دست عدو سے شب جو وہ ساغر لیا کیے

دست عدو سے شب جو وہ ساغر لیا کیے

کن حسرتوں سے خون ہم اپنا پیا کیے

شکر ستم نے اور بھی مایوس کر دیا

اس بات کا وہ غیر سے شکوہ کیا کیے

کب دل کے چاک کرنے کی فرصت ہمیں ملی

ناصح ہمیشہ چاک گریباں سیا کیے

تشبیہ دیتے ہیں لب جاں بخش یار سے

ہم مرتے مرتے نام مسیحا لیا کیے

ذکر وصال غیر و شب ماہ و بادہ سے

ایسے لیے گئے ہمیں طعنے دیا کیے

تھی لحظہ لحظہ ہجر میں اک مرگ نو نصیب

ہر دم خیال لب سے ترے ہم جیا کیے

طرز سخن کہے وہ مسلم ہے شیفتہؔ

دعوے زبان سے نہ کیے میں نے یا کیے

dast-e-adu se shab jo wo saghar liya kiye

kin hasraton se khun ham apna piya kiye

shukr-e-sitam ne aur bhi mayus kar diya

is bat ka wo ghair se shikwa kiya kiye

kab dil ke chak karne ki fursat hamen mili

naseh hamesha chak-e-gareban siya kiye

tashbih dete hain lab-e-jan bakhsh-e-yar se

ham marte marte nam masiha liya kiye

zikr-e-wisal-e-ghair-o-shab-e-mah-o-bada se

aise liye gae hamen taane diya kiye

thi lahza lahza hijr mein ik marg-e-nau nasib

har dam khayal lab se tire ham jiya kiye

tarz-e-sukhan kahe wo musallam hai shefta

daawe zaban se na kiye main ne ya kiye