دشت وغا میں نور خدا کا ظہور ہے

دشت وغا میں نور خدا کا ظہور ہے

ذروں میں روشنئ تجلئ طور ہے

اک آفتاب رخ کی ضیا دور دور ہے

کوسوں زمین عکس سے دریائے نور ہے

اللہ رے حسن طبقۂ عنبر سرشت کا

میدان کربلا ہے نمونہ بہشت کا

حیراں زمیں کے نور سے ہے چرخ لاجورد

مانند کہربا ہے رخ آفتاب زرد

ہے روکش فضائے ارم وادی نبرد

اٹھتا ہے خاک سے تتق نور جائے گرد

حیرت سے حاملان فلک ان کو تکتے ہیں

ذرے نہیں زمیں پہ ستارے چمکتے ہیں

ہے آب نہر صورت آئینہ جلوہ گر

تاباں ہے مثل چشمۂ خورشید ہر بھنور

لہریں بسان برق چمکتی ہیں سر بہ سر

پانی پہ مچھلیوں کی ٹھہرتی نہیں نظر

یہ آب و تاب ہے کہ گہر آب آب ہیں

دریا تو آسماں ہیں ستارے حباب ہیں

پرتو فگن ہوا جو رخ قبلۂ انام

مشہور ہو گئی وہ زمیں عرش احتشام

اور سنگ ریزے در نجف بن گئے تمام

صحرا کو مل گیا شرف وادی السلام

کعبہ سے اور نجف سے بھی عزت سوا ہوئی

خاک اس زمین پاک کی خاک شفا ہوئی

پھیلا جو نور مہر امامت دم زوال

ذروں سے واں کے آنکھ ملانا ہوا محال

سارے نہال فیض قدم سے ہوئے نہال

اختر بنے جو پھول تو شاخیں بنیں ہلال

پتے تمام آئینۂ نور ہو گئے

صحرا کے نخل سب شجر طور ہو گئے

غل تھا زہے حسین کی شوکت زہے وقار

گویا کھڑے ہیں جنگ کو محبوب کردگار

رخ سے عیاں ہے دبدبۂ شاہ ذو الفقار

ہے نور حق جبین منور سے آشکار

کیونکر چھپے نہ ماہ دوہفتہ حجاب سے

چودہ طبق میں نور ہے اس آفتاب سے

یہ روئے روشن اور یہ گیسوئے مشک فام

یاں شام میں تو صبح ہے اور صبح میں ہے شام

ہالے میں یوں نظر نہیں آتا ہے مہ تمام

قدرت خدا کی نور کا ظلمت میں ہے مقام

زلفوں میں جلوہ گر نہیں چہرہ جناب کا

ہے نصف شب میں آج ظہور آفتاب کا

قرباں کمان ابروئے مولا پہ جان و دل

گر ماہ نو کہیں تو ہے تشبیہ مبتذل

چشم غزال دشت ختن چشم سے خجل

دیکھا جسے کرم سے خطائیں ہوئیں بحل

پتلی بسان قبلہ نما بے قرار ہے

گریاں ہیں وہ یہ گردش لیل و نہار ہے

رخسار ہیں ضیا میں قمر سے زیادہ تر

جن پر ٹھہر سکی نہ کبھی شمس کی نظر

ریش مخضب اور یہ رخ شاہ بحر و بر

پیدا ہیں صاف معنی و اللیل و القمر

قرآن سے عیاں ہے بزرگی امام کی

کھائی قسم خدا نے اسی صبح و شام کی

کس منہ سے کیجئے لب جان بخش کا بیاں

چوسی جنہوں نے احمد مختار کی زباں

کیا در آب دار ہیں اس درج میں نہاں

گویا کہ موتیوں کا خزانہ ہے یہ دہاں

ذرے زمیں پہ عکس سے سارے چمک گئے

جس وقت یہ کھلے تو ستار چمک گئے

شمع حریم لم یزل تھا گلوئے شاہ

تاریک شب میں جیسے ہویدا ہو نور ماہ

اے چرخ بے مدار یہ کیسا ستم ہے آہ

شمشیر شمر اور محمد کی بوسہ گاہ

جس پر رسول ہونٹوں کو ملتے ہوں پیار سے

کٹ جائے کربلا میں وہ خنجر کی دھار سے

منظور یاں تھی مدح گلوئے شہ امم

یاد آ گئی مگر یہ حدیث غم و الم

مسجد میں جلوہ گر تھے رسول فلک حشم

ملتے تھے ذکر حق میں لب پاک دم بہ دم

روشن تھے بام و در رخ روشن کے نور سے

آئینہ بن گئی تھی زمیں تن کے نور سے

تھا جو ستوں کہ رکن رسالت کا تکیہ گاہ

کرسی بھی اس کی پشت کی تھی ڈھونڈھتی پناہ

تھا جس حصیر پر وہ دو عالم کا بادشاہ

حسرت سے عرش کرتا تھا اس فرش پر نگاہ

اوج زمیں بہشت بریں سے دو چند تھا

منبر کا نہ فلک سے بھی پایہ بلند تھا

اصحاب خاص گرد تھے انجم کی طرح سب

تاباں تھا بیچ میں وہ مہ ہاشمی لقب

سر پر ملک صفات مگس راں تھے دو عرب

جبریل تہ کیے ہوئے تھے زانوئے ادب

خادم بلال و قنبر گروں اساس تھا

نعلین اس کے پاس عصا اس کے پاس تھا

گیسو تھے وہ مفسر و اللیل اذا سجا

رخ سے عیاں تھے معنی و الشمس و الضحا

وہ ریش پاک اور رخ سردار انبیا

گویا دھرا تھا رحل پہ قرآں کھلا ہوا

اوڑھے سیہ عبا جو وہ عالم پناہ تھا

کعبہ کا صاف حاجیوں کو اشتباہ تھا

پہلو میں بادشاہ کے تھا جلوہ گر وزیر

سردار دیں علی ولی خلق کا امیر

دونوں جہاں میں کوئی نہ دونوں کا تھا نظیر

احمد تھے آفتاب تو حیدر مہ منیر

ظاہر میں ایک نور کا دو جا ظہور تھا

گر غور کیجیے تو وہی ایک نور تھا

مصروف وعظ و پند تھے سلطان مشرقین

جو گھر سے نکلے کھیلتے زہرا کے نور عین

نانا بغیر دونوں نواسوں کو تھا نہ چین

بڑھ جاتے تھے حسن کبھی آگے کبھی حسین

کہتے تھے دیکھیں کون قدم جلد اٹھاتا ہے

نانا کے پاس کون بھلا پہلے جاتا ہے

وہ گورے گورے چہروں پہ زلفیں ادھر ادھر

اختر سے وہ چمکتے ہوئے کان کے گہر

رشک ہلال طوق گلے غیرت قمر

ہیکل پہ نقش نام خدائے جلیل کے

تعویذ گردنوں پہ پر جبرئیل کے

مسجد میں آئے ہنستے ہوئے جب وہ گل بدن

خوشبو سے صحن مسجد جامع بنا چمن

تسلیم کو حسین سے پہلے جھکے حسن

خوش ہو کے مسکرانے لگے سرور زمن

بڑھ بڑھ کے خم سلام کو چھوٹے بڑے ہوئے

بیٹھے رہے رسول ملک اٹھ کھڑے ہوئے

بیٹوں کو تھا علی کا اشارہ کہ بیٹھ جاؤ

لازم نہیں کہ وعظ میں نانا کو تم ستاؤ

پھیلا کے ہاتھ بولے محمد کہ آؤ آؤ

شبیر نے کہا ہمیں پہلے گلے لگاؤ

بھائی حسن جو آپ کی گودی میں آئیں گے

ہم تم سے نانا جان ابھی روٹھ جائیں گے

بولے حسن کہ واہ ہمیں اور کریں نہ پیار

اقرار کے چکے ہیں شہنشاہ نام دار

بولے بہ چشم نم یہ حسین فلک وقار

دیکھیں تو کون کاندھے پہ ہوتا ہے اب سوار

سب سے سوا جو ہیں سو ہمیں ان کے پیارے ہیں

آگے نہ بڑھیے آپ کہ نانا ہمارے ہیں

بھائی سے تب کہا یہ حسن نے بہ التفات

بے وجہ ہم سے روٹھے ہو تم اے نکو صفات

نانا ہمارے کیا نہیں سلطان کائنات

ہوتی ہے ناگوار تمہیں تو ذرا سی بات

غصہ نہ اتنا چاہیئے خوش خو کے واسطے

مچلے تھے یوں ہی بچۂ آہو کے واسطے

یہ سن کے منہ علی کا لگے دیکھنے رسول

ہنس کر کہا یہ دونوں ہیں میرے چمن کے پھول

میں چاہتا ہوں ایک کی خاطر نہ ہو ملول

روئیں گے یہ تو گھر سے نکل آئے گی بتول

ہووے نہ رنج میرے کسی نور عین کو

تم لو حسن کو گود میں میں لوں حسین کو

شبر سے پھر اشارہ کیا ہو کے بے قرار

غصہ نہ کھاؤ پہلے تمہیں کو کریں گے پیار

پھر بولے دیکھ کر سوئے شبیر نامدار

آ اے حسین آ تری باتوں کے میں نثار

چھاتی سے ہم لگائیں گے جان اپنی جان کر

دیکھیں تو پہلے کون لپٹتا ہے آن کر

