درد سا اٹھ کے نہ رہ جائے کہیں دل کے قریب

درد سا اٹھ کے نہ رہ جائے کہیں دل کے قریب

میری کشتی نہ کہیں غرق ہو ساحل کے قریب

وجد میں روح ہے اور رقص میں ہے پائے طلب

دیکھیے حال مرے شوق کا منزل کے قریب

رہ گیا تھا جو کبھی پائے طلب میں چبھ کر

اب وہی خار تمنا ہے رگ دل کے قریب

اب وہ پیری میں کہاں عہد جوانی کی امنگ

رنگ موجوں کا بدل جاتا ہے ساحل کے قریب

جذبۂ شوق بھی کچھ کام نہ آیا ہادیؔ

ناتوانی نے بٹھایا مجھے منزل کے قریب

dard sa uth ke na rah jae kahin dil ke qarib

meri kashti na kahin gharq ho sahil ke qarib

wajd mein ruh hai aur raqs mein hai pae talab

dekhiye hal mire shauq ka manzil ke qarib

rah gaya tha jo kabhi pae talab mein chubh kar

ab wahi khar-e-tamanna hai rag-e-dil ke qarib

ab wo piri mein kahan ahd-e-jawani ki umang

rang maujon ka badal jata hai sahil ke qarib

jazba-e-shauq bhi kuchh kam na aya hadi

natawani ne bithaya mujhe manzil ke qarib