دریاے عشق

عشق ہے تازہ کار و تازہ خیال

ہر جگہ اس کی اک نئی ہے چال

دل میں جاکر کہیں تو درد ہوا

کہیں سینے میں آہ سرد ہوا

کہیں آنکھوں سے خون ہوکے بہا

کہیں سر میں جنون ہو کے رہا

کہیں رونا ہوا ندامت کا

کہیں ہنسنا ہوا جراحت کا

گہ نمک اس کو داغ کا پایا

گہ پتنگا چراغ کا پایا

واں طپیدن ہوا جگر کے بیچ

یاں تبسم ہے زخم تر کے بیچ

کہیں آنسو کی یہ سرایت ہے

کہیں یہ خوں چکاں حکایت ہے

تھا کسی دل میں نالۂ جاں کاہ

ہے کسو لب پہ ناتواں اک آہ

تھا کسو کی پلک کی نم ناکی

ہے کسو خاطروں کی غم ناکی

کہیں باعث ہے دل کی تنگی کا

کہیں موجب شکستہ رنگی کا

کہیں اندوہ جان آگہ تھا

سوزش سینہ ایک جاگہ تھا

کہیں عشاق کی نیاز ہوا

کہیں اندوہ جاں گداز ہوا

ہے کہیں دل جگر کی بے تابی

تھا کسو مضطرب کی بے خوابی

کسو چہرے کا رنگ زرد ہوا

کسو محمل کی رہ کی گرد ہوا

طور پر جا کے شعلہ پیشہ رہا

بے ستوں میں شرار تیشہ رہا

کہیں نے بست کو لگائی آگ

کہیں تیغ و گلو میں رکھی لاگ

کبھو افغان مرغ گلشن تھا

کبھو قمری کا طوق گردن تھا

کسو مسلخ میں جا قنارہ ہوا

کوئی دل ہو کے پارہ پارہ ہوا

ایک عالم میں دردمندی کی

ایک محفل میں جا سپندی کی

ایک دل سے اٹھے ہے ہوکر دود

ایک لب پر سخن ہے خون آلود

اک زمانے میں دل کی خواہش تھا

اک سمیں میں جگر کی کاہش تھا

کہیں بیٹھے ہے جی میں ہوکر چاہ

کہیں رہتا ہے قتل تک ہمراہ

خارخار دل غریباں ہے

انتظار بلانصیباں ہے

کہیں شیون ہے اہل ماتم کا

کہیں نوحہ ہے جان پر غم کا

آرزو تھا امیدواروں کی

دردمندی جگر فگاروں کی

نمک زخم سینہ ریشاں ہے

نگہ یاس مہرکیشاں ہے

حسرت آلود آہ تھا یہ کہیں

شوق کی یک نگاہ تھا یہ کہیں

کشش اس کی ہے ایک اعجوبہ

ڈوبا عاشق تو یار بھی ڈوبا

کوئی محروم وصل یاں سے گیا

کہ نہ یار اس کا پھر جہاں سے گیا

کام میں اپنے عشق پکا ہے

ہاں یہ نیرنگ ساز یکہ ہے

جس کو ہو اس کی التفات نصیب

ہے وہ مہمان چندروزہ غریب

ایسی تقریب ڈھونڈھ لاتا ہے

کہ وہ ناچار جی سے جاتا ہے

آغاز قصۂ جاں گداز

ایک جا اک جوان رعنا تھا

لالہ رخسار و سروبالا تھا

عشق رکھتا تھا اس کی چھاتی گرم

دل وہ رکھتا تھا موم سے بھی نرم

شوق تھا اس کو صورت خوش سے

انس رکھتا تھا وضع دل کش سے

تھا طرح دار آپ بھی لیکن

رہ نہ سکتا تھا اچھی صورت بن

کوئی ترکیب اگر نظر آتی

صورت حال اور ہو جاتی

دیکھتا گر وہ کوئی خوش پرکار

رہتا خمیازہ کش ہی لیل و نہار

زلف ہوتی کسو کی گر برہم

دیکھتے اس کے حال کو درہم

دیکھتا گر کہیں وہ چشم سیاہ

دل سے بے اختیار کرتا آہ

سر میں تھا شور شوق دل میں تھا

عشق ہی اس کے آب و گل میں تھا

الغرض وہ جوان خوش اسلوب

ناشکیبا رہے تھا بے محبوب

ایک دن بے کلی سے گھبرایا

سیر کرنے کو باغ میں آیا

کسو گل پاس وہ صنم ٹھہرا

کہیں سبزے میں ایک دم ٹھہرا

اک خیابان میں سے ہو نکلا

ایک سائے تلے سے رو نکلا

نہ تسلی ہوا دل بے تاب

نہ تھما چشم تر سے خون ناب

دل کی واشد سے بے توقع ہو

ہر شجر کے تلے بہت سا رو

دیکھ گلشن کو ناامیدانہ

منھ کیا ان نے جانب خانہ

دل کے رکنے کا اس کو اک غم تھا

راہ چلنے میں خیال درہم تھا

ناگہ اس کوچہ سے گذار ہوا

آفت تازہ سے دوچار ہوا

ایک غرفے سے ایک مہ پارہ

تھی طرف اس کے گرم نظارہ

پڑ گئی اس پہ اک نظر اس کی

پھر نہ آئی اسے خبر اس کی

تھی نظر یاکہ جی کی آفت تھی

وہ نظر ہی وداع طاقت تھی

ہوش جاتا رہا نگاہ کے ساتھ

صبر رخصت ہوا اک آہ کے ساتھ

بے قراری نے کج ادائی کی

تاب و طاقت نے بے وفائی کی

منھ جو اس کا طرف سے اس کے پھرا

مضطرب ہوکے خاک پر یہ گرا

وہ تو رکھتی نہ تھی خیال اس کا

بے طرح ہووے گوکہ حال اس کا

جھاڑ دامن کے تیں وہ مہ پارہ

اٹھ گئی سامنے سے یک بارہ

وہ گئی اس کے سر بلا آئی

خاک میں مل گئی وہ رعنائی

دل پہ کرنے لگا طپیدن ناز

رنگ چہرے سے کر چلا پرواز

ہاتھ جانے لگا گریباں تک

چاک کے پھیلے پاؤں داماں تک

طبع نے اک جنوں کیا پیدا

اشک نے رنگ خوں کیا پیدا

سوزش دل نے جی میں جاگہ کی

داغ نے آ جگر کو آتش دی

بستر خاک پر گرا وہ زار

درد کا گھر ہوا دل بیمار

خاطر افگار خار خار ہوئی

جاں تمناکش نگار ہوئی

اس کے منھ پر پڑی جو اس کی نگاہ

ناامیدی کے ساتھ ہی سر کی آہ

خو ہوئی نالۂ حزیں کے ساتھ

رابطہ آہ آتشیں کے ساتھ

ہونٹھ سوکھے تو خون ناب ملا

خواب و خور دونوں کو جواب ملا

خلق اس کی ہوئی تماشائی

پر نہ وہ دیکھنے کبھو آئی

کچھ کہا گر کسو نے شفقت سے

رو دیا ان نے ایک حسرت سے

جاکے اس کے قریب در بیٹھا

قصد مرنے کا اپنے کر بیٹھا

دل نہ سمجھا کہ اضطراب کیا