دوڑے یہ بات سن کے برابر وہ خوش سیر

پاس آئے آفتاب رسالت کے دو قمر

لپٹے حسین ہنس کے ادھر اور حسن ادھر

تھے پانوں زانوؤں پہ تو بالائے دوش سر

نانا کے ساتھ پیار میں دونوں کا ساتھ تھا

گردن میں ایک ان کا اور ان کا ہاتھ تھا

پھر پھر کے دیکھتے تھے شہنشاہ مشرقین

گہہ جانب حسن تو کبھی جانب حسین

بیٹھے جو زانوؤں پہ وہ زہرا کے نور عین

تھا تن کو لطف قلب کو راحت جگر کو چین

جھک جھک کے منہ رسول زمن چومنے لگے

ان کا گلا تو ان کا دہن چومنے لگے

شبیر چاہتے تھے کہ چومیں مرے بھی لب

پر کچھ گلے کے بوسوں کا کھلتا نہ تھا سبب

نانا کے منہ کے پاس یہ لاتے تھے منہ کو جب

جھک جھک کے چومتے تھے گلا سید عرب

بھائی کو دیکھ کر جو حسن مسکراتے تھے

غیرت سے ان کی آنکھوں میں آنسو بھر آتے تھے

اٹھے حسین زانوئے احمد سے خشمگیں

غصے سے رنگ زرد اور آنکھوں پہ آستیں

رخ پر پسینہ جسم میں رعشہ جبیں پہ چیں

پوچھا کدھر چلے تو یہ بولے کہیں نہیں

گھر میں اکیلے تیوری چڑھائے چلے گئے

دیکھا نہ پھر کے سر کو جھکائے چلے گئے

بیت الشرف میں آئے جو شبیر نام دار

کرتے کو منہ پہ رکھ کے لگے رونے زارزار

دوڑیں یہ کہہ کے فاطمہ زہرا جگر فگار

ہے ہے حسین کیا ہوا تو کیوں ہے اشک بار

تجھ کو رلا کے غم میں مجھے مبتلا کیا

قربان ہو گئی تجھے کس نے خفا کیا

میرا کلیجہ پھٹتا ہے اے دل ربا نہ رو

زہرا ہزار جان سے تجھ پہ فدا نہ رو

سر میں نہ درد ہو کہیں اے مہ لقا نہ رو

بس بس نہ رو حسین برائے خدا نہ رو

میری طرف تو دیکھو کہ بیتاب ہوتی ہوں

چادر سے منہ کو ڈھانپ کے لو میں بھی روتی ہوں

تو منہ تو کھول اے مرے شبیر خوش خصال

تر ہو گئے ہیں آنسوؤں سے گورے گورے گال

مل مل کے پشت دست سے آنکھ کرو نہ لال

سلجھاؤں آؤ الجھے ہوئے گیسوؤں کے بال

گھر سے گئے تھے ساتھ جدا ہو کے آئے ہو

سمجھی میں کچھ حسن سے خفا ہو کے آئے ہو

تم چپ رہو وہ گھر میں تو مسجد سے پھر کے آئیں

گزری میں کھیل سے مرے بچے کو کیوں رلائیں

ان سے نہ بولیو وہ تمہیں لاکھ گر منائیں

لو آؤ جانے دو تمہیں چھاتی سے ہم لگائیں

واری اگر حسن نے رلایا برا کیا

پوچھوں گی کیا نہ میں مرے پیارے نے کیا کیا

بولے حسین ہم تو ہیں اس بات پر خفا

نانا نے چومے بھائی کے ہونٹ اور مرا گلا

تم اماں جان منہ کو تو سونگھو مرے ذرا

کچھ بوئے ناگوار ہے میرے دہن میں کیا

بھائی کے لب سے اپنے لبوں کو ملاتے ہیں

اب ہم نہ جائیں گے ہمیں نانا رلاتے ہیں

منہ رکھ کے منہ پہ بولی یہ زہرا جگر فگار

بوئے گلاب آتی ہے اے میرے گلغدار

چوما اگر گلا تو خفا ہو نہ میں نثار

تم کو زباں چوساتے تھے محبوب کردگار

یہ مشک میں مہک نہ گل یاسمن میں ہے

خوش بو اسی دہن کی تمہارے دہن میں ہے

کہنے لگے حسین یہ ماں سے بہ چشم نم

کیا جانو تم حسن سے ہمیں چاہتے ہیں کم

یہ کیا انہیں پہ لطف و عنایت ہے دم بہ دم

معلوم ہو گیا انہیں پیارے نہیں ہیں ہم

رو رو کے آج جان ہم اپنی گنوائیں گے

پانی نہ اب پئیں گے نہ کھانے کو کھائیں گے

یہ بات سن کے ہو گیا زہرا کا رنگ فق

بولی پسر سے رو کے وہ بنت رسول حق

صدقے گئی کرو نہ کلیجے کو میرے شق

ہے ہے یہ کیا کہا مجھے ہوتا ہے اب قلق

میرا لہو بہے گا جو آنسو بہاؤ گے

کاہے کو ماں جیے گی جو کھانا نہ کھاؤگے

یہ کہہ کے اوڑھ لی سر پر نور پر ردا

موزے پہن کے گود میں شبیر کو لیا

در تک گئی جو گھر سے وہ دل بند مصطفا

فضہ نے بڑھ کے بوزر و سلماں کو دی صدا

پیش نبی حسین کو گودی میں لاتی ہیں

ہٹ جاؤ سب کہ فاطمہ مسجد میں آتی ہیں

اللہ رے آمد آمد زہرا کا بندوبست

ساتوں فلک تھے اوج شرافت سے جس کے پست

احمد کے گرد و پیش سے اٹھے خدا پرست

انساں تو کیا ملک کو نہ تھی قدرت نشست

آئیں تو شاد شاد رسول زمن ہوئے

گھر میں خدا کے ایک جگہ پنج تن ہوئے

تعظیم فاطمہ کو اٹھے سید البشر

دیکھا کہ چشم فاطمہ ہے آنسوؤں سے تر

غم تھے حسین دوش پہ ماں کے جھکائے سر

تھا اک ہلال مہر کے پہلو میں جلوہ گر

ماں کہتی تھی نہ رؤو مگر چپ نہ ہوتے تھے

آنکھیں تھیں بند ہچکیاں لے لے کے روتے تھے

گھبرا کے پوچھنے لگے محبوب ذو الجلال

روتا ہے کیوں حسین یہ کیا ہے تمہارا حال

بولیں بتول آج قلق ہے مجھے کمال

رویا ہے یہ حسین کہ آنکھیں ہیں دونوں لال

آتے ہیں ہنستے روتے ہوئے گھر میں جاتے ہیں

شفقت بھی آپ ہی کرتے ہیں آپ ہی رلاتے ہیں

ہاتھوں کو جوڑتی ہوں میں یا شاہ بحر و بر

شفقت کی اس کے حال پہ ہر دم رہے نظر

رونے سے اس کے ہوتا ہے ٹکڑے مرا جگر

مجھ فاقہ کش غریب کا پیارا ہے یہ پسر

حیدر سے پوچھیے مرے عسرت کے حال کو

کس کس دکھوں سے پالا ہے اس نونہال کو

اشک اس کے جتنے ٹپکے ہیں یا شاہ نیک خو

اتنا ہی گھٹ گیا ہے مرے جسم کا لہو

روئے ہیں پھوٹ پھوٹ کے یہ میرے رو بہ رو

تر ہو گیا ہے آنسوؤں سے چاند سا گلو

دیکھا نہ تھا یہ میں نے جو حال اس کا آج ہے

حضرت تو جانتے ہیں کہ نازک مزاج ہے

شفقت سے آج آپ نے چومے حسن کے لب

بوسہ لیا نہ ان کے لبوں کا یہ کیا سبب

رتبے میں دونوں ایک ہیں یا سرور عرب

میں سچ کہوں یہ سن کے مجھے بھی ہوا عجب

اس کو جو ہو خوشی تو دل اس کا بھی شاد ہو

چھوٹے سے چاہیئے کہ محبت زیاد ہو

آپ ان کے ناز اٹھاتے ہیں یا شاہ بحر و بر

پھر کس سے روٹھیں آپ سے روٹھیں نہ یہ اگر

اکثر انہیں چڑھایا ہے حضرت نے دوش پر

گیسو دئیے ہیں ننھے سے ہاتھوں میں بیشتر

روٹھے تھے یہ سو قدموں پہ سر دھرنے آئے ہیں

منہ کے نہ چومنے کا گلا کرنے آئے ہیں

یہ کہہ کے پھر حسین سے بولیں بہ چشم تر

لو جا کے اب نبی کے قدم پر جھکاؤ سر

آئے حسین ہاتھ جو ننھے سے جوڑ کر

بے اختیار رونے لگے سید البشر

رہ رہ کے دیکھتے تھے علی و بتول کو

نزدیک تھا قلق سے غش آئے رسول کو

تھی آنسوؤں سے ریش مبارک تمام نم

فرط بکا سے خاک پہ جھکتے تھے دم بہ دم

گاہے ستوں سے لگ کے ہوئے راست گاہ خم

ہر لحظہ اضطراب زیادہ تھا صبر کم

ہو سکتا تھا نہ ضبط شۂ مشرقین سے

روتے تھے بار بار لپٹ کر حسین سے

شبیر رو کے کہتے تھے نانا نہ روئیے

روئیں گے اب نہ ہم شۂ والا نہ روئیے

ہلنے لگے گا عرش معلےٰ نہ روئیے

