Arooz is now on the App Store, for iPhone and iPad. Download →

All poetry

دور تھے ہوش و حواس اپنے سے بھی بیگانہ تھا

Arzoo Lakhnavi (1873–1951)

دور تھے ہوش و حواس اپنے سے بھی بیگانہ تھا

ان کو بزم ناز تھی اور مجھ کو خلوت خانہ تھا

کھینچ لایا تھا یہ کس عالم سے کس عالم میں ہوش

اپنا حال اپنے لیے جیسے کوئی افسانہ تھا

چھوٹے چھوٹے دو ورق جل جل کے دفتر بن گئے

درس حسرت دے رہا تھا جو پر پروانہ تھا

جان کر وارفتہ ان کے چھیڑنے کی دیر تھی

پھر تو دل اک ہوش میں آیا ہوا دیوانہ تھا

ضوفشاں ہونے لگا جب دل میں حسن خود نما

پھر تو کعبہ آرزوؔ کعبہ نہ تھا بت خانہ تھا