دل آتش ہجراں سے جلانا نہیں اچھا
بھارتیندو ہریش چندردل آتش ہجراں سے جلانا نہیں اچھا
اے شعلہ رخو آگ لگانا نہیں اچھا
کس گل کے تصور میں ہے اے لالہ جگر خوں
یہ داغ کلیجے پہ اٹھانا نہیں اچھا
آیا ہے عیادت کو مسیحا سر بالیں
اے مرگ ٹھہر جا ابھی آنا نہیں اچھا
سونے دے شب وصل غریباں ہے ابھی سے
اے مرغ سحر شور مچانا نہیں اچھا
تم جاتے ہو کیا جان مری جاتی ہے صاحب
اے جان جہاں آپ کا جانا نہیں اچھا
آ جا شب فرقت میں قسم تم کو خدا کی
اے موت بس اب دیر لگانا نہیں اچھا
پہنچا دے صبا کوچۂ جاناں میں پس مرگ
جنگل میں مری خاک اڑانا نہیں اچھا
آ جائے نہ دل آپ کا بھی اور کسی پر
دیکھو مری جاں آنکھ لڑانا نہیں اچھا
کر دوں گا ابھی حشر بپا دیکھیو جلاد
دھبا یہ مرے خوں کا چھڑانا نہیں اچھا
اے فاختہ اس سرو سہی قد کا ہوں شیدا
کو کو کی صدا مجھ کو سنانا نہیں اچھا
dil atish-e-hijran se jalana nahin achchha
ai shola rakhw ag lagana nahin achchha
kis gul ke tasawwur mein hai ai lala jigar khun
ye dagh kaleje pe uthana nahin achchha
aya hai ayadat ko masiha sar-e-balin
ai marg thahar ja abhi ana nahin achchha
sone de shab-e-wasl ghariban hai abhi se
ai murgh-e-sahar shor machana nahin achchha
tum jate ho kya jan miri jati hai sahab
ai jan-e-jahan ap ka jana nahin achchha
a ja shab-e-furqat mein qasam tum ko khuda ki
ai maut bas ab der lagana nahin achchha
pahuncha de saba kucha-e-janan mein pas-e-marg
jangal mein miri khak urana nahin achchha
a jae na dil ap ka bhi aur kisi par
dekho miri jan ankh larana nahin achchha
kar dunga abhi hashr bapa dekhiyo jallad
dhabba ye mire khun ka chhurana nahin achchha
ai fakhta is sarw sahi qad ka hun shaida
ko ko ki sada mujh ko sunana nahin achchha