پھٹتا ہے اب ہمارا کلیجہ نہ روئیے

سو بار دن میں ہم تو منہ اشکوں سے دھوتے ہیں

حضرت ہمارے رونے پہ کاہے کو روتے ہیں

گھبرا گئے علی ولی شاہ بحر و بر

کی عرض فاطمہ نے جھکا کے قدم پہ سر

بیٹی نثار ہو گئی یا سید البشر

کیا وجہ ہے جو آپ ہیں اس طرح نوحہ گر

جلدی بتائیے کہ مجھے تاب اب نہیں

رونا خدا کے دوست کا یہ بے سبب نہیں

حضرت کو علم غیب ہے یا شاہ انس و جاں

آئندہ و گزشتہ کا سب حال ہے عیاں

کیا آئی آج وحی خداوند دو جہاں

ہونا ہے جو حسین پہ مجھ سے کرو بیاں

فاقوں سے کاٹتی ہوں مصیبت جہان کی

کیوں بابا جان خیر تو ہے اس کی جان کی

بولے جگر کو تھام کے محبوب ذو الجلال

تجھ سے سنا نہ جائے گا اے فاطمہ یہ حال

کس منہ سے میں کہوں کہ قلق ہے مجھے کمال

زہرا شہید ہوئے ہوویں گے تیرے یہ دونوں لال

ماتم کی یہ خبر ابھی جبریل لائے تھے

سارے ملک حسین کے پرسے کو آئے تھے

الماس پی کے ہوئے گا بے جاں ترا حسن

یہ وجہ ہے کہ چومتا ہوں اس کا میں دہن

بھر جائے گا کلیجوں کے ٹکڑوں سے سب لگن

ہوگا زمردی ترے اس لال کا بدن

سوئے بہشت جب یہ جہاں سے سدھاریں گے

بد کیش تیر اس کے جنازے پہ ماریں گے

زہرا مجھے کلام کی طاقت نہیں ہے اب

حلق حسین چومنے کا کیا کہوں سبب

اک بن میں تین روز رہیں گے یہ تشنہ لب

کٹ جائے گا گلا یہی خنجر سے ہے غضب

نیزے پہ سر چڑھے گا ترے نور عین کا

گھوڑوں سے روند ڈالیں گے لاشہ حسین کا

روئے خبر یہ کہہ کے جو محبوب ذو المنن

گھبرا کے منہ حسین کا تکنے لگے حسن

زہرا پکاری ہائے لٹے گا مرا چمن

میں مر گئی دہائی ہے یا سرور زمن

یہ کیسی آگ ہے کہ مری کوکھ جل گئی

ہے ہے چھری کلیجے پہ زہرا کے چل گئی

فریاد یا نبی شۂ ابرار الغیاث

اے مرسلان حق کے مددگار الغیاث

اے بے کسوں کے وارث و سردار الغیاث

قدرت ہے سب طرح کی شۂ مشرقین کو

حضرت سے لوں گی اپنے حسن اور حسین کو

کس جرم پر یہ لال مرے قتل ہوں گے آہ

رو کر کہا رسول خدا نے کہ بے گناہ

کی عرض فاطمہ نے کہ اے عرش بارگاہ

بچوں کو میرے کیا نہ ملے گی کہیں پناہ

تلواریں کھینچ کھینچ کے ظالم جو آئیں گے

حضرت نہ کیا نواسوں کو اپنے بچائیں گے

آساں ہے کیا جو قتل کریں گے ستم شعار

کیا شیر حق کمر سے نہ کھینچیں گے ذو الفقار

اعدا پہ کیا چلے گا نہ دست خدا کا وار

بالوں کو کیا نہ کھولے گی زہرا جگر فگار

ٹکڑے جگر جو ہوئے گا مجھ دل دو نیم کا

پایہ نہ کیا ہلاؤں گی عرش عظیم کا

زہرا سے رو کے کہنے لگے شاہ نیک خو

بیٹی مجھے ستائیں گے تربت میں کینہ جو

اس وقت قتل ہوئیں گے یہ دونوں ماہ رو

دنیا میں جب نہ ہوگا علی اور نہ میں نہ تو

لاشے پہ مجتبیٰ کے تو شبیر روئے گا

شبیر جب مرے گا تو کوئی نہ ہوئے گا

چلائی سر پٹک کے یہ زہرا کہ ہے ستم

پیٹے گا کون تن سے جو نکلے گا اس کا دم

ماتم کی صف بچھائے گا کون اے شہ امم

پرسے کو کون آئے گا اس کے بہ چشم نم

ہم میں سے ایسے وقت جو کوئی نہ ہوئے گا

ہے ہے مرے حسین کو پھر کون روئے گا

بچے کی میرے تعزیہ داری کرے گا کون

منہ ڈھانپ ڈھانپ گریہ و زاری کرے گا کون

دریائے اشک چشم سے جاری کرے گا کون

امداد بعد مرگ ہماری کرے گا کون

ہوگا کہاں نبی کے نواسے کا فاتحہ

شربت پہ کون دیوے گا پیاسے کا فاتحہ

بولے نبی کہ آپ کو زہرا نہ کر ہلاک

فرما چکا ہے مجھ سے یہ وعدہ خدائے پاک

پیدا کریں گے قوم اک ایسی بہ روئے خاک

جو رات دن رہیں گے اسی غم میں درد ناک

بزم عزا میں آئیں گے وہ دور دور سے

تن خاک سے بنائیں گے دل ان کے نور سے

ہوگی انہیں سے مجلس ماتم کی زیب و زین

دیں گے انہیں وہ لب کہ رہے جس پہ وا حسین

آنکھیں وہ دیں گے رونے کو سمجھیں جو فرض عین

ہاتھ ایسے غیر سینہ زنی ہو جنہیں نہ چین

سامان تعزیت کے کبھی کم نہ ہوئیں گے

وہ حشر تک حسین کے ماتم میں روئیں گے

ہوگا عیاں فلک پہ محرم کا جب ہلال

رخت سیاہ پہنیں گے بر میں وہ خوش خصال

کھولیں گی بیبیاں بھی سب اپنے سروں کے بال

ہر گھر میں ہوگا شور کہ ہے ہے علی کا لال

لیں گے صلے میں خلد ترے نور عین سے

آنسو عزیز وہ نہ کریں گے حسین سے

پیاسا شہید ہوگا جو تیرا یہ دل ربا

مومن سبیلیں رکھیں گے پانی کی جا بجا

ہووے گی شاد روح شہیدان کربلا

بھر بھر کے آب سرد پکاریں گے برملا

محبوب کبریا کے نواسے کی نذر ہے

پیاسے نہ جائیو کہ یہ پیاسے کی نذر ہے

کہنے لگی نبی سے بتول فلک جناب

ہے ہے میں کیا کروں مرے دل کو نہیں ہے تاب

اے بادشاہ کون و مکاں مالک الرقاب

درگاہ حق میں آپ کی ہے عرض مستجاب

کیجے دعا کہ خالق اکبر مدد کرے

اللہ یہ بلا مرے بچے کی رد کرے

بیٹی سے رو کے کہنے لگے شاہ کائنات

روح الامیں نے مجھ سے تو یہ بھی کہی ہے بات

چاہو تو رد کرے یہ بلا رب پاک ذات

لیکن نہ ہوے گی مرے امت کی پھر نجات

محبوب حق نثار ترے نور عین پر

موقوف ہے یہ امر تو قتل حسین پر

اللہ رے صبر دختر محبوب کردگار

امت کا نام سن کے جھکایا سر ایک بار

خوشنود ہو کے کہنے لگے شاہ ذوالفقار

صدقے حسن حسین تصدق علی نثار

اس راہ میں نہ مال نہ دولت عزیز ہے

پیارے پسر نہیں ہمیں امت عزیز ہے

کہنے لگے حسین سے پھر شاہ بحر و بر

بتلا مجھے کہ کیا تری مرضی ہے اے پسر

نانا سے بولے چھوٹے سے ہاتھوں کو جوڑ کر

امت کے کام آئے تو حاضر ابھی ہے سر

وعدہ کو ہم نہ بھولیں گے گو خورد سال ہیں

چھوٹے نہیں ہیں مخبر صادق کے لال ہیں

روتے ہیں آپ کس لیے یا سید امم

راضی ہیں ہم پہ راہ خدا میں ہوں جو ستم

تلواریں بھی چلیں تو نہیں مارنے کے دم

امت پہ اپنے سر کو تصدق کریں گے ہم

ہم راست گو ہیں بات پہ جس وقت آتے ہیں

کہتے ہیں جو زباں سے وہی کر دکھاتے ہیں

بچپن میں جو زباں سے کہا تھا کیا وہ کام

جس وقت رن میں ٹوٹ پڑے شہ پہ فوج شام

گردن جھکا کے برچھیاں کھایا کیے امام

خوں میں قبا رسول کی تر ہو گئی تمام

تیغیں علی کے لال کے شانے پہ چل گئیں

چھاتی کے پار نیزوں کی نوکیں نکل گئیں

پھیری نہ تھی جو پشت مبارک دم مصاف

تھے دو ہزار زخم فقط سر سے تا بہ ناف

سید سے بے وطن سے زمانہ تھا بر خلاف

غل تھا کہ آج ہوتا ہے گھر فاطمہ کا صاف

سنبھلا نہ جائے گا خلف بو تراب سے

