دعوت فکر

کس طرح ریت کے سمندر میں

کشتیٔ زیست ہے رواں سوچو

سن کے باد صبا کی سرگوشی

کیوں لرزتی ہیں پتیاں سوچو

پتھروں کی پناہ میں کیوں ہے

آئنہ ساز کی دکاں سوچو

اصل سرچشمۂ وفا کیا ہے

وجہ بے مہریٔ بتاں سوچو

ذوق تعمیر کیوں نہیں مٹتا

کیوں اجڑتی ہیں بستیاں سوچو

فکر سقراط ہے کہ زہر کا گھونٹ

باعث عمر جاوداں سوچو

لوگ معنی تراش ہی لیں گے

کوئی بے ربط داستاں سوچو

kis tarah ret ke samundar mein

kashti-e-zist hai rawan socho

sun ke bad-e-saba ki sargoshi

kyun larazti hain pattiyan socho

pattharon ki panah mein kyun hai

aina saz ki dukan socho

asl-e-sarchashma-e-wafa kya hai

wajh-e-be mehri-e-butan socho

zauq-e-taamir kyun nahin mitta

kyun ujarti hain bastiyan socho

fikr suqrat hai ke zahr ka ghunt

bais-e-umr-e-jawedan socho

log maani tarash hi lenge

koi be rabt dastan socho