شوق نے کام کو خراب کیا

جوکہ سمجھے تھے اس کو دیوانہ

رحم کرتے تھے آشنایانہ

عاشق اس کو کسو کا جان گئے

سب برا اس ادا کو مان گئے

کیونکہ باہم معاش تھی سب کی

ایک جا بود و باش تھی سب کی

وارث اس کے بھی بدگمان ہوئے

درپئے دشمنی جان ہوئے

مشورت تھی کہ مار ہی ڈالیں

دفعتہً اس بلا کے تیں ٹالیں

پھر یہ ٹھہری کہ ہوں گے ہم بدنام

سن کے آخر کہیں گے خاص و عام

کیا گنہ تھا کہ یہ جواں مارا

کن نے مارا اسے کہاں مارا

ہووے یہ خون خفتہ گر بیدار

کھینچنی ہووے خفت بسیار

کیجیے ایک ڈھب سے اس کو تنگ

تا نہ عائد ہو اپنی جانب ننگ

تہمت خبط رکھیے اس کے سر

کیجیے سنگ سار اس کو پھر

دے کے دیوانہ اس جواں کو قرار

ہوگئے سارے درپئے آزار

ایک نے سخت کہہ کے تنگ کیا

ایک نے آکے زیر سنگ کیا

ایک آیا تو ہاتھ میں شمشیر

ایک بولا کہ اب ہے کیا تاخیر

کی اشارت کہ کودکان شہر

آئے لبریز غصہ و پرقہر

گرچہ ہنگامہ اس کے سر پر تھا

لیک روے دل اس کا اودھر تھا

محو تھا اس کے یہ خیال کے بیچ

تھا گرفتار اپنے حال کے بیچ

ہونٹھ پر حسن کا بیاں اس کا

تھا سر و سنگ آستاں اس کا

ایک دم آہ سرد بھر اٹھنا

نالۂ گرم گاہ کر اٹھنا

جی میں کہتا کہ آہ مشکل ہے

اس طرف یک نگاہ مشکل ہے

دوست کو میرے نام سے ہے ننگ

دشمنوں سے ہے جی پہ عرصہ تنگ

چشم تر سے لہو بہا کرتا

صبح کی باد سے کہا کرتا

کاے نسیم سحر یہ اس سے کہہ

مت تغافل کر اور غافل رہ

ان بلاؤں میں کوئی کیونکے جیے

جان پر آ بنی ہے تیرے لیے

جان دوں تیرے واسطے سو تو

آنکھ اٹھاکر ادھر نہ دیکھے کبھو

رفتہ رفتہ ہوا ہوں سودائی

دور پہنچی ہے میری رسوائی

نام کو بھی ترے نہ جانا آہ

تجھ سے کیونکر سخن کی نکلے راہ

ناامیدانہ گر کروں ہوں نگاہ

دیکھتا ہوں ہزار روز سیاہ

سخت مشکل ہے سخت ہے بیداد

ایک میں خوں گرفتہ سو جلاد

کوئی مشفق نہیں کہ ہووے شفیق

بیکسی بن نہیں ہے کوئی رفیق

نالہ ہوتا ہے گر کبھی دلجو

گریہ آنکھوں سے پونچھتا ہے رو

آہ جو ہمدمی سی کرتی ہے

اب تو وہ بھی کمی سی کرتی ہے

چشم رکھتا ہے وصل کی یہ دل

جی ہے اس سے اسیر آب و گل

ورنہ ترکیب یہ کہاں ہوتی

صورت اک معنی نہاں ہوتی

اب ٹھہرتا نہیں ہے پاے ثبات

ایک میں اور کتنے تصدیعات

سنگ باراں سے سخت ہوں دل تنگ

شیشۂ دل نہیں ہے پارۂ سنگ

محرم یک نگاہ بیش نہیں

کم ہے سینے میں جاکہ ریش نہیں

کیونکے کہیے کہ تو نہیں آگاہ

اک قیامت بپا ہے یاں سر راہ

کچھ چھپا تو نہیں رہا یہ راز

اک جہاں اس سے ہے خبر پرداز

پس تغافل ہوا ترحم کر

گوش دل جانب تظلم کر

کون کہتا ہے رہ نہ محو ناز

پر نہ اتنا کہ جی سے جائے نیاز

ان بلاؤں پہ ان نے صبر کیا

اختیار اپنے جی پہ جبر کیا

اس طرف کا نہ دیکھنا چھوڑا

اس کے اندوہ سے نہ منھ موڑا

اور یہ ماجرا ہوا مشہور

شور رسوائیوں کا پہنچا دور

دیکھ کر اس کو بے خور و بے خواب

جانا ہر اک نے عاشق بے تاب

منھ پر اس کے جو رنگ خون نہیں

عشق ہے اس کو یہ جنون نہیں

ہے نگاہ اس کی جس طرف مائل

اس طرف ہی گیا ہے اس کا دل

جب ہوا ذکر اقل و اکثر میں

چاہ ثابت ہوئی اسے گھر میں

عشق بے پردہ جب فسانہ ہوا

مضطرب کدخداے خانہ ہوا

گھر میں جا بہر دفع رسوائی

بیٹھ کر مشورت یہ ٹھہرائی

یاں سے یہ غیرت مہ تاباں

جا کے چندے کہیں رہے پنہاں

شب محافے میں اس کو کرکے سوار

ساتھ دے ایک دایۂ غدار

پار دریا کے جلد رخصت کی

اس طرح فکر رفع تہمت کی

گھر تھا اک آشنا کا مدنگاہ

واں ہو روپوش تا یہ غیرت ماہ

ہووے جب اس بلا سے خاطر جمع

نورافزاے خانہ ہو جوں شمع

گھر سے باہر محافہ جو نکلا

اس جواں ہی کے پاس ہو نکلا

طپش دل سے ہو کے یہ آگاہ

ہو لیا ساتھ اس کے بھر کر آہ

واں کے رہنے سے اس کو کام نہ تھا

وہ گلی اس کا کچھ مقام نہ تھا

جس سے جی کو کمال ہو الفت

جس سے دل کی درست ہو نسبت

جنبش اس کی پلک کو گرداں ہو

دل میں یاں کاوش نمایاں ہو

واں اگر موشکست کا ہو باب

یاں رگ جاں کو ہووے پیچ و تاب

واں اگر پاؤں میں لگے ہے خار

دل سے یاں سر نکالے ہے یک بار

یار کو درد چشم اگر ہووے

چشم عاشق لہو میں تر ہووے

چاک دامن میں واں پئے زینت

یاں گریباں ہے چاک گل کی صفت

واں دہن تنگ یاں ہے دل تنگی

حسن اور عشق میں ہے یک رنگی

دست افشاں وہ پاے کوباں یہ

تھا محافے کے ساتھ گرم رہ

قطرہ زن اشک سا وہ راہ تمام

درپئے یار تھا وہ بے آرام

ہر قدم تھا زبان پر جاری

خواب ہے یاکہ ہے یہ بیداری

ہمسری اس کی تھی میسر کب

ہے مجھے بخت واژگوں سے عجب

شوق مفرط نے بے تہی کی سخت

نوشکیبی نے دل سے باندھا رخت

رفتہ رفتہ سخن ہوئے نالے

اڑنے لاگے جگر کے پرکالے

اضطراب دلی نے زور کیا

ان نے بے اختیار شور کیا