لو وہ قدم حسین کے نکلے رکاب سے

مینہ کی طرح برسنے لگے شاہ دیں پہ تیر

تھرا رہے تھے لگ کے تن نازنیں پہ تیر

دامن پہ تیر جیب پہ تیر آستیں پہ تیر

پہلو پہ تیغ سینہ پہ نیزہ جبیں پہ تیر

داغوں سے خوں کے رخت بدن لالہ زار تھا

شکل ضریح سینۂ اقدس فگار تھا

تر تھی لہو میں زلف شکن در شکن جدا

مجروح لعل لب تھے جدا اور دہن جدا

درپئے تھے نیزہ دار جدا تیغ زن جدا

کٹ کٹ کے ہو گیا تھا ہر اک عضو تن جدا

سی پارہ تھا نہ صدر فقط اس جناب کا

پرزے ورق ورق تھا خدا کی کتاب کا

کرتا تھا وار برچھیوں والوں کا جب پرا

تیغوں سے دم بھی لینے کی مہلت نہ تھی ذرا

نیزوں میں خوں نبی کے نواسے کا تھا بھرا

شمشیر و تیر نیزہ و خنجر کے ماورا

تھیں سختیاں ستم کی شہ خوش خصال پر

چلتے تھے سنگ فاطمہ زہرا کے لال پر

تھے دو ہزار جسم شۂ بحر و بر پہ زخم

ماتھے پہ زخم تیر کے تیغوں کے سر پہ زخم

گردن پہ زخم سینہ پہ زخم اور کمر پہ زخم

اور اس کے ماورا تھے بہتر جگر پہ زخم

گھوڑے پہ گہہ سنبھلتے تھے گہہ ڈگمگاتے تھے

غش آتا تھا تو ہرنے پہ سر کو جھکاتے تھے

گھوڑے پہ جب سنبھلنے کی مطلق رہی نہ تاب

ہاتھوں سے باگ چھوٹ گئی اور پاؤں سے رکاب

گرنے لگا جو خاک پہ وہ آسماں جناب

مرقد میں بے قرار ہوئی روح بو تراب

غل تھا کہ خاک پر شہ کون و مکاں گرا

بس اب زمیں الٹ گئی اور آسماں گرا

جلتی ہوئی زمیں پہ تڑپنے لگے امام

بے کس پہ ظالموں نے کیا اور اژدہام

اس وقت شمر سے یہ عمر نے کیا کلام

ہاں تن سے جلد کاٹ سر سرور انام

ڈریو نہ سن کے فاطمہ زہرا کی آہ کو

گل کر دے شمع قبر رسالت پناہ کو

یہ سنتے ہی چڑھائی ستمگر نے آستیں

خنجر کمر سے کھینچ کے آگے بڑھا لیں

تھے قبلہ رو جھکے ہوئے سجدے میں شاہ دیں

لب ہلتے دیکھے شاہ کے آیا وہ جب قریں

سمجھا کہ تشنگی سے جو صدمے گزرتے ہیں

اس وقت بد دعا مجھے شبیر کرتے ہیں

جھک کر قریب کان جو لایا تو یہ سنا

حق میں گناہ گاروں کے کرتے ہیں شہ دعا

جاری زبان خشک پہ یہ ہے کہ اے خدا

کر حاجتوں کو میرے محبوں کی تو روا

شیعوں کا حشر روز جزا میرے ساتھ ہو

میرا یہ خوں بہا ہے کہ ان کی نجات ہو

یہ سن کے مستعد ہوا وہ شہ کے قتل پر

زانو رکھا حسین کے سینے پہ بے خطر

گردن پہ پھیرنے لگا خنجر جو بد گہر

آئی صدا علی کی کہ ہے ہے مرے پسر

زہرا پکاری کچھ بھی نبی سے حجاب ہے

ظالم یہ بوسہ گاہ رسالت مآب ہے

کیوں ذبح میرے لال کو کرتا ہے بے گناہ

کیوں کاٹتا ہے میرے کلیجے کو رو سیاہ

کشتی کو اہل بیت نبی کی نہ کر تباہ

میں فاطمہ ہوں عرش ہلائے گی میری آہ

ہوئے گا حشر قتل جو یہ بے وطن ہوا

یہ مر گیا تو خاتمہ پنج تن ہوا

آواز اپنی ماں کی یہ زینب نے جب سنی

دوڑی نکل کے خیمے سے سر پیٹتی ہوئی

دیکھا کہ ذبح کرتا ہے حضرت کو وہ شقی

سر پیٹ کر یہ کہنے لگی وہ جگر جلی

ہے ہے نہ تین روز کے پیاسے کو ذبح کر

ظالم نہ مصطفی کے نواسے کو ذبح کر

بانو پکارتی تھی یہ کیا کرتا ہے لعیں

پیاسا ہے تین روز سے حیدر کا جا نشیں

چلاتی تھی سکینہ کہ جینے کی میں نہیں

بابا کو ذبح کرتا ہے کیوں اے عدوئے دیں

خنجر نہ پھیر چاند سی گردن پہ رحم کر

ابا کو چھوڑ دے مرے بچپن پہ رحم کر

زخموں سے چور چور ہے زہرا کا یادگار

جس چھاتی پر میں سوتی تھی اس پر ہے تو سوار

بابا کے حلق پر نہ پھرا اب چھری کی دھار

بدلے پدر کے سر کو مرے تن سے تو اتار

سید پہ تشنہ لب پہ ستم اس قدر نہ کر

پوتی ہوں فاطمہ کی مجھے بے پدر نہ کر

رو کر بیاں یہ کرتی تھی وہ سوختہ جگر

دے کر دہائی اہل حرم پیٹتے تھے سر

کرتا تھا ذبح شہ کو وہاں شمر بد گہر

فرماتے تھے یہ شاہ کہ پیاسا ہوں رحم کر

پانی دیا نہ ہائے نبی کے نواسے کو

جلاد ذبح کرنے لگا بھوکے پیاسے کو

آخر سر امام امم تن سے کٹ گیا

چلا کے فاطمہ نے یہ زینب کو دی صدا

میداں سے جلد لے کے سکینہ کو گھر میں جا

بے جرم کٹ گیا ترے ماں جائے کا گلا

مارا بظلم شمر نے پیاسے کو جان سے

میں لٹ گئی حسین سدھارے جہان سے

بس اے انیسؔ بزم میں ہے نالہ و فغاں

پوچھ ان کے دل سے جو ہیں سخن فہم نکتہ داں

حق ہے سنا نہیں کبھی اس حسن کا بیاں

گویا کہ یہ خلیق کی ہے سر بہ سر زباں

سچ ہے کہ اس زباں کو کوئی جانتا نہیں

جو جانتا ہے اور کو وہ مانتا نہیں

dasht-e-wagha mein nur-e-khuda ka zuhur hai

zarron mein raushni-e-tajalli-e-tur hai

ik aftab rukh ki ziya dur dur hai

koson zamin aks se dariya-e-nur hai

allah re husn tabqa-e-ambar sarisht ka

maidan-e-karbala hai namuna bahisht ka

hairan zamin ke nur se hai charkh-e-lajward

manind-e-kohrba hai rukh-e-aftab zard

hai rukash-e-faza-e-iram wadi-e-nabard

uthta hai khak se tutuq-e-nur jae gard

hairat se hamilan falak un ko takte hain

zarre nahin zamin pe sitare chamakte hain

hai ab-e-nahr surat-e-aina jalwa gar

taban hai misl-e-chashma-e-khurshid har bhanwar

lahren basan-e-barq chamakti hain sar ba sar

pani pe machhliyon ki thaharti nahin nazar

ye ab-o-tab hai ke guhar ab ab hain

dariya to asman hain sitare habab hain

partau fagan hua jo rukh-e-qibla-e-anam

mashhur ho gai wo zamin arsh ehtisham

aur sang reze dar-e-najaf ban gae tamam

sahra ko mil gaya sharaf wadi alssalam

kaaba se aur najaf se bhi izzat siwa hui

khak is zamin-e-pak ki khak-e-shifa hui

phaila jo nur-e-mehr imamat dam-e-zawal

zarron se wan ke ankh milana hua muhal

sare nihal-e-faiz-e-qadam se hue nihal

akhtar bane jo phul to shakhen banen hilal

patte tamam aina-e-nur ho gae

sahra ke nakhl sab shajar-e-tur ho gae

ghul tha zahe hasin ki shaukat zahe waqar

goya khare hain jang ko mahbub kirdagar

rukh se ayan hai dabdaba-e-shah zu alfaqar

hai nur-e-haq jabin-e-munawwar se ashkar

kyunkar chhupe na mah dohafta hijab se

chauda tabaq mein nur hai is aftab se

ye ru-e-raushan aur ye gesu-e-mushk fam

