درمیان جسم و جاں ہے اک عجب صورت کی آڑ

درمیان جسم و جاں ہے اک عجب صورت کی آڑ

مجھ کو دل کی دل کو ہے میری انانیت کی آڑ

آ گیا ترک خودی کا گر کبھی بھولے سے دھیان

دل نے پیدا کی ہر ایک جانب سے ہر صورت کی آڑ

دیتے ہیں دل کے عوض وہ درد بہر امتحاں

لیتے ہیں نام خدا اپنی طمانیت کی آڑ

نفس پرور کرتے ہیں بدنام نام مے کشی

پردۂ پندار میں لیتے ہیں کیفیت کی آڑ

پردہ داری چشم نا محرم سے تھی مد نظر

درمیاں میں ڈال دی ہے نور نے حیرت کی آڑ

دیدنی جو کچھ ہے جلوہ دیکھ چشم پاک میں

نور نے وحدت میں رہ کر لی ہے کیوں کثرت کی آڑ

جب نہان و آشکارا جلوۂ جانانہ ہے

سب ریاکاری ہے ساحر خلوت و جلوت کی آڑ

darmiyan-e-jism-o-jan hai ik ajab surat ki ar

mujh ko dil ki dil ko hai meri ananiyat ki ar

a gaya tark-e-khudi ka gar kabhi bhule se dhyan

dil ne paida ki har ek janib se har surat ki ar

dete hain dil ke ewaz wo dard bahr-e-imtihan

lete hain nam-e-khuda apni tamaniyat ki ar

nafas parwar karte hain badnam nam-e-mai kashi

parda-e-pindar mein lete hain kaifiyat ki ar

parda dari chashm-e-na mahram se thi mad-e-nazar

darmiyan mein dal di hai nur ne hairat ki ar

didani jo kuchh hai jalwa dekh chashm-e-pak mein

nur ne wahdat mein rah kar li hai kyun kasrat ki ar

jab nahan-o-ashkara jalwa-e-janana hai

sab riyakari hai sahir khalwat-o-jalwat ki ar