دل کے غم کو زبان پر لایا

آفت تازہ جان پر لایا

کاے جفا پیشہ و تغافل کیش

اک نظر سے زیاں نہیں کچھ بیش

منھ چھپایا ہے تونے اس پر بھی

نگہ التفات ایدھر بھی

صبر کس کس بلا سے کر گذروں

چارہ اس بن نہیں کہ مر گذروں

منزل وصل دور میں کم پا

تجھ کو اس مرتبے میں استغنا

ہے تو نزدیک دل سے اے طناز

لیک تجھ تک سفر ہے دور دراز

ناز نے یک نفس نہ رخصت دی

آئینے نے تجھے نہ فرصت دی

تو تو واں زلف کو بنایا کی

جان یاں پیچ و تاب کھایا کی

تجھ کو تھی اپنے خال رخ پہ نگاہ

دل مرا مبتلاے داغ سیاہ

تجھ کو مدنظر تھی اپنی چال

میں ستم کش ہوا کیا پامال

بستر خواب پر تجھے آرام

مجھ کو خمیازہ کھینچنے سے کام

واں لب لعل تیرے خنداں تھے

یاں فشردہ جگر پہ دنداں تھے

ناز و خوبی نے دل دیا نہ تجھے

رحم سے آشنا کیا نہ تجھے

اب تغافل نہ کر تلطف کر

حال پر میرے ٹک تاسف کر

گوش زد دایہ کے ہوئے یہ سخن

تھی وہ استاد کار حیلہ و فن

پاس اس کو بلا تسلی کی

وعدۂ وصل سے تشفی کی

کاے ستم دیدۂ غم دوری

ہوچکا اب زمان مہجوری

زار نالی نہ کر شکیبا ہو

عشق کا راز تا نہ رسوا ہو

دل قوی رکھ نہ جی کو کاہش دے

چل کوئی دم کو داد خواہش دے

سخت دل تنگ تھی یہ غیرت ماہ

قطع تجھ بن نہ ہوسکی تھی راہ

گرچہ یہ حسن اتفاق سے ہے

اس کی بھی جذب اشتیاق سے ہے

تیرے آنے سے دل کشادہ ہوا

نشۂ دوستی زیادہ ہوا

بزم عشرت کریں گے باہم ساز

ہوجو اب اپنے دوست کا دم ساز

دے کر اس کو فریب ساتھ لیا

دل عاشق کو اپنے ہاتھ لیا

لیک در پردہ ان نے یہ ٹھانی

کیجیے اس سے خصمی جانی

یہ تو دل تفتۂ محبت تھا

سخت وارفتۂ محبت تھا

وقت نزدیک تھا جو آپہنچا

تا سر آب پا بہ پا پہنچا

آب کیسا کہ بحر تھا ذخار

تند و مواج و تیرہ و تہ دار

موج کا ہر کنایہ طوفاں پر

مارے چشمک حباب عماں پر

ہم کنار بلا ہر اک گرداب

لجہ سرمایہ بخش تیرہ سحاب

گذر موج جب نہ تب دیکھا

ساحل اس کا نہ خشک لب دیکھا

کشتی اک آن کر ہوئی موجود

ہو فلک سے ہلال جیسے نمود

کی کنارے پہ لاکے استادہ

تھا محافہ رکوب آمادہ

اس سفینے میں جلد جا پہنچا

یہ بھی واں ساتھ ہی لگا پہنچا

بیچ دریا میں دایہ نے جاکر

کفش اس گل کی اس کو دکھلاکر

پھینکی پانی کی سطح پر اک بار

اور بولی کہ او جگرافگار

حیف تیرے نگار کی پاپوش

موج دریا سے ہووے ہم آغوش

غیرت عشق ہے تو لا اس کو

چھوڑ مت یوں برہنہ پا اس کو

اس طرف اس کے تیں اترنا ہے

اس نواحی کی سیر کرنا ہے

پاؤں اس کے جو ہیں نگار آلود

ظلم ہے ہوویں گر غبارآلود

جس کف پا کو رنگ گل ہو بار

منصفی ہے کہ خار سے ہو فگار

ان پہ نرمی میں گل سے ہوں جو پرے

آبلہ چشم کو سیاہ کرے

یہ روا ہے تو اپنے حال پہ رو

مفت ناموس عشق کو مت کھو

جی اگر تھا عزیز اے ناکام

کیوں عبث عشق کو کیا بدنام

سن کے یہ حرف دایۂ مکار

دل سے اس کے گیا شکیب و قرار

بے خبر کار عشق کی تہ سے

جست کی ان نے اپنی جاگہ سے

تھا سفینے میں یا کہ دریا میں

موج زنجیر ہوگئی پا میں

کھنچ گیا قعر کو یہ گوہر ناب

تھی کشش عشق کی مگر تہ آب

کہتے ہیں ڈوبتے اچھلتے ہیں

لیکن ایسے کوئی نکلتے ہیں

ڈوبے جو یوں کہیں وہ جا نکلے

غرق دریاے عشق کیا نکلے

عشق نے آہ کھو دیا اس کو

آخر آخر ڈبو دیا اس کو

جب کہ دریا میں ڈوب کر وہ جواں

کھو گیا گوہر گرامی جاں

دایۂ حیلہ گر ہوئی دل شاد

واں سے کشتی چلی بہ رنگ باد

خارخار دلی سے فارغ ہو

لے گئی پار اس گل نو کو

یہ نہ سمجھی کہ عشق آفت ہے

فتنہ سازی میں اک قیامت ہے

خاک ہو کیوں نہ عاشق بے دل

کام سے اپنے یہ نہیں غافل

وصل جیتے نہ ہو میسر اگر

لادے معشوق کو یہ تربت پر

یاں سے عاشق اگر گئے ناشاد

خاک خوباں بھی ان نے دی برباد

قصہ کوتاہ بعد یک ہفتہ

آئی وہ رشک مہ زخود رفتہ

کہنے لاگی کہ اب تو اے دایہ

ہوگیا غرق وہ فرومایہ

اب تو وہ ننگ درمیاں سے گیا

آرزومند اس جہاں سے گیا

تھے جو ہنگامے اس کے حد سے زیاد

ساتھ اس کے گئے وہ شور و فساد

شور فتنے تھے اس تلک سارے

اب تو بدنامیاں نہیں بارے

دل تڑپتا ہے متصل میرا

مرغ بسمل ہے یاکہ دل میرا

وحشت طبع اب تو افزوں ہے

حال جی کا مرے دگرگوں ہے

بے دماغی کمال ہوتی ہے

جان تن کے وبال ہوتی ہے

دل کوئی دم میں خون ہووے گا

آج کل میں جنون ہووے گا

بے کلی جی کو تاب دیتی ہے

طاقت دل جواب دیتی ہے

جی میں آتا ہے ہوں بیابانی

پر کہوں ہوں کہ ہے یہ نادانی

مصلحت ہے کہ مجھ کو لے چل گھر

ایک دو دم رہیں گے دریا پر

گاہ باشد کہ دل مرا وا ہو

ورنہ کیا جانیے کہ پھر کیا ہو

دایہ بولی کہ اے سراپا ناز

حسن کا در پہ تیرے روے نیاز

اب تو میں فتنے کو سلایا ہے