yan sham mein to subh hai aur subh mein hai sham

hale mein yun nazar nahin ata hai mah tamam

qudrat khuda ki nur ka zulmat mein hai maqam

zulfon mein jalwa gar nahin chehra janab ka

hai nisf-e-shab mein aj zuhur aftab ka

qurban kaman-e-abru-e-maula pe jan-o-dil

gar mah-e-nau kahin to hai tashbih mubtazal

chashm-e-ghazal-e-dasht-e-khutan chashm se khajil

dekha jise karam se khataen huin bahal

putli basan-e-qibla numa be qarar hai

giryan hain wo ye gardish-e-lail-o-nahar hai

rukhsar hain ziya mein qamar se ziyada tar

jin par thahar saki na kabhi shams ki nazar

rish makhzab aur ye rukh shah-e-bahr-o-bar

paida hain saf maani-o-alllail-o-alqamar

quran se ayan hai buzurgi imam ki

khai qasam khuda ne isi subh-o-sham ki

kis munh se kijiye lab jan bakhsh ka bayan

chusi jinhon ne ahmad-e-mukhtar ki zaban

kya dar-e-ab dar hain is darj mein nihan

goya ke motiyon ka khazana hai ye dahan

zarre zamin pe aks se sare chamak gae

jis waqt ye khule to sitar chamak gae

shama harim-e-lam yazal tha galo-e-shah

tarik shab mein jaise huwaida ho nur-e-mah

ai charkh-e-be madar ye kaisa sitam hai ah

shamshir-e-shimr aur mohammad ki bosa gah

jis par rasul honton ko milte hun pyar se

kat jae karbala mein wo khanjar ki dhar se

manzur yan thi madh galo-e-shah-e-umam

yad a gai magar ye hadis-e-gham-o-alam

masjid mein jalwa gar the rasul-e-falak hasham

milte the zikr-e-haq mein lab-e-pak dam ba dam

raushan the bam-o-dar rukh-e-raushan ke nur se

aina ban gai thi zamin tan ke nur se

tha jo sutun ke rukan risalat ka takiya gah

kursi bhi us ki pusht ki thi dhundhti panah

tha jis hasir par wo do alam ka badshah

hasrat se arsh karta tha is farsh par nigah

auj-e-zamin bahisht-e-barin se do chand tha

mimbar ka na falak se bhi paya buland tha

ashab-e-khas gard the anjum ki tarah sab

taban tha bich mein wo mah-e-hashimi laqab

sar par malak sifat magas ran the do arab

jibril tah kiye hue the zanu-e-adab

khadim bilal-o-qambar girun asas tha

naalain us ke pas asa us ke pas tha

gesu the wo mufassir-o-alllail aza saja

rukh se ayan the maani-o-alshshams-o-alzaha

wo rish-e-pak aur rukh-e-sardar ambiya

goya dhara tha rahal pe quran khula hua

orhe siyah aba jo wo alam panah tha

kaaba ka saf hajiyon ko ishtibah tha

pahlu mein badshah ke tha jalwa gar wazir

sardar den ali wali khalq ka amir

donon jahan mein koi na donon ka tha nazir

ahmad the aftab to haidar mah-e-munir

zahir mein ek nur ka do ja zuhur tha

gar ghaur kijiye to wahi ek nur tha

masruf-e-waaz-o-pand the sultan-e-mashriqain

jo ghar se nikle khelte zahra ke nur-e-ain

nana baghair donon nawason ko tha na chain

barh jate the husn kabhi age kabhi hasin

kahte the dekhen kaun qadam jald uthata hai

nana ke pas kaun bhala pahle jata hai

wo gore gore chehron pe zulfen idhar idhar

akhtar se wo chamakte hue kan ke guhar

rashk-e-hilal tauq gale ghairat-e-qamar

hikal pe naqsh nam-e-khuda-e-jalil ke

taawiz gardanon pe par jibrail ke

masjid mein ae hanste hue jab wo gul badan

khushbu se sehn-e-masjid-e-jame bana chaman

taslim ko hasin se pahle jhuke husn

khush ho ke muskurane lage surur-e-zaman

barh barh ke kham salam ko chhote bare hue

baithe rahe rasul malak uth khare hue

beton ko tha ali ka ishara ke baith jao

lazim nahin ke waaz mein nana ko tum satao

phaila ke hath bole mohammad ke ao ao

shabbir ne kaha hamen pahle gale lagao

bhai husn jo ap ki godi mein aenge

ham tum se nana jan abhi ruth jaenge

bole husn ke wah hamen aur karen na pyar

iqrar ke chuke hain shahanshah nam dar

bole ba chashm-e-nam ye hasin-e-falak waqar

dekhen tu kaun kandhe pe hota hai ab sawar

sab se siwa jo hain so hamen un ke pyare hain

age na barhiye ap ke nana hamare hain

bhai se tab kaha ye husn ne ba iltifat

be wajh ham se ruthe ho tum ai nako sifat

nana hamare kya nahin sultan-e-kainat

hoti hai nagawar tumhen to zara si bat

ghussa na itna chahiye khush khu ke waste

machle the yun hi bachcha-e-ahu ke waste

ye sun ke munh ali ka lage dekhne rasul

hans kar kaha ye donon hain mere chaman ke phul

main chahta hun ek ki khatir na ho malul

roenge ye to ghar se nikal aegi batul

howe na ranj mere kisi nur-e-ain ko

tum lo husn ko god mein main lun hasin ko

shabar se phir ishara kya ho ke be qarar

ghussa na khao pahle tumhen ko karenge pyar

phir bole dekh kar su-e-shabbir namdar

a ai hasin a tiri baton ke main nisar

chhati se ham lagaenge jan apni jan kar

dekhen to pahle kaun lipatta hai an kar

daure ye bat sun ke barabar wo khush sair

pas ae aftab risalat ke do qamar

lipte hasin hans ke idhar aur husn idhar

the panon zanuon pe to bala-e-dosh sar

nana ke sath pyar mein donon ka sath tha

gardan mein ek un ka aur un ka hath tha

phir phir ke dekhte the shahanshah-e-mashriqain

gah janib husn to kabhi janib hasin

baithe jo zanuon pe wo zahra ke nur-e-ain

tha tan ko lutf-e-qalb ko rahat jigar ko chain

jhuk jhuk ke munh rasul-e-zaman chumne lage

un ka gila to un ka dahan chumne lage

shabbir chahte the ke chumen mire bhi lab

par kuchh gale ke boson ka khulta na tha sabab

