دوستی میں تری بس ہم نے بہت دکھ جھیلے

دوستی میں تری بس ہم نے بہت دکھ جھیلے

کون نت اٹھ کے مری جان یہ پاپڑ بیلے

چولی مسکی ہے کھلے بند گریباں یہ پھٹا

کون سی جائے سے بن آئے میاں البیلے

میل تیرے کا کوئی ہم کو سجیلا نہ ملا

دیکھ ڈالے ہیں ہر اک شہر کے میلے ٹھیلے

ظلم کی رہتی ہے مجھ پر جو یہ لے لے دے دے

کائنات اپنی مرے پاس ہے جو کچھ لے لے

نوش فرماتے ہو باتوں میں مزے سے اکثر

دھیندس اور کدوہی اور کھیرے چچیندے کیلے

دل بھرا ہے تو کہو اور نہیں تو بسم اللہ

اور من مانتی دس لاکھ تو گالی دے لے

تیرے دھمکانے سے کوئی اظفریؔ دھمکے ہے گا

کھیل ایسے ہیں میاں ہم نے بہت سے کھیلے

dosti mein tiri bas ham ne bahut dukh jhele

kaun nit uth ke miri jan ye papar bele

choli maski hai khule band-e-gareban ye phata

kaun si jae se ban ae miyan albele

mel tere ka koi ham ko sajila na mila

dekh dale hain har ik shahr ke mele thele

zulm ki rahti hai mujh par jo ye le le de de

kainat apni mire pas hai jo kuchh le le

nosh farmate ho baton mein maze se aksar

dhendas aur kadwahi aur khaire chuchchinide kile

dil bhara hai to kaho aur nahin to bism allah

aur man manti das lakh to gali de le

tere dhamkane se koi azfari dhamke hai ga

khel aise hain miyan ham ne bahut se khele