اس بلا کے تئیں بٹھایا ہے

کون مانع ہے گھر کے چلنے کا

سد رہ کون ہے نکلنے کا

ہو محافے میں دل خوشی سے سوار

شاد شاداں کر آب سے تو گذار

دل سے اپنے پدر کے غم کم کر

مادر مہرباں کو خرم کر

کر ملاقات ہمدموں سے تو

گرم بازی ہو محرموں سے تو

یہ نہ سوچی کہ بدبلا ہے عشق

گھات میں اپنی لگ رہا ہے عشق

جس کسو سے یہ پیار رکھتا ہے

عاقبت اس کو مار رکھتا ہے

جذب سے اپنے جب کرے ہے کام

عاشق مردہ سے بھی لے ہے کام

صبح گاہاں وہ غیرت خورشید

اس جگہ سے رواں ہوئی نومید

پہنچی نصف النہار دریا پر

روئی بے اختیار دریا پر

حد سے افزوں جو بے قرار ہوئی

دایہ کشتی میں لے سوار ہوئی

حرف زن یوں ہوئی کہ اے دایہ

یاں گرا تھا کہاں وہ کم مایہ

موج سے تھا کدھر کو ہم آغوش

تھا تلاطم سے کس طرف ہم دوش

تجھ کو آیا نظر کہاں آکر

پھر جو ڈوبا تو کس جگہ جاکر

مجھ کو دیجو نشان اس جا کا

میں بھی دیکھوں خروش دریا کا

ہوں میں ناآشناے سیر آب

ناشناساے موجہ و گرداب

لجہ کیا لطمہ کس کو کہتے ہیں

گھر میں ہم نام سنتے رہتے ہیں

ہیں میسر کہاں یہ سیر عبور

اتفاقی ہیں اس طرح کے امور

مکر میں گرچہ دایہ تھی کامل

لیک تہ سے سخن کے تھی غافل

یہ نہ سمجھی کہ ہے فریب عشق

ہے یہ مہ پارہ ناشکیب عشق

بیچ دریا کے جا کہا یہ حرف

یاں ہوا تھا وہ ماجراے شگرف

یاں وہ بیٹھا حباب کے مانند

پھر نہ تھا کچھ سراب کے مانند

سنتے ہی یہ کہاں کہاں کر کر

گر پڑی قصد ترک جاں کر کر

موج ہر اک کمند شوق تھی آہ

لپٹی اس کو بہ رنگ مار سیاہ

دام گستر دہ عشق تھا تہ آب

جس کے حلقے تمام تھے گرداب

حسن موجوں میں یوں نظر آوے

نور مہتاب جیسے لہراوے

تھیں وہ اس کی حنائی انگشتاں

غیرت افزاے پنجۂ مرجاں

سر پہ جس دم کہ آب ہو کے بہا

سطح پانی کا آئینہ سا رہا

کشش عشق آخر اس مہ کو

لے گئی کھینچتی ہوئی تہ کو

کودے غواص و آشنا سارے

تابہ مقدور دست و پا مارے

کھینچ کر کوفت سب ہوئے بیتاب

نہ لگا ہاتھ وہ در نایاب

جا ہم آغوش مردہ یار ہوئی

تہ میں دریا کے ہم کنار ہوئی

پاک کی زندگی کی آلائش

ہو کے دست و بغل کی آسائش

سر پٹکتی جو گھر گئی دایہ

آفت اک لے گئی نئی دایہ

اب و عم مادر و برادر سب

خاک افشان و آہ و نالہ بہ لب

دار و دستہ تمام اس گل کا

ترک آئین کر تحمل کا

سوے دریا رواں ہوئے گریاں

آتش غم سے دل جگر بریاں

خلق یک جا ہوئی کنارے پر

حشر برپا ہوئی کنارے پر

دام داروں سے سب نے کام لیا

آخر ان کو اسیر دام کیا

نکلے باہم ولے موئے نکلے

دونوں دست و بغل ہوئے نکلے

ربط چسپاں بہم ہویدا تھا

مر گئے پر بھی شوق پیدا تھا

ایک کا ہاتھ ایک کی بالیں

ایک کے لب سے ایک کو تسکیں

جو نظر ان کو آن کرتے تھے

ایک قالب گمان کرتے تھے

کیا لکھوں مل رہے وہ وصلی وار

ہم دگر سے جدا ہوئے دشوار

کیوں نہ دشوار ہووے ان کا فصل

جان دے دے ہوا ہو جن کا وصل

حیرت کار عشق سے مردم

شکل تصویر آپ میں تھے گم

میرؔ اب شاعری کو کر موقوف

عشق ہے ایک فتنۂ معروف

قدرت اپنی جہاں دکھاتا ہے

اس سے جو تو کہے سو آتا ہے

کتنی وسعت ترے بیاں میں ہے

کتنی طاقت تری زباں میں ہے

لب پہ اب مہر خامشی بہتر

یاں سخن کی فرامشی بہتر

ishq hai taza kar-o-taza khayal

har jagah us ki ik nai hai chal

dil mein jakar kahin to dard hua

kahin sine mein ah-e-sard hua

kahin ankhon se khun hoke baha

kahin sar mein junun ho ke raha

kahin rona hua nadamat ka

kahin hansna hua jarahat ka

gah namak us ko dagh ka paya

gah patanga charagh ka paya

wan tapidan hua jigar ke bich

yan tabassum hai zakhm tar ke bich

kahin ansu ki ye sarayat hai

kahin ye khun chakan hikayat hai

tha kisi dil mein nala-e-jan kah

hai kisu lab pe natawan ik ah

tha kisu ki palak ki nam naki

hai kisu khatiron ki gham naki

kahin bais hai dil ki tangi ka

kahin mujib shikasta rangi ka

kahin andoh jan-e-agah tha

sozish-e-sina ek jagah tha

kahin ushshaq ki niyaz hua

kahin andoh-e-jan gudaz hua

hai kahin dil jigar ki be tabi

tha kisu muztarib ki be khwabi

kisu chehre ka rang-e-zard hua

kisu mahmil ki rah ki gard hua

tur par ja ke shola pesha raha

be sutun mein sharar-e-tesha raha

kahin ne bast ko lagai ag

kahin tegh-o-galo mein rakhi lag

kabhu afghan murgh-e-gulshan tha

kabhu qumri ka tauq-e-gardan tha

kisu maslakh mein ja qanara hua

koi dil ho ke para para hua

ek alam mein dardmandi ki

ek mahfil mein ja sapnadi ki

ek dil se uthe hai hokar dud

