عادت ہے خود نمائی کی

لاگ میں ہیں لگاؤ کی باتیں

صلح میں چھیڑ ہے لڑائی کی

ملتے غیروں سے ہو ملو لیکن

ہم سے باتیں کرو صفائی کی

دل رہا پائے بند الفت دام

تھی عبث آرزو رہائی کی

دل بھی پہلو میں ہو تو یاں کس سے

رکھئے امید دل ربائی کی

شہر و دریا سے باغ و صحرا سے

بو نہیں آتی آشنائی کی

نہ ملا کوئی غارت ایماں

رہ گئی شرم پارسائی کی

بخت ہم داستانی شیدا

تو نے آخر کو نارسائی کی

صحبت گاہ گاہی رشکی

تو نے بھی ہم سے بے وفائی کی

موت کی طرح جس سے ڈرتے تھے

ساعت آ پہنچی اس جدائی کی

زندہ پھرنے کی ہے ہوس حالیؔ

انتہا ہے یہ بے حیائی کی

dhum thi apni parsai ki

ki bhi aur kis se ashnai ki

kyun barhate ho ikhtilat bahut

ham ko taqat nahin judai ki

munh kahan tak chhupaoge ham se

tum ko adat hai khud numai ki

lag mein hain lagao ki baten

sulh mein chher hai larai ki

milte ghairon se ho milo lekin

ham se baten karo safai ki

dil raha pae band-e-ulfat dam

thi abas arzu rihai ki

dil bhi pahlu mein ho to yan kis se

rakhiye ummid-e-dil rabai ki

shahr-o-dariya se bagh-o-sahra se

bu nahin ati ashnai ki

na mila koi gharat-e-iman

rah gai sharm parsai ki

bakht ham dastani-e-shaida

tu ne akhir ko narasai ki

sohbat-e-gah gahi-e-rashki

tu ne bhi ham se be wafai ki

maut ki tarah jis se darte the

saat a pahunchi is judai ki

zinda phirne ki hai hawas hali

intiha hai ye be hayai ki