دوستو دل کہیں زنہار نہ آنے پائے

دوستو دل کہیں زنہار نہ آنے پائے

دل کے ہاتھوں کوئی آزار نہ آنے پائے

کیجیے حسن پرستی مگر اس قید کے ساتھ

پیاری صورت پہ ذرا پیار نہ آنے پائے

خانۂ یار گھر آفت کا ہے اے رہ گیرو

جسم پر سایۂ دیوار نہ آنے پائے

اے جنوں تیرا زمانے میں رہے جب تک دور

ہوش میں عاشق سرشار نہ آنے پائے

آپ پر عقدۂ نازک کمری کھل جاتا

تا کمر گیسوئے خم دار نہ آنے پائے

چشم محبوب سے نرگس کو برابر نہ کرو

پاس بیمار کے بیمار نہ آنے پائے

بحرؔ کچھ غم نہ کرو دل کے جدا ہونے کا

اب بغل میں یہ بد اطوار نہ آنے پائے

dosto dil kahin zinhar na ane pae

dil ke hathon koi azar na ane pae

kijiye husn parasti magar is qaid ke sath

pyari surat pe zara pyar na ane pae

khana-e-yar ghar afat ka hai ai rah giro

jism par saya-e-diwar na ane pae

ai junun tera zamane mein rahe jab tak dur

hosh mein ashiq-e-sarshar na ane pae

ap par uqda-e-nazuk kamari khul jata

ta kamar gesu-e-kham dar na ane pae

chashm-e-mahbub se nargis ko barabar na karo

pas bimar ke bimar na ane pae

bahr kuchh gham na karo dil ke juda hone ka

ab baghal mein ye bad atwar na ane pae