ek lab par sukhan hai khun alud

ik zamane mein dil ki khwahish tha

ik samin mein jigar ki kahish tha

kahin baithe hai ji mein hokar chah

kahin rahta hai qatl tak hamrah

kharkhar dil ghariban hai

intizar-e-balanasiban hai

kahin shewan hai ahl-e-matam ka

kahin nauha hai jan par gham ka

arzu tha umidwaron ki

dardmandi jigar figaron ki

namak-e-zakhm-e-sina rishan hai

nigah-e-yas mehrkeshan hai

hasrat alud ah tha ye kahin

shauq ki yak nigah tha ye kahin

kashish us ki hai ek aajuba

duba ashiq to yar bhi duba

koi mahrum-e-wasl yan se gaya

ke na yar us ka phir jahan se gaya

kam main apne ishq paka hai

han ye nairang saz yakka hai

jis ko ho us ki iltifat nasib

hai wo mehman chandroza gharib

aisi taqrib-e-dhundh lata hai

ke wo nachar ji se jata hai

aghaz-e-qissa-e-jan gudaz

ek ja ik jawan raana tha

lala rukhsar-o-sarwbala tha

ishq rakhta tha us ki chhati garm

dil wo rakhta tha mom se bhi narm

shauq tha us ko surat-e-khush se

uns rakhta tha waz-e-dil kash se

tha tarah dar ap bhi lekin

rah na sakta tha achchhi surat ban

koi tarkib agar nazar ati

surat-e-hal aur ho jati

dekhta gar wo koi khush parkar

rahta khamyaza kash hi lail-o-nahar

zulf hoti kisu ki gar barham

dekhte us ke hal ko dirham

dekhta gar kahin wo chashm-e-siyah

dil se be ikhtiyar karta ah

sar mein tha shor-e-shauq-e-dil mein tha

ishq hi us ke ab-o-gul mein tha

algharaz wo jawan khush uslub

nashikeba rahe tha be mahbub

ek din be kali se ghabraya

sair karne ko bagh mein aya

kisu gul pas wo sanam thahra

kahin sabze mein ek dam thahra

ik khiyaban mein se ho nikla

ek sae tale se ro nikla

na tasalli hua dil-e-be tab

na thama chashm-e-tar se khun-e-nab

dil ki washud se be tawaqqo ho

har shajar ke tale bahut sa ro

dekh gulshan ko naummidana

munh kiya un ne janib-e-khana

dil ke rukne ka us ko ik gham tha

rah chalne mein khayal dirham tha

naga us kucha se guzar hua

afat-e-taza se dochar hua

ek ghurfe se ek mah para

thi taraf us ke garm nazzara

par gai us pe ik nazar us ki

phir na ai use khabar us ki

thi nazar yake ji ki afat thi

wo nazar hi wida-e-taqat thi

hosh jata raha nigah ke sath

sabr rukhsat hua ik ah ke sath

be qarari ne kaj adai ki

tab-o-taqat ne be wafai ki

munh jo us ka taraf se us ke phira

muztarib hoke khak par ye gira

wo to rakhti na thi khayal us ka

be tarah howe goke hal us ka

jhar daman ke tin wo mah para

uth gai samne se yak bara

wo gai us ke sar bala ai

khak mein mil gai wo raanai

dil pe karne laga tapidan naz

rang chehre se kar chala parwaz

hath jane laga gareban tak

chak ke phaile paon daman tak

taba ne ik junun kiya paida

ashk ne rang-e-khun kiya paida

sozish-e-dil ne ji mein jagah ki

dagh ne a jigar ko atish di

bistar-e-khak par gira wo zar

dard ka ghar hua dil-e-bimar

khatir afgar khar khar hui

jan tumanaksh nigar hui

us ke munh par pari jo us ki nigah

naummidi ke sath hi sar ki ah

khu hui nala-e-hazin ke sath

rabta ah atishin ke sath

honth sukhe to khun-e-nab mila

khwab-o-khur donon ko jawab mila

khalq us ki hui tamashai

par na wo dekhne kabhu ai

kuchh kaha gar kisu ne shafqat se

ro diya un ne ek hasrat se

jake us ke qarib dar baitha

qasd marne ka apne kar baitha

dil na samjha ke iztirab kiya

shauq ne kam ko kharab kiya

joke samjhe the us ko diwana

rahm karte the ashnayana

ashiq us ko kisu ka jan gae

sab bura is ada ko man gae

kyunke baham maash thi sab ki

ek ja bud-o-bash thi sab ki

waris us ke bhi badguman hue

darpae dushmani jan hue

mashwarat thi ke mar hi dalen

dafatah is bala ke tin talen

phir ye thahri ke honge ham badnam

sun ke akhir kahenge khas-o-am

kya gunah tha ke ye jawan mara

kin ne mara use kahan mara

howe ye khun-e-khufta gar bedar

khinchni howe khiffat-e-bisyar

kijiye ek dhab se us ko tang

ta na aid ho apni janib nang

tohmat-e-khabt rakhiye us ke sar

