دوستی کا فریب ہی کھائیں

دوستی کا فریب ہی کھائیں

آؤ کاغذ کی ناؤ تیرائیں

ہم اگر رہروی کا عزم کریں

منزلیں کھنچ کے خود چلی آئیں

ہم کو آمادۂ سفر نہ کرو

راستے پر خطر نہ ہو جائیں

ہم سفر رہ گئے بہت پیچھے

آؤ کچھ دیر کو ٹھہر جائیں

مطربہ ایسا گیت چھیڑ کہ ہم

زندگی کے قریب ہو جائیں

ان بہاروں کی آبرو رکھ لو

مسکراؤ کہ پھول کھل جائیں

گیسوئے زیست کے یہ الجھاؤ

آؤ مل کر شکیبؔ سلجھائیں

dosti ka fareb hi khaen

ao kaghaz ki nao teraen

ham agar rahrawi ka azm karen

manzilen khinch ke khud chali aen

ham ko amada-e-safar na karo

raste pur khatar na ho jaen

ham safar rah gae bahut pichhe

ao kuchh der ko thahar jaen

mutriba aisa git chher ke ham

zindagi ke qarib ho jaen

in baharon ki abru rakh lo

muskurao ke phul khul jaen

gesu-e-zist ke ye uljhao

ao mil kar shakeb suljhaen