دعوے کو یار آگے معیوب کر چکے ہیں

دعوے کو یار آگے معیوب کر چکے ہیں

اس ریختے کو ورنہ ہم خوب کر چکے ہیں

مرنے سے تم ہمارے خاطر نچنت رکھیو

اس کام کا بھی ہم کچھ اسلوب کر چکے ہیں

حسن کلام کھینچے کیوں کر نہ دامن دل

اس کام کو ہم آخر محبوب کر چکے ہیں

ہنگامۂ قیامت تازہ نہیں جو ہوگا

ہم اس طرح کے کتنے آشوب کر چکے ہیں

رنگ پریدہ قاصد باد سحر کبوتر

کس کس کے ہم حوالے مکتوب کر چکے ہیں

تنکا نہیں رہا ہے کیا اب نثار کریے

آگے ہی ہم تو گھر کو جاروب کر چکے ہیں

ہر لحظہ ہے تزاید رنج و غم و الم کا

غالب کہ طبع دل کو مغلوب کر چکے ہیں

کیا جانیے کہ کیا ہے اے میرؔ وجہ ضد کی

سو بار ہم تو اس کو محجوب کر چکے ہیں

daawe ko yar age maayub kar chuke hain

is rekhte ko warna ham khub kar chuke hain

marne se tum hamare khatir nichant rakhiyo

is kam ka bhi ham kuchh uslub kar chuke hain

husn-e-kalam khinche kyun kar na daman-e-dil

is kam ko ham akhir mahbub kar chuke hain

hangama-e-qayamat taza nahin jo hoga

ham is tarah ke kitne ashob kar chuke hain

rang-e-parida qasid bad-e-sahar kabutar

kis kis ke ham hawale maktub kar chuke hain

tinka nahin raha hai kya ab nisar kariye

age hi ham to ghar ko jarub kar chuke hain

har lahza hai tazayud ranj-o-gham-o-alam ka

ghalib ke tab-e-dil ko maghlub kar chuke hain

kya janiye ke kya hai ai mir wajh zid ki

sau bar ham to us ko mahjub kar chuke hain