kijiye sang sar us ko phir

de ke diwana is jawan ko qarar

hogae sare darpae azar

ek ne sakht kah ke tang kiya

ek ne ake zer-e-sang kiya

ek aya to hath mein shamshir

ek bola ke ab hai kya takhir

ki isharat ke kaudakan shahr

ae labrez ghussa-o-purqahr

garche hangama us ke sar par tha

lek rawe dil us ka udhar tha

mahw tha us ke ye khayal ke bich

tha giraftar apne hal ke bich

honth par husn ka bayan us ka

tha sar-o-sang-e-astan us ka

ek dam ah-e-sard bhar uthna

nala-e-garm gah kar uthna

ji mein kahta ke ah mushkil hai

is taraf yak nigah mushkil hai

dost ko mere nam se hai nang

dushmanon se hai ji pe arsa-e-tang

chashm-e-tar se lahu baha karta

subh ki bad se kaha karta

kae nasim-e-sahar ye us se kah

mat taghaful kar aur ghafil rah

un balaon mein koi kyunke jiye

jan par a bani hai tere liye

jan dun tere waste so to

ankh uthakar idhar na dekhe kabhu

rafta rafta hua hun saudai

dur pahunchi hai meri ruswai

nam ko bhi tire na jana ah

tujh se kyunkar sukhan ki nikle rah

naummidana gar karun hun nigah

dekhta hun hazar roz-e-siyah

sakht mushkil hai sakht hai bedad

ek main khun girafta so jallad

koi mushfiq nahin ke howe shafiq

bekasi ban nahin hai koi rafiq

nala hota hai gar kabhi dilju

girya ankhon se ponchhta hai ro

ah jo hamdami si karti hai

ab to wo bhi kami si karti hai

chashm rakhta hai wasl ki ye dil

ji hai us se asir-e-ab-o-gul

warna tarkib ye kahan hoti

surat ik maani-e-nihan hoti

ab thaharta nahin hai pae sabat

ek main aur kitne tasdiat

sang baran se sakht hun dil-e-tang

shisha-e-dil nahin hai para-e-sang

mahram-e-yak nigah besh nahin

kam hai sine mein jake rish nahin

kyunke kahiye ke tu nahin agah

ik qayamat bapa hai yan sar-e-rah

kuchh chhupa to nahin raha ye raz

ik jahan us se hai khabar pardaz

pas taghaful hua tarahhum kar

gosh-e-dil janib-e-tazallum kar

kaun kahta hai rah na mahw-e-naz

par na itna ke ji se jae niyaz

un balaon pe un ne sabr kiya

ikhtiyar apne ji pe jabr kiya

is taraf ka na dekhna chhora

us ke andoh se na munh mora

aur ye majra hua mashhur

shor ruswaiyon ka pahuncha dur

dekh kar us ko be khur-o-be khwab

jana har ik ne ashiq-e-be tab

munh par us ke jo rang-e-khun nahin

ishq hai us ko ye junun nahin

hai nigah us ki jis taraf mail

is taraf hi gaya hai us ka dil

jab hua zikr aqal-o-aksar main

chah-e-sabit hui use ghar mein

ishq-e-be parda jab fasana hua

muztarib kadkhuda-e-khana hua

ghar mein ja bahr-e-daf-e-ruswai

baith kar mashwarat ye thahrai

yan se ye ghairat-e-mah-e-taban

ja ke chande kahin rahe pinhan

shab muhafe mein us ko karke sawar

sath de ek daya-e-ghaddar

par dariya ke jald rukhsat ki

is tarah fikr rafa tohmat ki

ghar tha ik ashna ka mudungah

wan ho ruposh ta ye ghairat-e-mah

howe jab is bala se khatir-e-jama

norafzae khana ho jun shama

ghar se bahar muhafa jo nikla

is jawan hi ke pas ho nikla

tapish-e-dil se ho ke ye agah

ho liya sath us ke bhar kar ah

wan ke rahne se us ko kam na tha

wo gali us ka kuchh maqam na tha

jis se ji ko kamal ho ulfat

jis se dil ki durust ho nisbat

jumbish us ki palak ko gardan ho

dil mein yan kawish-e-numayan ho

wan agar mushikast ka ho bab

yan rag-e-jan ko howe pech-o-tab

wan agar paon mein lage hai khar

dil se yan sar nikale hai yak bar

yar ko dard chashm agar howe

chashm-e-ashiq lahu mein tar howe

chak-e-daman mein wan piye zinat

yan gareban hai chak-e-gul ki sifat

wan dahan tang yan hai dil tangi

husn aur ishq mein hai yak rangi

dast afshan wo pae koban ye

tha muhafe ke sath garm-e-rah

qatra zan ashk sa wo rah tamam

darpae yar tha wo be aram

har qadam tha zaban par jari

khwab hai yake hai ye bedari

hamsiri us ki thi muyassar kab

hai mujhe bakht-e-wazhgon se ajab

shauq mufrat ne be tahi ki sakht

naushakebi ne dil se bandha rakht

rafta rafta sukhan hue nale