nana ke munh ke pas ye late the munh ko jab

jhuk jhuk ke chumte the gila sayyad-e-arab

bhai ko dekh kar jo husn muskurate the

ghairat se un ki ankhon mein ansu bhar ate the

uthe hasin zanu-e-ahmad se khashmgin

ghusse se rang-e-zard aur ankhon pe astin

rukh par pasina jism mein raasha jabin pe chin

puchha kidhar chale to ye bole kahin nahin

ghar mein akele tewri charhae chale gae

dekha na phir ke sar ko jhukae chale gae

bit alshsharaf mein ae jo shabbir nam dar

karte ko munh pe rakh ke lage rone zarzar

dauren ye kah ke fatima zahra jigar figar

hai hai hasin kya hua to kyun hai ashk bar

tujh ko rula ke gham mein mujhe mubtala kiya

qurban ho gai tujhe kis ne khafa kiya

mera kaleja phatta hai ai dil ruba na ro

zahra hazar jan se tujh pe fida na ro

sar mein na dard ho kahin ai mah liqa na ro

bas bas na ro hasin bara-e-khuda na ro

meri taraf to dekho ke betab hoti hun

chadar se munh ko dhanp ke lo mein bhi roti hun

tu munh to khol ai mire shabbir khush khisal

tar ho gae hain ansuon se gore gore gal

mil mil ke pusht-e-dast se ankh karo na lal

suljhaon ao uljhe hue gesuon ke bal

ghar se gae the sath juda ho ke ae ho

samjhi mein kuchh husn se khafa ho ke ae ho

tum chup raho wo ghar mein to masjid se phir ke aen

guzri mein khel se mire bachche ko kyun rulaen

un se na boliyo wo tumhen lakh gar manaen

lo ao jane do tumhen chhati se ham lagaen

wari agar husn ne rulaya bura kiya

puchhungi kya na main mire pyare ne kya kiya

bole hasin ham to hain is bat par khafa

nana ne chume bhai ke hont aur mira gila

tum aman jan munh ko to sungho mire zara

kuchh bu-e-nagawar hai mere dahan mein kya

bhai ke lab se apne labon ko milate hain

ab ham na jaenge hamen nana rulate hain

munh rakh ke munh pe boli ye zahra jigar figar

bu-e-gulab ati hai ai mere gulghaddar

chuma agar gila to khafa ho na main nisar

tum ko zaban chusate the mahbub kirdagar

ye mushk mein mahak na gul yasaman mein hai

khush bu isi dahan ki tumhare dahan mein hai

kahne lage hasin ye man se ba chashm-e-nam

kya jano tum husn se hamen chahte hain kam

ye kya unhen pe lutf-o-inayat hai dam ba dam

maalum ho gaya unhen pyare nahin hain ham

ro ro ke aj jan ham apni ganwaenge

pani na ab piyen ge na khane ko khaenge

ye bat sun ke ho gaya zahra ka rang faq

boli pisar se ro ke wo bint-e-rasul-e-haq

sadqe gai karo na kaleje ko mere shaqq

hai hai ye kya kaha mujhe hota hai ab qalaq

mera lahu bahega jo ansu bahaoge

kahe ko man jiye gi jo khana na khaoge

ye kah ke orh li sar pur nur par rida

moze pahan ke god mein shabbir ko liya

dar tak gai jo ghar se wo dil band-e-mastafa

fizza ne barh ke buzar-o-sullaman ko di sada

pesh-e-nabi hasin ko godi mein lati hain

hat jao sab ke fatima masjid mein ati hain

allah re amad amad-e-zahra ka bandobast

saton falak the auj-e-sharafat se jis ke past

ahmad ke gard-o-pesh se uthe khuda parast

insan to kya malak ko na thi qudrat-e-nashist

aen to shad shad rasul-e-zaman hue

ghar mein khuda ke ek jagah panj tan hue

taazim fatima ko uthe sayyad albashar

dekha ke chashm-e-fatima hai ansuon se tar

gham the hasin dosh pe man ke jhukae sar

tha ik hilal mehr ke pahlu mein jalwa gar

man kahti thi na roo magar chup na hote the

ankhen thin band hichkiyan le le ke rote the

ghabra ke puchhne lage mahbub zu aljalal

rota hai kyun hasin ye kya hai tumhara hal

bolen batul aj qalaq hai mujhe kamal

roya hai ye hasin ke ankhen hain donon lal

ate hain hanste rote hue ghar mein jate hain

shafqat bhi ap hi karte hain ap hi rulate hain

hathon ko jorti hun main ya shah-e-bahr-o-bar

shafqat ki us ke hal pe har dam rahe nazar

rone se us ke hota hai tukre mira jigar

mujh faqa kash gharib ka pyara hai ye pisar

haidar se puchhiye mire usrat ke hal ko

kis kis dukhon se pala hai is naunihal ko

ashk us ke jitne tapke hain ya shah nek khu

itna hi ghut gaya hai mire jism ka lahu

roe hain phut phut ke ye mere ru ba ro

tar ho gaya hai ansuon se chand sa galo

dekha na tha ye main ne jo hal us ka aj hai

hazrat to jante hain ke nazuk mizaj hai

shafqat se aj ap ne chume husn ke lab

bosa liya na un ke labon ka ye kya sabab

rutbe mein donon ek hain ya surur-e-arab

main sach kahun ye sun ke mujhe bhi hua ajab

us ko jo ho khushi to dil us ka bhi shad ho

chhote se chahiye ke mohabbat ziyad ho

ap un ke naz uthate hain ya shah-e-bahr-o-bar

phir kis se ruthen ap se ruthen na ye agar

aksar unhen charhaya hai hazrat ne dosh par

gesu diye hain nanhe se hathon mein beshtar

ruthe the ye so qadmon pe sar dharne ae hain

munh ke na chumne ka gila karne ae hain

ye kah ke phir hasin se bolen ba chashm-e-tar

lo ja ke ab nabi ke qadam par jhukao sar

ae hasin hath jo nanhe se jor kar

be ikhtiyar rone lage sayyad albashar

rah rah ke dekhte the ali-o-batul ko

nazdik tha qalaq se ghash ae rasul ko

thi ansuon se rish-e-mubarak tamam nam

fart-e-buka se khak pe jhukte the dam ba dam

gahe sutun se lag ke hue rast gah kham

har lahza iztirab ziyada tha sabr kam

ho sakta tha na zabt shah-e-mashriqain se

