دشت ایمن سے چلے کوئے بتاں تک پہنچے

دشت ایمن سے چلے کوئے بتاں تک پہنچے

تیرے دیوانے رموز دو جہاں تک پہنچے

بت کے راندے ہوئے اللہ کے ٹھکرائے ہوئے

آخر کار در پیر مغاں تک پہنچے

غم کو ہیں عار وہ آہیں کہ لبوں تک آئیں

دل پہ ہیں بار وہ شکوے کہ زباں تک پہنچے

مرحلے اور بھی ہیں جاں سے گزرنے کے سوا

عشق میں ہم نفسو کوئی کہاں تک پہنچے

ترے جلووں کی رسائی کا تماشا دیکھا

منزل دل سے چلے منزل جاں تک پہنچے

کاروان غم دل دشت جنوں سے گزرا

آج ہم غایت عمر گزراں تک پہنچے

عشق کا ساتھ دیا صدق و یقیں تک آئے

عقل سے کام لیا وہم و گماں تک پہنچے

اہل منصب نے کیا کور نگاہوں کو سلام

اہل دل بارگہہ دیدہ وراں تک پہنچے

جن کو رہنا تھا رہے ہم سخنوں کے ہم راہ

جن کو جانا تھا گئے بزم شہاں تک پہنچے

مل گئیں سب حرم و دیر کی راہیں آکر

شکر صد شکر کہ ہم شہر مغاں تک پہنچے

رہ گئے یار قتیل غم دوراں ہو کر

ہم سے کچھ سوختہ جاں کوئے بتاں تک پہنچے

پھر بہار آئی کہ ناگاہ اسیران غیور

ہم رہ شاخ قفس برق تپاں تک پہنچے

کچھ کرو چارہ گرو دل کی گراں جانی کا

شیشہ ٹوٹے تو کف شیشہ گراں تک پہنچے

تمہیں سچے کہ رہا رنگ تغافل یکساں

ہمیں جھوٹے کی خموشی سے فغاں تک پہنچے

اپنے احوال و مقامات سے میں واقف ہوں

وہ تو حالات ہیں جو اہل جہاں تک پہنچے

خوشنوائی کی ملی داد کہ میرے اشعار

مہ وشاں کج کلہاں خوش نگہاں تک پہنچے

میں نے رسماً جو کیا عشق بتاں سے انکار

کیا تبسم لب لعلین بتاں تک پہنچے

میری آنکھوں سے گریزاں ہیں وہ جلوے اب تک

عکس جن کے مرے آئینۂ جاں تک پہنچے

دامن یار کی منزل سے گزر کر آخر

دست عشاق سر تاجوراں تک پہنچے

چاند اترا مرے کاشانے میں عابدؔ کل رات

دیکھیے رات کی یہ بات کہاں تک پہنچے

dasht-e-eman se chale ku-e-butan tak pahunche

tere diwane rumuz-e-do jahan tak pahunche

but ke rande hue allah ke thukrae hue

akhir kar dar-e-pir-e-mughan tak pahunche

gham ko hain ar wo ahen ke labon tak aen

dil pe hain bar wo shikwe ke zaban tak pahunche

marhale aur bhi hain jan se guzarne ke siwa

ishq mein ham nafaso koi kahan tak pahunche

tire jalwon ki rasai ka tamasha dekha

manzil-e-dil se chale manzil-e-jan tak pahunche

karwan-e-gham-e-dil dasht-e-junun se guzra

aj ham ghayat-e-umr-e-guzran tak pahunche

ishq ka sath diya sidq-o-yaqin tak ae

aql se kam liya wahm-o-guman tak pahunche

ahl-e-mansab ne kiya kor nigahon ko salam

ahl-e-dil bargah-e-dida waran tak pahunche

jin ko rahna tha rahe ham sukhnon ke ham rah

jin ko jana tha gae bazm-e-shahan tak pahunche

mil gain sab haram-o-dair ki rahen akar

shukr-e-sad shukr ke ham shahr mughan tak pahunche

rah gae yar qatil-e-gham-e-dauran ho kar

ham se kuchh sokhta jan ku-e-butan tak pahunche

phir bahar ai ke nagah asiran-e-ghayur

ham rah-e-shakh-e-qafas barq-e-tapan tak pahunche

kuchh karo chara giro dil ki giran jani ka

shisha tute to kaf shisha giran tak pahunche

tumhen sachche ke raha rang-e-taghaful yaksan

hamen jhute ki khamoshi se fughan tak pahunche

apne ahwal-o-maqamat se main waqif hun

wo to halat hain jo ahl-e-jahan tak pahunche

khushnawai ki mili dad ke mere ashar

mah washan kaj kulahan khush nigahan tak pahunche

main ne rasma jo kiya ishq-e-butan se inkar

kya tabassum lab-e-laalyun butan tak pahunche

meri ankhon se gurezan hain wo jalwe ab tak

aks jin ke mire aina-e-jan tak pahunche

daman-e-yar ki manzil se guzar kar akhir

dast-e-ushshaq sar-e-tajwaran tak pahunche

chand utra mire kashane mein abid kal rat

dekhiye rat ki ye bat kahan tak pahunche