urne lage jigar ke parkale

iztirab-e-dili ne zor kiya

un ne be ikhtiyar shor kiya

dil ke gham ko zaban par laya

afat-e-taza jan par laya

kae jafa pesha-o-taghaful kesh

ik nazar se ziyan nahin kuchh besh

munh chhupaya hai tune us par bhi

nigah-e-iltifat idhar bhi

sabr kis kis bala se kar guzron

chara is ban nahin ke mar guzron

manzil-e-wasl daur mein kam pa

tujh ko is martabe mein istighna

hai to nazdik dil se ai tannaz

lek tujh tak safar hai dur daraz

naz ne yak nafas na rukhsat di

aine ne tujhe na fursat di

tu to wan zulf ko banaya ki

jan yan pech-o-tab khaya ki

tujh ko thi apne khal-e-rukh pe nigah

dil mira mubtala-e-dagh-e-siyah

tujh ko maddinazar thi apni chal

main sitam kash hua kya pamal

bistar-e-khwab par tujhe aram

mujh ko khamyaza khinchne se kam

wan lab-e-laal tere khandan the

yan fishurda jigar pe dandan the

naz-o-khubi ne dil diya na tujhe

rahm se ashna kiya na tujhe

ab taghaful na kar talattuf kar

hal par mere tuk taassuf kar

gosh zad daya ke hue ye sukhan

thi wo ustad kar hila-o-fan

pas us ko bala tasalli ki

waada-e-wasl se tashaffi ki

kae sitam dida-e-gham-e-duri

hochuka ab zaman-e-mahjuri

zar nali na kar shakeba ho

ishq ka raz ta na ruswa ho

dil qawi rakh na ji ko kahish de

chal koi dam ko dad khwahish de

sakht dil tang thi ye ghairat-e-mah

qata tujh bin na hawaski thi rah

garche ye husn-e-ittifaq se hai

us ki bhi jazb-e-ishtiyaq se hai

tere ane se dil kushada hua

nasha-e-dosti ziyada hua

bazm-e-ishrat karenge baham saz

hojo ab apne dost ka dam saz

de kar us ko fareb sath liya

dil-e-ashiq ko apne hath liya

lek dar parda un ne ye thani

kijiye us se khasmi-e-jani

ye to dil tafta-e-mohabbat tha

sakht warafta-e-mohabbat tha

waqt nazdik tha jo apohncha

ta sar-e-ab pa ba pa pahuncha

ab kaisa ke bahr tha zakhkhar

tund-o-mawwaj-o-tira-o-tah dar

mauj ka har kinaya tufan par

mare chashmak habab umman par

ham kanar-e-bala har ik girdab

laja sarmaya bakhsh tira sahab

guzar mauj jab na tab dekha

sahil us ka na khushk lab dekha

kashti ik an kar hui maujud

ho falak se hilal jaise numud

ki kinare pe lake istada

tha muhafa rukub amada

is safine mein jald ja pahuncha

ye bhi wan sath hi laga pahuncha

bich dariya mein daya ne jakar

kafsh us gul ki us ko dukhlakar

phenki pani ki sath par ik bar

aur boli ke o jigarafgar

haif tere nigar ki paposh

mauj-e-dariya se howe ham aghosh

ghairat-e-ishq hai to la us ko

chhor mat yun barahna pa us ko

is taraf us ke tin utarna hai

is nawahi ki sair karna hai

paon us ke jo hain nigar alud

zulm hai howen gar ghubaralud

jis kaf-e-pa ko rang-e-gul ho bar

munsifi hai ke khar se ho figar

un pe narmi mein gul se hun jo pare

abla chashm ko siyah kare

ye rawa hai to apne hal pe ro

muft namus-e-ishq ko mat kho

ji agar tha aziz ai nakam

kyun abas ishq ko kya badnam

sun ke ye harf-e-daya-e-makkar

dil se us ke gaya shakeb-o-qarar

be khabar kar-e-ishq ki tah se

jast ki un ne apni jagah se

tha safine mein ya ke dariya mein

mauj zanjir hogai pa mein

khinch gaya qaaar ko ye gauhar nab

thi kashish ishq ki magar tah-e-ab

kahte hain dubte uchhalte hain

lekin aise koi nikalte hain

dube jo yun kahin wo ja nikle

gharq-e-dariya-e-ishq kya nikle

ishq ne ah kho diya us ko

akhir akhir dubo diya us ko

jab ke dariya mein dub kar wo jawan

kho gaya gauhar-e-garami jan

daya-e-hila gar hui dil shad

wan se kashti chali ba rang-e-bad

kharkhar dili se farigh ho

le gai par us gul-e-nau ko

ye na samjhi ke ishq afat hai

fitna sazi mein ik qayamat hai

khak ho kyun na ashiq-e-be dil

kam se apne ye nahin ghafil

wasl jite na ho muyassar agar

lade maashuq ko ye turbat par

yan se ashiq agar gae nashad

khak khuban bhi un ne di barbad

qissa kotah baad yak hafta

ai wo rashk-e-mah zikhud rafta

kahne lagi ke ab to ai daya

hogaya gharq wo faromaya