rote the bar bar lipat kar hasin se

shabbir ro ke kahte the nana na roiye

roenge ab na ham shah-e-wala na roiye

hilne lagega arsh mualle na roiye

phatta hai ab hamara kaleja na roiye

sau bar din mein ham to munh ashkon se dhote hain

hazrat hamare rone pe kahe ko rote hain

ghabra gae ali wali shah-e-bahr-o-bar

ki arz fatima ne jhuka ke qadam pe sar

beti nisar ho gai ya sayyad albashar

kya wajh hai jo ap hain is tarah nauha gar

jaldi bataiye ke mujhe tab ab nahin

rona khuda ke dost ka ye be sabab nahin

hazrat ko ilm-e-ghaib hai ya shah-e-uns-o-jan

ainda-o-guzishta ka sab hal hai ayan

kya ai aj wahi khudawand-e-do jahan

hona hai jo hasin pe mujh se karo bayan

faqon se katti hun musibat jahan ki

kyun baba jan khair to hai us ki jan ki

bole jigar ko tham ke mahbub zu aljalal

tujh se suna na jaega ai fatima ye hal

kis munh se main kahun ke qalaq hai mujhe kamal

zahra shahid hue howen ge tere ye donon lal

matam ki ye khabar abhi jibril lae the

sare malak hasin ke purse ko ae the

almas pi ke hue ga be jan tira husn

ye wajh hai ke chumta hun us ka main dahan

bhar jaega kalejon ke tukron se sab lagan

hoga zumurrudi tire is lal ka badan

su-e-bahisht jab ye jahan se sidharenge

bad kesh tir us ke janaze pe marenge

zahra mujhe kalam ki taqat nahin hai ab

halq-e-hasin chumne ka kya kahun sabab

ik ban mein tin roz rahenge ye tishna lab

kat jaega gila yahi khanjar se hai ghazab

neze pe sar charhega tire nur-e-ain ka

ghoron se raund dalenge lasha hasin ka

ru-e-khabar ye kah ke jo mahbub zu alamnan

ghabra ke munh hasin ka takne lage husn

zahra pukari hae lutega mira chaman

main mar gai duhai hai ya surur-e-zaman

ye kaisi ag hai ke miri kokh jal gai

hai hai chhuri kaleje pe zahra ke chal gai

fariyad ya nabi shah-e-abrar alghiyas

ai mursalan haq ke madadgar alghiyas

ai be kison ke waris-o-sardar alghiyas

qudrat hai sab tarah ki shah-e-mashriqain ko

hazrat se lungi apne husn aur hasin ko

kis jurm par ye lal mire qatl honge ah

ro kar kaha rasul-e-khuda ne ke be gunah

ki arz fatima ne ke ai arsh-e-bargah

bachchon ko mere kya na milegi kahin panah

talwaren khinch khinch ke zalim jo aenge

hazrat na kya nawason ko apne bachaenge

asan hai kya jo qatl karenge sitam shiar

kya sher haq kamar se na khinchenge zu alfaqar

aada pe kya chalega na dast-e-khuda ka war

balon ko kya na kholegi zahra jigar figar

tukre jigar jo hue ga mujh dil do nim ka

paya na kya hilaungi arsh-e-azim ka

zahra se ro ke kahne lage shah nek khu

beti mujhe sataenge turbat mein kina jo

is waqt-e-qatl huin ge ye donon mah ru

duniya mein jab na hoga ali aur na main na to

lashe pe mujtaba ke to shabbir roega

shabbir jab mire ga to koi na hue ga

chillai sar patak ke ye zahra ke hai sitam

pitega kaun tan se jo niklega us ka dam

matam ki saf bichhaega kaun ai shah-e-umam

purse ko kaun aega us ke ba chashm-e-nam

ham mein se aise waqt jo koi na hue ga

hai hai mire hasin ko phir kaun roega

bachche ki mere taaziya dari karega kaun

munh dhanp dhanp girya-o-zari karega kaun

dariya-e-ashk-e-chashm se jari karega kaun

imdad baad-e-marg hamari karega kaun

hoga kahan nabi ke nawase ka fatiha

sharbat pe kaun dewega pyase ka fatiha

bole nabi ke ap ko zahra na kar halak

farma chuka hai mujh se ye waada khuda-e-pak

paida karenge qaum ik aisi ba roe khak

jo rat din rahenge isi gham mein dard nak

bazm-e-aza mein aenge wo dur dur se

tan khak se banaenge dil un ke nur se

hogi unhen se majlis-e-matam ki zeb-o-zain

denge unhen wo lab ke rahe jis pe wa hasin

ankhen wo denge rone ko samjhen jo farz-e-ain

hath aise ghair sina zani ho jinhen na chain

saman taaziyat ke kabhi kam na huin ge

wo hashr tak hasin ke matam mein roenge

hoga ayan falak pe mahram ka jab hilal

rakht-e-siyah pahnenge bar mein wo khush khisal

kholengi bebayan bhi sab apne saron ke bal

har ghar mein hoga shor ke hai hai ali ka lal

lenge sile mein khuld tire nur-e-ain se

ansu aziz wo na karenge hasin se

pyasa shahid hoga jo tera ye dil ruba

momin sabilen rakhenge pani ki ja baja

howe gi shad ruh shahidan-e-karbala

bhar bhar ke ab sard pukarenge barmala

mahbub-e-kibriya ke nawase ki nazr hai

pyase na jaiyo ke ye pyase ki nazr hai

kahne lagi nabi se batul-e-falak janab

hai hai main kya karun mire dil ko nahin hai tab

ai badshah kaun-o-makan malik alriqab

dargah-e-haq mein ap ki hai arz-e-mustajab

kije dua ke khaliq-e-akbar madad kare

allah ye bala mire bachche ki rad kare

beti se ro ke kahne lage shah-e-kainat

ruh-e-alamin ne mujh se to ye bhi kahi hai bat

chaho to rad kare ye bala rab-e-pak zat

lekin na hue gi mire ummat ki phir najat

mahbub-e-haq nisar tire nur-e-ain par

mauquf hai ye amar to qatl-e-hasin par

allah re sabr dukhtar-e-mahbub kirdagar

ummat ka nam sun ke jhukaya sar ek bar

khushnud ho ke kahne lage shah-e-zualfaqar

sadqe husn hasin tasadduq ali nisar

is rah mein na mal na daulat aziz hai

pyare pisar nahin hamen ummat aziz hai

kahne lage hasin se phir shah-e-bahr-o-bar

batla mujhe ke kya tiri marzi hai ai pisar

