درد کا میرے یقیں آپ کریں یا نہ کریں

درد کا میرے یقیں آپ کریں یا نہ کریں

عرض اتنی ہے کہ اس راز کا چرچا نہ کریں

لاکھ غافل سہی پر ایسے بھی ہم کور نہیں

کہ چمن دیکھ کے ذکر چمن آرا نہ کریں

عقل و دانش سے تو کچھ کام نہ نکلا اپنا

کب تک آخر دل دیوانہ کا کہنا نہ کریں

وہ نگاہیں عجب انداز سے ہیں عشوہ فروش

غم پنہاں کو ہمارے کہیں رسوا نہ کریں

تیرے آشفتہ سر ایسے بھی نہیں سودائی

کہ دل و دیں کے لئے زلف کا سودا نہ کریں

میں نے بیہودہ توقع کی سزا پائی ہے

کچھ خیال آپ مری حسرت دل کا نہ کریں

میرے ارمانوں کو کاش اتنی سمجھ ہو وحشتؔ

کہ ان آنکھوں سے مروت کا تقاضا نہ کریں

dard ka mere yaqin ap karen ya na karen

arz itni hai ke is raz ka charcha na karen

lakh ghafil sahi par aise bhi ham kor nahin

ke chaman dekh ke zikr-e-chaman ara na karen

aql-o-danish se to kuchh kam na nikla apna

kab tak akhir dil-e-diwana ka kahna na karen

wo nigahen ajab andaz se hain ishwa farosh

gham-e-pinhan ko hamare kahin ruswa na karen

tere ashufta sar aise bhi nahin saudai

ke dil-o-din ke liye zulf ka sauda na karen

main ne behoda tawaqqo ki saza pai hai

kuchh khayal ap miri hasrat-e-dil ka na karen

mere armanon ko kash itni samajh ho wahshat

ke in ankhon se murawwat ka taqaza na karen