دل آیا اس طرح آخر فریب ساز و ساماں میں

دل آیا اس طرح آخر فریب ساز و ساماں میں

الجھ کر جیسے رہ جائے کوئی خواب پریشاں میں

یہ مانا ذرے ذرے پر تمہاری مہر ازل سے ہے

مگر کیا میری گنجائش نہیں شہر خموشاں میں

پتہ اس کی نگاہ وحشت افزا کا لگانا ہے

نگاہیں وحشیوں کی دیکھتا پھرتا ہوں زنداں میں

یہی ہے روح کا جوہر تم آؤ گے تو نکلے گا

دم آخر رکا ہے ایک آنسو چشم گریاں میں

مری جمعیت خاطر کا ساماں حشر کیا کرتا

قیامت ہو گئی ترتیب اجزائے پریشاں میں

فروغ لالہ و گل کا تماشا دیکھنے والے

یہ میرے دل کی چوٹیں ہیں جو ابھری ہیں گلستاں میں

عزیزؔ آرائش گلشن کی کوئی انتہا بھی ہے

وہ محو سیر گل ہیں یا گلستاں ہے گلستاں میں

dil aya is tarah akhir fareb-e-saz-o-saman mein

ulajh kar jaise rah jae koi khwab-e-pareshan mein

ye mana zarre zarre par tumhari mehr-e-azal se hai

magar kya meri gunjaish nahin shahr-e-khamoshan mein

pata us ki nigah-e-wahshat afza ka lagana hai

nigahen wahshiyon ki dekhta phirta hun zindan mein

yahi hai ruh ka jauhar tum aoge to niklega

dam-e-akhir ruka hai ek ansu chashm-e-giryan mein

miri jamiyyat-e-khatir ka saman hashr kya karta

qayamat ho gai tartib ajza-e-pareshan mein

farogh-e-lala-o-gul ka tamasha dekhne wale

ye mere dil ki choten hain jo ubhri hain gulistan mein

aziz araish-e-gulshan ki koi intiha bhi hai

wo mahw-e-sair-e-gul hain ya gulistan hai gulistan mein