nana se bole chhote se hathon ko jor kar

ummat ke kam ae to hazir abhi hai sar

waada ko ham na bhulenge go khurd sal hain

chhote nahin hain mukhbir-e-sadiq ke lal hain

rote hain ap kis liye ya sayyad-e-umam

razi hain ham pe rah-e-khuda mein hun jo sitam

talwaren bhi chalen to nahin marne ke dam

ummat pe apne sar ko tasadduq karenge ham

ham rast go hain bat pe jis waqt ate hain

kahte hain jo zaban se wahi kar dikhate hain

bachpan mein jo zaban se kaha tha kya wo kam

jis waqt ran mein tut pare shah pe fauj-e-sham

gardan jhuka ke barchhiyan khaya kiye imam

khun mein qaba rasul ki tar ho gai tamam

teghen ali ke lal ke shane pe chal gain

chhati ke par nezon ki noken nikal gain

pheri na thi jo pusht mubarak dam-e-masaf

the do hazar zakhm faqat sar se ta ba naf

sayyad se be watan se zamana tha bar khilaf

ghul tha ke aj hota hai ghar fatima ka saf

sambhala na jaega khalaf-e-bu turab se

lo wo qadam hasin ke nikle rikab se

menh ki tarah barasne lage shah den pe tir

tharra rahe the lag ke tan-e-naznin pe tir

daman pe tir jeb pe tir astin pe tir

pahlu pe tegh sina pe neza jabin pe tir

daghon se khun ke rakht badan lala zar tha

shakl-e-zareh sina-e-aqdas figar tha

tar thi lahu mein zulf-e-shikan dar shikan juda

majruh laal-e-lab the juda aur dahan juda

darpae the neza dar juda tegh zan juda

kat kat ke ho gaya tha har ik uzw-e-tan juda

si para tha na sadr faqat is janab ka

purze waraq waraq tha khuda ki kitab ka

karta tha war barchhiyon walon ka jab para

teghon se dam bhi lene ki mohlat na thi zara

nezon mein khun nabi ke nawase ka tha bhara

shamshir-o-tir neza-o-khanjar ke mawara

thin sakhtiyan sitam ki shah-e-khush khisal par

chalte the sang fatima zahra ke lal par

the do hazar jism shah-e-bahr-o-bar pe zakhm

mathe pe zakhm tir ke teghon ke sar pe zakhm

gardan pe zakhm-e-sina pe zakhm aur kamar pe zakhm

aur us ke mawara the behtar jigar pe zakhm

ghore pe gah sambhalte the gah dagmagate the

ghash ata tha to harne pe sar ko jhukate the

ghore pe jab sambhalne ki mutlaq rahi na tab

hathon se bag chhut gai aur paon se rikab

girne laga jo khak pe wo asman janab

marqad mein be qarar hui ruh bu turab

ghul tha ke khak par shah kaun-o-makan gira

bas ab zamin ulat gai aur asman gira

jalti hui zamin pe tarapne lage imam

be kis pe zalimon ne kiya aur azhdaham

is waqt-e-shimr se ye umar ne kiya kalam

han tan se jald kat sar-e-surur-e-anam

dariyo na sun ke fatima zahra ki ah ko

gul kar de sham-e-qabr risalat panah ko

ye sunte hi charhai sitamgar ne astin

khanjar kamar se khinch ke age barha len

the qibla ro jhuke hue sajde mein shah den

lab hilte dekhe shah ke aya wo jab qarin

samjha ke tishnagi se jo sadme guzarte hain

is waqt-e-bad dua mujhe shabbir karte hain

jhuk kar qarib kan jo laya to ye suna

haq mein gunah garon ke karte hain shah dua

jari zaban-e-khushk pe ye hai ke ai khuda

kar hajaton ko mere muhibon ki to rawa

shion ka hashr roz-e-jaza mere sath ho

mera ye khun baha hai ke un ki najat ho

ye sun ke mustaid hua wo shah ke qatl par

zanu rakha hasin ke sine pe be khatar

gardan pe pherne laga khanjar jo bad guhar

ai sada ali ki ke hai hai mire pisar

zahra pukari kuchh bhi nabi se hijab hai

zalim ye bosa gah risalat mab hai

kyun zabh mere lal ko karta hai be gunah

kyun katta hai mere kaleje ko ro siyah

kashti ko ahl-e-bit nabi ki na kar tabah

main fatima hun arsh hilaegi meri ah

hue ga hashr qatl jo ye be watan hua

ye mar gaya to khatima panj tan hua

awaz apni man ki ye zinib ne jab suni

dauri nikal ke kheme se sar pitti hui

dekha ke zabh karta hai hazrat ko wo shaqi

sar pet kar ye kahne lagi wo jigar jali

hai hai na tin roz ke pyase ko zabh kar

zalim na mustafa ke nawase ko zabh kar

bano pukarti thi ye kya karta hai lain

pyasa hai tin roz se haidar ka ja nashin

chillati thi sakina ke jine ki main nahin

baba ko zabh karta hai kyun ai adue den

khanjar na pher chand si gardan pe rahm kar

abba ko chhor de mire bachpan pe rahm kar

zakhmon se chur chur hai zahra ka yadgar

jis chhati par main soti thi us par hai to sawar

baba ke halq par na phira ab chhuri ki dhar

badle pidar ke sar ko mire tan se to utar

sayyad pe tishna lab pe sitam is qadar na kar

pauti hun fatima ki mujhe be pidar na kar

ro kar bayan ye karti thi wo sokhta jigar

de kar duhai ahl-e-haram pitte the sar

karta tha zabh shah ko wahan shimr bad guhar

farmate the ye shah ke pyasa hun rahm kar

pani diya na hae nabi ke nawase ko

jallad zabh karne laga bhuke pyase ko

akhir sar-e-imam-e-umam tan se kat gaya

chilla ke fatima ne ye zinib ko di sada

maidan se jald le ke sakina ko ghar mein ja

be jurm kat gaya tire man jae ka gila

mara bazlam shimr ne pyase ko jan se

main lut gai hasin sidhare jahan se

bas ai unnis-e-bazm mein hai nala-o-fughan

puchh un ke dil se jo hain sukhan fahm nukta dan

haq hai suna nahin kabhi us husn ka bayan

goya ke ye khaliq ki hai sar ba sar zaban

sach hai ke is zaban ko koi janta nahin

jo janta hai aur ko wo manta nahin