ab to wo nang darmiyan se gaya

arzumand is jahan se gaya

the jo hangame us ke had se ziyad

sath us ke gae wo shor-o-fasad

shor fitne the is talak sare

ab to badnamiyan nahin bare

dil tarapta hai muttasil mera

murgh-e-bismil hai yake dil mera

wahshat-e-taba ab to afzun hai

hal ji ka mire digargun hai

be dimaghi kamal hoti hai

jan tan ke wabal hoti hai

dil koi dam mein khun howe ga

aj kal main junun howe ga

be kali ji ko tab deti hai

taqat-e-dil jawab deti hai

ji mein ata hai hun bayabani

par kahun hun ke hai ye nadani

maslahat hai ke mujh ko le chal ghar

ek do dam rahenge dariya par

gah bashad ke dil mira wa ho

warna kya janiye ke phir kya ho

daya boli ke ai sarapa naz

husn ka dar pe tere rawe niyaz

ab to main fitne ko sulaya hai

is bala ke tain bithaya hai

kaun mane hai ghar ke chalne ka

sadd-e-rah kaun hai nikalne ka

ho muhafe mein dil khushi se sawar

shad shadan kar ab se to guzar

dil se apne pidar ke gham kam kar

madar-e-mehrban ko khurram kar

kar mulaqat hamdamon se to

garm bazi ho mahramon se to

ye na sochi ke badbala hai ishq

ghat main apni lag raha hai ishq

jis kisu se ye pyar rakhta hai

aqibat us ko mar rakhta hai

jazb se apne jab kare hai kam

ashiq-e-murda se bhi le hai kam

subh gahan wo ghairat-e-khurshid

is jagah se rawan hui naumid

pahunchi nisf alnnahar dariya par

roi be ikhtiyar dariya par

had se afzun jo be qarar hui

daya kashti mein le sawar hui

harf zan yun hui ke ai daya

yan gira tha kahan wo kam maya

mauj se tha kidhar ko ham aghosh

tha talatum se kis taraf ham dosh

tujh ko aya nazar kahan akar

phir jo duba to kis jagah jakar

mujh ko dijo nishan is ja ka

main bhi dekhun kharosh dariya ka

hun main naashna-e-sair-e-ab

nashanasa-e-mauja-o-girdab

laja kya latma kis ko kahte hain

ghar mein ham nam sunte rahte hain

hain muyassar kahan ye sair ubur

ittifaqi hain is tarah ke umur

makr mein garche daya thi kamil

lek tah se sukhan ke thi ghafil

ye na samjhi ke hai fareb-e-ishq

hai ye mah para nashikib ishq

bich dariya ke ja kaha ye harf

yan hua tha wo majra-e-shagraf

yan wo baitha habab ke manind

phir na tha kuchh sarab ke manind

sunte hi ye kahan kahan kar kar

gir pari qasd tark-e-jan kar kar

mauj har ik kamand-e-shauq thi ah

lipti us ku ba rang mar-e-siyah

dam gustar da ishq tha tah-e-ab

jis ke halqe tamam the girdab

husn maujon mein yun nazar awe

nur-e-mahtab jaise lahrawe

thin wo us ki hinai angishatan

ghairat afza-e-panja-e-marjan

sar pe jis dam ke ab ho ke baha

sath pani ka aina sa raha

kashish-e-ishq akhir us mah ko

le gai khinchti hui tah ko

kude ghawwas-o-ashna sare

taba maqdur dast-o-pa mare

khinch kar koft sab hue betab

na laga hath wo dar-e-nayab

ja ham aghosh murda yar hui

tah mein dariya ke ham kanar hui

pak ki zindagi ki alaish

ho ke dast-o-baghal ki asaish

sar patakti jo ghar gai daya

afat ik le gai nai daya

ab-o-am madar-o-baradar sab

khak ufshan-o-ah-o-nala ba lab

dar-o-dasta tamam us gul ka

tark-e-ain kar tahammul ka

siwe dariya rawan hue giryan

atish-e-gham se dil jigar buriyan

khalq yak ja hui kinare par

hashr barpa hui kinare par

dam daron se sab ne kam liya

akhir un ko asir-e-dam kiya

nikle baham wale mu-e-nikle

donon dast-o-baghal hue nikle

rabt chaspan baham huwaida tha

mar gae par bhi shauq paida tha

ek ka hath ek ki balin

ek ke lab se ek ko taskin

jo nazar un ko an karte the

ek qalib guman karte the

kya likhun mil rahe wo wasli war

ham digar se juda hue dushwar

kyun na dushwar howe un ka fasl

jan de de hua ho jin ka wasl

hairat kar-e-ishq se mardum

shakl-e-taswir ap mein the gum

mir ab shayari ko kar mauquf

ishq hai ek fitna-e-maaruf

qudrat apni jahan dikhata hai

us se jo tu kahe so ata hai

kitni wusat tire bayan mein hai

kitni taqat tiri zaban mein hai

lab pe ab mehr khamushi behtar

yan sukhan ki faramshi behtar