درد کے موسم کا کیا ہوگا اثر انجان پر

درد کے موسم کا کیا ہوگا اثر انجان پر

دوستو پانی کبھی رکتا نہیں ڈھلوان پر

آج تک اس کے تعاقب میں بگولے ہیں رواں

ابر کا ٹکڑا کبھی برسا تھا ریگستان پر

میں جو پربت پر چڑھا وہ اور اونچا ہو گیا

آسماں جھکتا نظر آیا مجھے میدان پر

کمرے خالی ہو گئے سایوں سے آنگن بھر گیا

ڈوبتے سورج کی کرنیں جب پڑیں دالان پر

اب یہاں کوئی نہیں ہے کس سے باتیں کیجیے

یہ مگر چپ چاپ سی تصویر آتش دان پر

آج بھی شاید کوئی پھولوں کا تحفہ بھیج دے

تتلیاں منڈلا رہی ہیں کانچ کے گلدان پر

بس چلے تو اپنی عریانی کو اس سے ڈھانپ لوں

نیلی چادر سی تنی ہے جو کھلے میدان پر

وہ خموشی انگلیاں چٹخا رہی تھی اے شکیبؔ

یا کہ بوندیں بج رہی تھیں رات روشندان پر

dard ke mausam ka kya hoga asar anjan par

dosto pani kabhi rukta nahin dhalwan par

aj tak us ke taaqub mein bagule hain rawan

abr ka tukra kabhi barsa tha registan par

main jo parbat par charha wo aur uncha ho gaya

asman jhukta nazar aya mujhe maidan par

kamre khali ho gae sayon se angan bhar gaya

dubte suraj ki kirnen jab paren dalan par

ab yahan koi nahin hai kis se baten kijiye

ye magar chup chap si taswir atish dan par

aj bhi shayad koi phulon ka tohfa bhej de

titliyan mandla rahi hain kanch ke guldan par

bas chale to apni uryani ko us se dhanp lun

nili chadar si tani hai jo khule maidan par

wo khamoshi ungliyan chatkha rahi thi ai shakeb

ya ke bunden baj rahi thin rat raushandan par